ഒമ്പത് സ്പീക്കറുകളോ? മോട്ടോറോളയുടെ ഞെട്ടിക്കുന്ന ഫീച്ചറുകളുമായി മോട്ടോ പാഡ് 70 ഗ്രൂവ്!

മൊട്ടോറോളയുടെ മോട്ടോ പാഡ് 70 കഴിഞ്ഞ മാസം ഇന്ത്യയിൽ പുറത്തിറക്കി. കമ്പനി ഇപ്പോൾ 'മോട്ടോ പാഡ് 70 ഗ്രൂവ്' (Moto Pad 70 Groove) എന്ന പേരിൽ മറ്റൊരു മോഡൽ കൂടി അവതരിപ്പിക്കാൻ ഒരുങ്ങുകയാണ്. ഈ ടാബ്‌ലെറ്റ് ഈ മാസം ഇന്ത്യയിൽ പുറത്തിറങ്ങും. ലോഞ്ച് തീയതിക്കൊപ്പം, വരാനിരിക്കുന്ന ഈ ഡിവൈസിന്റെ പ്രധാന സവിശേഷതകളും കമ്പനി സ്ഥിരീകരിച്ചിട്ടുണ്ട്. 120Hz റിഫ്രഷ് റേറ്റുള്ള 12.1 ഇഞ്ച് ഡിസ്‌പ്ലേയാണ് ഇതിൽ ഉണ്ടാകുക. കൂടാതെ ഒമ്പത് സ്പീക്കറുകളുള്ള ജെബിഎൽ (JBL) ഓഡിയോ സിസ്റ്റവും മോട്ടോ പാഡ് 70 ഗ്രൂവിലുണ്ട്. 10,200mAh ബാറ്ററിയാണ് ഇതിൽ ഉൾപ്പെടുത്തിയിരിക്കുന്നത്.

മോട്ടോ പാഡ് 70 ഗ്രൂവ് ഇന്ത്യയിലെ ലോഞ്ച് തീയതി

മോട്ടോ പാഡ് 70 ഗ്രൂവ് ഇന്ത്യയിൽ ജൂലൈ 31-ന് അവതരിപ്പിക്കും എന്ന് ഫ്ലിപ്കാർട്ടിലെ (Flipkart) പ്രത്യേക മൈക്രോസൈറ്റ് സ്ഥിരീകരിക്കുന്നു. ടാബ്‌ലെറ്റിന്റെ രൂപകൽപ്പന വ്യക്തമാക്കുന്ന പ്രൊമോഷണൽ ചിത്രങ്ങളും പുറത്തുവന്നിട്ടുണ്ട്. ഇതിന്റെ പിൻഭാഗത്ത് ജെബിഎൽ (JBL) ലോഗോയോടുകൂടിയ വൃത്താകൃതിയിലുള്ള സെന്റേർഡ് മെഷ് ഗ്രില്ല് നൽകിയിരിക്കുന്നു. കൂടാതെ പോർട്രെയ്റ്റ്, ലാൻഡ്സ്കേപ്പ്, ലീൻ, സ്റ്റാൻഡ്, ഹാങ്ങിങ്, തിയേറ്റർ എന്നിങ്ങനെ വിവിധ മോഡുകളിൽ ഉപയോഗിക്കാവുന്ന ബിൽറ്റ്-ഇൻ സർക്കുലർ ഫോൾഡ്-ഔട്ട് സ്റ്റാൻഡും ഇതിലുണ്ട്.

മനോഹരമായ പച്ച നിറത്തിലാണ് (green colourway) ഈ ടാബ്‌ലെറ്റ് അവതരിപ്പിക്കുന്നത്. ഇതിന്റെ പിൻഭാഗത്തായി ഫിസിക്കൽ വോളിയം ബട്ടണുകളും നൽകിയിട്ടുണ്ട്.

നാല് ട്വീറ്ററുകൾ, മൂന്ന് വൂഫറുകൾ, രണ്ട് പാസീവ് റേഡിയേറ്ററുകൾ എന്നിവ അടങ്ങിയ ഇന്ത്യയിലെ ആദ്യത്തെ ഒമ്പത് സ്പീക്കറുകളുള്ള ജെബിഎൽ (JBL) സെറ്റപ്പാണ് മോട്ടോ പാഡ് 70 ഗ്രൂവിലുള്ളത് എന്ന് മോട്ടറോള വ്യക്തമാക്കുന്നു. ഇതിനുപുറമേ 43cc അക്കോസ്റ്റിക് ചേമ്പർ, പ്രത്യേക ബാസ് യൂണിറ്റുകൾ, ഡോൾബി ആറ്റ്‌മോസ് ട്യൂണിങ്, ഹൈ-റെസ് ഓഡിയോ, ഹൈ-റെസ് ഓഡിയോ വയർലെസ് സർട്ടിഫിക്കേഷൻ എന്നിവയും ഇതിൽ ഉൾപ്പെടുത്തിയിട്ടുണ്ട്. 7.2-ചാനൽ സിനിമാറ്റിക് ഓഡിയോ സിസ്റ്റം വഴി 48W വരെ സ്റ്റീരിയോ ഔട്ട്പുട്ട് നൽകാൻ ഈ ടാബ്‌ലെറ്റിന്റെ സ്പീക്കറുകൾക്ക് സാധിക്കുമെന്നും കമ്പനി അവകാശപ്പെടുന്നു.

മുൻവശത്ത്, 120Hz റിഫ്രഷ് റേറ്റ്, HDR10, ഡോൾബി വിഷൻ പിന്തുണ, ഹൈ ബ്രൈറ്റ്‌നസ് മോഡിൽ (HBM) 800 നിറ്റ്സ് വരെ പരമാവധി തിളക്കം എന്നിവയുള്ള 12.1 ഇഞ്ച് 2.5K ഡിസ്‌പ്ലേയാണ് മോട്ടോ പാഡ് 70 ഗ്രൂവിൽ നൽകിയിരിക്കുന്നത്.

ഈ ടാബ്‌ലെറ്റിൽ 10,200mAh ബാറ്ററിയാണ് നൽകിയിരിക്കുന്നത്. ഒറ്റ ചാർജിൽ 15 മണിക്കൂർ വരെ വീഡിയോ പ്ലേബാക്ക് നൽകാൻ ഇതിന് കഴിയുമെന്ന് മോട്ടറോള അവകാശപ്പെടുന്നു. 68W ചാർജറും ബോക്സിൽ ഉണ്ടാകും. പ്രൊസസ്സർ (ചിപ്‌സെറ്റ്), റാം, സ്റ്റോറേജ്, സോഫ്റ്റ്‌വെയർ, ക്യാമറകൾ തുടങ്ങിയ ടാബ്‌ലെറ്റിനെക്കുറിച്ചുള്ള കൂടുതൽ വിവരങ്ങൾ ലോഞ്ചിനോട് അടുത്ത് പുറത്തുവിടുമെന്നാണ് പ്രതീക്ഷിക്കുന്നത്.