മീഡിയടെക് ഡൈമെൻസിറ്റി 9600 പ്രോ ചിപ്‌സെറ്റുമായി വിവോ X500 പ്രോ മാക്സ് എത്തുന്നു

വിവോയുടെ പ്രീമിയം സ്മാർട്ട്ഫോൺ നിരയിലേക്ക് പുതിയ കരുത്തനായി വിവോ X500 സീരീസ് ഈ വർഷം അവസാനത്തോടെ എത്തുന്നു. നിലവിലുള്ള X300 സീരീസിന്റെ പിൻഗാമിയായി എത്തുന്ന ഈ ഹാൻഡ്‌സെറ്റുകളിൽ അത്യാധുനിക ക്യാമറ ഫീച്ചറുകളും വ്യത്യസ്ത ഡിസ്‌പ്ലേ സൈസുകളും ഉണ്ടാകുമെന്നാണ് സൂചനകൾ. 2025 ഒക്ടോബറിൽ പുറത്തിറങ്ങിയ വിവോ X300, X300 പ്രോ, കൂടാതെ 2026 മാർച്ചിലെത്തിയ X300 അൾട്രാ എന്നിവയുടെ തുടർച്ചയായാണ് X500 വരുന്നത്. മുൻ മോഡലുകളെ അപേക്ഷിച്ച് മികച്ച പ്രോസസർ, കരുത്തുറ്റ ബാറ്ററി, പുത്തൻ ഡിസ്‌പ്ലേ സാങ്കേതികവിദ്യ എന്നിവ X500 സീരീസിന്റെ പ്രത്യേകതകളായിരിക്കുമെന്ന് റിപ്പോർട്ടുകൾ സൂചിപ്പിക്കുന്നു.

വിവോ X500 സീരീസിൽ മൾട്ടിസ്‌പെക്ട്രൽ സെൻസർ ഉണ്ടായേക്കും

വിവോയുടെ പുതിയ ഫ്ലാഗ്ഷിപ്പ് മോഡലായ വിവോ X500 സീരീസിനെക്കുറിച്ചുള്ള വിവരങ്ങൾ പ്രമുഖ ടിപ്‌സ്റ്റർ ആയ സ്മാർട്ട് പിക്കാച്ചു പുറത്തുവിട്ടു. ഈ പരമ്പരയിൽ 6.4 ഇഞ്ച്, 6.9 ഇഞ്ച് എന്നിങ്ങനെ രണ്ട് വ്യത്യസ്ത ഡിസ്‌പ്ലേ സൈസുകളുള്ള ഫോണുകൾ ഉണ്ടായേക്കും. ഇതിലെ ഏറ്റവും ഉയർന്ന മോഡലായ വിവോ X500 പ്രോ മാക്സ്, LOFIC സാങ്കേതികവിദ്യയുള്ള 50 മെഗാപിക്സൽ പ്രൈമറി ക്യാമറയുമായാണ് പരീക്ഷിക്കപ്പെടുന്നത്.

അമിത വെളിച്ചമുള്ള സാഹചര്യങ്ങളിൽ ഇലക്ട്രോണുകളെ നിയന്ത്രിക്കാനും ഡൈനാമിക് റേഞ്ച് വർദ്ധിപ്പിക്കാനും ഈ സെൻസർ സഹായിക്കും. കൂടാതെ, 200 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയും ഇതിലുണ്ടാകുമെന്ന് കരുതപ്പെടുന്നു. നിറങ്ങളുടെ കൃത്യതയും വൈറ്റ് ബാലൻസും മെച്ചപ്പെടുത്താനായി ഒരു മൾട്ടിസ്‌പെക്ട്രൽ സെൻസറും വിവോ പരീക്ഷിക്കുന്നുണ്ട്. 50 മെഗാപിക്സൽ അൾട്രാ വൈഡ് സെൻസറും ഈ ക്യാമറ സിസ്റ്റത്തിൽ പ്രതീക്ഷിക്കാം.

മീഡിയടെക് ഡൈമെൻസിറ്റി 9600 പ്രോ ചിപ്‌സെറ്റ്, 7,000mAh ബാറ്ററി, 144Hz റിഫ്രഷ് റേറ്റുള്ള 2K LTPO ഡിസ്‌പ്ലേ, ഇൻ-ഡിസ്‌പ്ലേ അൾട്രാസോണിക് ഫിംഗർപ്രിന്റ് സെൻസർ എന്നിവയായിരിക്കും ഇതിന്റെ പ്രധാന ഫീച്ചറുകൾ. സ്റ്റാൻഡേർഡ്, പ്രോ, പ്രോ മാക്സ് എന്നീ മോഡലുകൾ ഉൾപ്പെടുന്ന ഈ സീരീസ് ഈ വർഷം സെപ്റ്റംബറിൽ ചൈനയിൽ പുറത്തിറങ്ങിയേക്കും. ഇതേ സമയത്ത് തന്നെ ഷവോമിയുടെ പുതിയ 18 സീരീസും വിപണിയിലെത്താൻ സാധ്യതയുണ്ട്.