ഷവോമി 17, ഷവോമി 17 അൾട്ര എന്നിവയുടെ ഡിസൈൻ, കളർ വിവരങ്ങൾ പുറത്ത്; മറ്റു പ്രധാന സവിശേഷതകളും അറിയാം

ഏറ്റവും പുതിയ ഫ്ലാഗ്ഷിപ്പ് സ്മാർട്ട്‌ഫോണായ ഷവോമി 17 അൾട്രാ 2025 ഡിസംബറിലാണ് ചൈനയിൽ ലോഞ്ച് ചെയ്തത്. ഇതിനു പിന്നാലെ, തിരഞ്ഞെടുത്ത ആഗോള വിപണികളിലും ഷവോമി 17 അൾട്രാ പുറത്തിറക്കുമെന്ന് കമ്പനി എക്സിക്യൂട്ടീവ് സ്ഥിരീകരിച്ചു. 2025 സെപ്റ്റംബറിൽ ചൈനയിൽ ലോഞ്ച് ചെയ്ത സ്റ്റാൻഡേർഡ് ഷവോമി 17 മോഡലും ഗ്ലോബൽ ലോഞ്ചിൻ്റെ ഭാഗമാകുമെന്ന് പ്രതീക്ഷിക്കുന്നു. ഇൻ്റർനാഷണൽ റിലീസിന് മുന്നോടിയായി, രണ്ട് സ്മാർട്ട്‌ഫോണുകളുടെയും പുതിയ റെൻഡറുകൾ ഓൺലൈനിൽ പ്രത്യക്ഷപ്പെട്ടു. ആഗോള വിപണികൾക്കായുള്ള അവയുടെ ഡിസൈൻ, കളർ ഓപ്ഷനുകൾ എന്നിവ മനസിലാക്കാൻ ഈ ചിത്രങ്ങൾ സഹായിക്കുന്നു. ഡിസൈൻ ലീക്കുകൾക്ക് പുറമേ, ഒരു ടിപ്‌സ്റ്റർ ഷവോമി 17-ന്റെ ഗ്ലോബൽ വേരിയന്റിന്റെ പൂർണ്ണ സവിശേഷതകളും പങ്കിട്ടു. ഫോൺ അതിന്റെ ഫ്ലാഗ്ഷിപ്പ് പെർഫോമൻസ് ഹാർഡ്‌വെയർ നിലനിർത്തുമെങ്കിലും, ചൈനയ്ക്ക് പുറത്ത് ബാറ്ററി കപ്പാസിറ്റി കുറഞ്ഞേക്കുമെന്ന് ലീക്കുകൾ സൂചിപ്പിക്കുന്നു. ഈ ഫോണുകളുടെ കൃത്യമായ ഗ്ലോബൽ ലോഞ്ച് തീയ്യതി കമ്പനി ഇതുവരെ സ്ഥിരീകരിച്ചിട്ടില്ലെങ്കിലും അതുടനെ തന്നെ ഉണ്ടാകുമെന്നാണു പ്രതീക്ഷിക്കുന്നത്.

ഷവോമി 17 അൾട്ര, ഷവോമി 17 എന്നിവയുടെ ഡിസൈൻ സംബന്ധിച്ച വിവരങ്ങൾ പുറത്ത്:

ഷവോമി 17 അൾട്ര, ഷവോമി 17 എന്നിവയുടെ ഗ്ലോബൽ വേരിയൻ്റുകളുടെ ഒഫീഷ്യൽ ലുക്കിങ്ങ് റെൻഡറുകൾ NieuweMobiel ആണു പ്രസിദ്ധീകരിച്ചത്. രണ്ട് സ്മാർട്ട്‌ഫോണുകളും അവയുടെ ചൈനീസ് മോഡലിനു സമാനമായ ഡിസൈൻ മൊത്തത്തിൽ നിലനിർത്തുന്നുവെന്ന് ചിത്രങ്ങൾ വെളിപ്പെടുത്തുന്നു. ക്യാമറ മൊഡ്യൂൾ ഡിസൈൻ, ബട്ടൺ പ്ലേസ്‌മെന്റ്, ജനറൽ ലേഔട്ട് എന്നിവയിൽ മാറ്റമില്ലാതെ കാണപ്പെടുന്നു. എല്ലാ പ്രദേശങ്ങളിലും ഡിസൈൻ ഒരുപോലെ നിലനിർത്താനാണ് ഷവോമിക്കു താൽപര്യമെന്ന് ഇതു സൂചിപ്പിക്കുന്നു.

എന്നിരുന്നാലും, ലീക്കായ റെൻഡറുകളിൽ ഷവോമി 17 ഒരു ഗ്രീൻ കളർ ഓപ്ഷനിൽ കാണിച്ചിട്ടുണ്ട്, ഈ ഷേഡ് ചൈനീസ് മോഡലിൽ ലഭ്യമായിരുന്നില്ല. ഇതു തിരഞ്ഞെടുത്ത ആഗോള വിപണികൾക്ക് മാത്രമുള്ള കളർ വേരിയൻ്റ് ആയിരിക്കാം. ചൈനയിൽ വാഗ്ദാനം ചെയ്ത പിങ്ക് കളർ ഓപ്ഷന് പകരമായിരിക്കും ഇത്. അതേസമയം, ഷവോമി 17 അൾട്രാ ചൈനീസ് പതിപ്പിന് സമാനമായ നിറങ്ങളിൽ തന്നെയാണു റെൻഡറുകളിൽ പ്രത്യക്ഷപ്പെടുന്നത്. റെൻഡറുകളിൽ വലിയ വിഷ്യൽ മാറ്റങ്ങളൊന്നും ഫോണുകളിൽ കാണാൻ കഴിയുന്നില്ല.

ഷവോമി 17-നു പ്രതീക്ഷിക്കുന്ന വില, പ്രധാന സവിശേഷതകൾ:

ഷവോമി 17-ന്റെ ഗ്ലോബൽ വേരിയന്റിന്റെ പൂർണ്ണ സവിശേഷതകൾ ടിപ്‌സ്റ്ററായ സുധാൻഷു അംബോറെയാണു ലീക്കാക്കി പുറത്തു വിട്ടത്. യൂറോപ്യൻ വിപണിയിലെ ഷവോമിയുടെ ഓൺലൈൻ സ്റ്റോറിൽ നിന്നാണ് ഈ ലീക്ക് ഉണ്ടായതെന്ന് തോന്നുന്നു, എന്നിരുന്നാലും വിവരങ്ങൾ ഔദ്യോഗികമായി സ്ഥിരീകരിച്ചിട്ടില്ല.

ലീക്കുകൾ പ്രകാരം, ഷവോമി 17 ഗ്ലോബൽ വേരിയൻ്റ് ക്വാൽകോമിന്റെ സ്‌നാപ്ഡ്രാഗൺ 8 എലൈറ്റ് ജെൻ 5 ചിപ്‌സെറ്റ് ഉപയോഗിച്ച് പ്രവർത്തിക്കും, ഇത് 3nm പ്രോസസ്സിൽ നിർമ്മിച്ചതാണ്. ചൈനീസ് വേരിയന്റിൽ ഉപയോഗിക്കുന്ന അതേ പ്രോസസറായ ഇത് ഫ്ലാഗ്ഷിപ്പ് ലെവൽ പ്രകടനം ഉറപ്പാക്കുന്നു. എന്നിരുന്നാലും, ഏറ്റവും വലിയ മാറ്റം ബാറ്ററിയാണെന്നാണ് പറയപ്പെടുന്നത്. ആഗോള മോഡലിന് 6,330mAh ബാറ്ററി ഉണ്ടാകുമെന്നാണ് പ്രതീക്ഷിക്കുന്നത്. ഇത് ചൈനീസ് പതിപ്പിൽ ഉപയോഗിക്കുന്ന 7,000mAh ബാറ്ററിയേക്കാൾ ചെറുതാണ്.

മാർച്ച് 2-ന് ബാഴ്‌സലോണയിൽ ആരംഭിക്കുന്ന MWC 2026-ന് മുമ്പ് ആഗോളതലത്തിൽ ഷവോമി 17 അൾട്ര, ഷവോമി 17 എന്നിവ ലോഞ്ച് ചെയ്യുമെന്ന് റിപ്പോർട്ടുകൾ സൂചിപ്പിക്കുന്നു. കൃത്യമായ ലോഞ്ച് തീയതി ഇപ്പോഴും അജ്ഞാതമാണെങ്കിലും, ലീക്കായ വിവരങ്ങൾ സൂചിപ്പിക്കുന്നത് ഷവോമി 17-ന്റെ 512GB സ്റ്റോറേജ് വേരിയന്റിന് EUR 1,099 മുതൽ വില ആരംഭിക്കാമെന്നാണ്. ഇതു ചൈനയിലെ വിലയുമായി താരതമ്യം ചെയ്യുമ്പോൾ കൂടുതലാണ്.