ഐപി അഡ്രസ്സും ചാറ്റ് ഹിസ്റ്ററിയും മറച്ചുവെക്കാം; മെറ്റാ AI-യുടെ പുത്തൻ ഫീച്ചറുകൾ

വാട്ട്‌സ്ആപ്പ് തങ്ങളുടെ പുതിയ ഫീച്ചറായ ഇൻകോഗ്നിറ്റോ ചാറ്റ് വിത്ത് മെറ്റാ എഐ (Incognito Chat with Meta AI) പ്രഖ്യാപിച്ചു. കമ്പനിയുടെ എഐ അസിസ്റ്റന്റുമായി ഉപയോക്താക്കൾക്ക് സ്വകാര്യവും താൽക്കാലികവുമായ സംഭാഷണങ്ങൾ നടത്താൻ ഈ ഫീച്ചർ സഹായിക്കും. വ്യക്തിപരമായ കാര്യങ്ങൾ, സാമ്പത്തികം, ആരോഗ്യം അല്ലെങ്കിൽ ജോലി സംബന്ധമായ നിർണ്ണായക വിവരങ്ങൾ എന്നിവയെക്കുറിച്ച് സ്ഥിരമായ ഒരു റെക്കോർഡ് സൂക്ഷിക്കാതെ തന്നെ ചോദ്യങ്ങൾ ചോദിക്കാൻ ആഗ്രഹിക്കുന്നവർക്കായാണ് ഈ സേവനം ഒരുക്കിയിരിക്കുന്നത്. മെറ്റായുടെ പ്രൈവറ്റ് പ്രോസസിംഗ് (Private Processing) സാങ്കേതികവിദ്യയിൽ അധിഷ്ഠിതമായ ഈ ഫീച്ചർ വരും മാസങ്ങളിൽ വാട്ട്‌സ്ആപ്പിലും മെറ്റാ എഐ ആപ്പിലും ലഭ്യമായിത്തുടങ്ങും.

വാട്ട്‌സ്ആപ്പിലെ മെറ്റാ എഐ ഇൻകോഗ്നിറ്റോ ചാറ്റുകൾ എങ്ങനെ പ്രവർത്തിക്കുന്നു

വാട്ട്‌സ്ആപ്പിൽ മെറ്റാ എഐയുമായി ഒരു ഇൻകോഗ്നിറ്റോ ചാറ്റ് തുടങ്ങുമ്പോൾ അത് ഉപയോക്താവിന് മാത്രം പ്രവേശിക്കാൻ കഴിയുന്ന ഒരു പ്രത്യേക സെഷനായിട്ടായിരിക്കും പ്രവർത്തിക്കുക എന്ന് മെറ്റാ വ്യക്തമാക്കുന്നു. ഈ സംഭാഷണങ്ങൾ അവസാനിച്ചുകഴിഞ്ഞാൽ അവ സേവ് ചെയ്യപ്പെടില്ല, കൂടാതെ സന്ദേശങ്ങൾ സ്വയം അപ്രത്യക്ഷമാവുകയും ചെയ്യും. സംഭാഷണങ്ങൾ പ്രോസസ്സ് ചെയ്യുന്ന സമയത്ത് മെറ്റായ്ക്കോ വാട്ട്‌സ്ആപ്പിനോ അതിന്റെ ഉള്ളടക്കം കാണാൻ കഴിയില്ലെന്നും കമ്പനി അവകാശപ്പെടുന്നു. മെറ്റാ എഐയുമായുള്ള ഈ ഇൻകോഗ്നിറ്റോ ചാറ്റ് ഫീച്ചർ തികച്ചും ഐച്ഛികമാണ് (optional). വരും മാസങ്ങളിൽ കൂടുതൽ ഉപയോക്താക്കളിലേക്ക് എത്തുന്നതോടെ വാട്ട്‌സ്ആപ്പിലും മെറ്റാ എഐ ആപ്പിലും ഇത് ലഭ്യമാകും.

മെറ്റായുടെ 'പ്രൈവറ്റ് പ്രോസസിംഗ്' (Private Processing) സിസ്റ്റം ഉപയോഗിച്ചാണ് ഇൻകോഗ്നിറ്റോ ചാറ്റ് പ്രവർത്തിക്കുന്നത്. എഐയോടുള്ള നിങ്ങളുടെ ആവശ്യങ്ങൾ കമ്പനി അറിയാതെ തന്നെ കൈകാര്യം ചെയ്യാൻ ഈ സംവിധാനം സഹായിക്കുന്നു. ലളിതമായി പറഞ്ഞാൽ, മെറ്റായുടെ സ്വന്തം സെർവറുകളിൽ നിന്ന് വേറിട്ടുനിൽക്കുന്ന ഒരു സുരക്ഷിത സാഹചര്യത്തിലാണ് നിങ്ങളുടെ സന്ദേശങ്ങൾ പ്രോസസ്സ് ചെയ്യപ്പെടുന്നത്. അതിനാൽ നിങ്ങൾ ചോദിക്കുന്ന കാര്യങ്ങളോ എഐ നൽകുന്ന മറുപടിയോ വായിക്കാൻ തങ്ങൾക്ക് കഴിയില്ലെന്ന് കമ്പനി പറയുന്നു.

കൂടാതെ, നിങ്ങളുടെ ഐപി അഡ്രസ് (IP address) പോലുള്ള തിരിച്ചറിയൽ വിവരങ്ങൾ ഈ സിസ്റ്റം മറച്ചുവെക്കുന്നു. സെഷൻ അവസാനിച്ചു കഴിഞ്ഞാൽ സംഭാഷണങ്ങളുടെ യാതൊരു രേഖയും സൂക്ഷിക്കുകയുമില്ല. സന്ദേശങ്ങൾ പ്രോസസ്സ് ചെയ്യുന്ന സമയത്ത് അവ എൻക്രിപ്റ്റ് ചെയ്യപ്പെട്ട നിലയിലായിരിക്കും, നിങ്ങൾ ചാറ്റ് വിൻഡോ ക്ലോസ് ചെയ്യുന്ന നിമിഷം താൽക്കാലിക സംഭാഷണങ്ങൾ സ്വയമേവ ഇല്ലാതാവുകയും ചെയ്യും.

എൻഡ്-ടു-എൻഡ് എൻക്രിപ്ഷൻ നൽകുന്ന അതേ സുരക്ഷാ മാനദണ്ഡങ്ങൾ ക്ലൗഡ് അധിഷ്ഠിതമായി പ്രവർത്തിക്കുന്ന എഐ ഫീച്ചറുകളിലും ലഭ്യമാക്കുക എന്നതാണ് ഈ പുതിയ നീക്കത്തിലൂടെ ലക്ഷ്യമിടുന്നതെന്ന് വാട്ട്‌സ്ആപ്പ് അറിയിച്ചു. സാധാരണ എഐ ചാറ്റുകൾ ഭാവിയിലെ മറുപടികൾക്കായി പഴയ സംഭാഷണങ്ങൾ ഓർത്തുവെക്കാറുണ്ട്. എന്നാൽ ഇൻകോഗ്നിറ്റോ ചാറ്റുകൾ ഓരോ തവണയും പുതിയൊരു തുടക്കമായിരിക്കും (clean slate). അതായത്, ഒരു സെഷനിലെ വിവരങ്ങൾ അടുത്ത സെഷനിൽ എഐ ഉപയോഗിക്കില്ല.

ഇതോടൊപ്പം സൈഡ് ചാറ്റ് വിത്ത് മെറ്റാ എഐ (Side Chat with Meta AI) എന്ന മറ്റൊരു ഫീച്ചർ കൂടി വികസിപ്പിക്കുന്നതായും കമ്പനി വെളിപ്പെടുത്തി. നിലവിലുള്ള ചാറ്റുകൾക്കുള്ളിൽ നിന്നുകൊണ്ടുതന്നെ എഐ സഹായം തേടാൻ ഇത് സഹായിക്കും. ഈ ചാറ്റുകളിലെ ഉള്ളടക്കം എഐക്ക് ലഭ്യമാകില്ല എന്നതും ഇതിന്റെ പ്രത്യേകതയാണ്.