ഇതറിഞ്ഞോ! സ്മാർട്ട്‌ഫോൺ വിപണി പിടിച്ചടക്കാൻ കൂടുതൽ ഫീച്ചറുകളുമായി വിവോ X500 സീരീസ് എത്തുന്നു!

വിവോ അവരുടെ വിവോ X300 അൾട്രാ, X300s എന്നീ ഫോണുകൾ അടുത്തിടെ ചൈനയിൽ അവതരിപ്പിച്ചു. ഇതിന് പിന്നാലെ അടുത്ത തലമുറയിൽപ്പെട്ട വിവോ X500 സീരീസിനെക്കുറിച്ചുള്ള വിവരങ്ങൾ ഓൺലൈനിൽ പ്രത്യക്ഷപ്പെട്ടു തുടങ്ങി. വിവോ X500, വിവോ X500 പ്രോ, വിവോ X500 പ്രോ മാക്സ് എന്നീ മോഡലുകൾ ഈ സീരീസിൽ ഉണ്ടാകുമെന്നാണ് പ്രതീക്ഷിക്കുന്നത്. വിവോ X500 പ്രോ മാക്സിന്റെ പിൻ ക്യാമറ സവിശേഷതകളെക്കുറിച്ചുള്ള വിവരങ്ങൾ ചൈനീസ് ടിപ്‌സ്റ്റർ അടുത്തിടെ പുറത്തുവിട്ടിരുന്നു. അടിസ്ഥാന മോഡലായ വിവോ X500-ൽ മീഡിയടെക് ഡൈമെൻസിറ്റി 9600 ചിപ്‌സെറ്റും, വിവോ X500 പ്രോ, വിവോ X500 പ്രോ മാക്സ് എന്നിവയിൽ ഡൈമെൻസിറ്റി 9600 പ്രോ പ്രോസസറും ഉണ്ടാകാനാണ് സാധ്യത.

വിവോ X500 പ്രോ മാക്സ് വരുന്നു; ട്രിപ്പിൾ ക്യാമറ സവിശേഷതകൾ 

വരാനിരിക്കുന്ന വിവോ X500 സീരീസിലെ ക്യാമറ വിവരങ്ങൾ ചൈനീസ് ടിപ്സ്റ്ററായ സ്മാർട്ട് പിക്കാച്ചു വെയ്‌ബോയിലൂടെ പുറത്തുവിട്ടു. ഇത് വിവോ X500 പ്രോ മാക്സിനെക്കുറിച്ചുള്ള വിവരങ്ങളാണെന്നാണ് സൂചന. സോണി പുതുതായി വികസിപ്പിച്ച LYT-838 സെൻസറാണ് ഈ സ്മാർട്ട്‌ഫോണിൽ പ്രതീക്ഷിക്കുന്നത്. ഇത് 50 മെഗാപിക്സൽ സെൻസർ ആയിരിക്കാനാണ് സാധ്യത.

മികച്ച എച്ച്ഡിആർ ഇമേജിംഗിനും ലോ-ലൈറ്റ് ഫോട്ടോഗ്രഫിക്കും സഹായിക്കുന്ന ലോഫിക് സാങ്കേതികവിദ്യ ഈ സെൻസറിലുണ്ടാകും. വിവോ X300 പ്രോയിലുണ്ടായിരുന്ന LYT-828 സെൻസറിന് പകരമുള്ള കൂടുതൽ കരുത്താർന്ന പതിപ്പായിരിക്കും സോണി LYT-838.

വിവോ X500 പ്രോ മാക്സിൽ 200 മെഗാപിക്സൽ പെരിസ്കോപ്പ് ടെലിഫോട്ടോ ലെൻസും മികച്ച അൾട്രാ വൈഡ് ക്യാമറയും അടങ്ങുന്ന ട്രിപ്പിൾ ക്യാമറ സജ്ജീകരണമാണ് പ്രതീക്ഷിക്കുന്നത്. ഈ സ്മാർട്ട്‌ഫോണിൽ 7,000mAh ബാറ്ററി ഉണ്ടാകുമെന്ന് ടിപ്‌സ്റ്റർ വെളിപ്പെടുത്തിയിട്ടുണ്ട്.

വിവോ X500 സീരീസിന്റെ പ്രോസസർ വിവരങ്ങളും ഇതിനോടകം പുറത്തുവന്നു. വിവോ X500 മോഡലിൽ മീഡിയടെക് ഡൈമെൻസിറ്റി 9600 ചിപ്‌സെറ്റും, ഉയർന്ന മോഡലുകളായ വിവോ X500 പ്രോ, വിവോ X500 പ്രോ മാക്സ് എന്നിവയിൽ മീഡിയടെക് ഡൈമെൻസിറ്റി 9600 പ്രോ ചിപ്‌സെറ്റും ഉണ്ടാകാനാണ് സാധ്യത.

കഴിഞ്ഞ ഒക്ടോബറിലായിരുന്നു വിവോ X300, വിവോ X300 പ്രോ ഫോണുകൾ ചൈനയിൽ അവതരിപ്പിച്ചത്. അതുകൊണ്ടുതന്നെ അടുത്ത തലമുറയിൽപ്പെട്ട സ്മാർട്ട്ഫോണുകൾ ഈ വർഷം ഇതേ കാലയളവിൽ വിപണിയിലെത്തിയേക്കും. അതേസമയം, വിവോ X300 അൾട്രായും വിവോ X300s മോഡലും മാർച്ചിലെ അവസാന വാരത്തിലാണ് ചൈനീസ് വിപണിയിൽ എത്തിയത്.