മോട്ടറോള റേസർ ഫോൾഡ് വിപണിയിലേക്ക്: സവിശേഷതകളും തന്ത്രങ്ങളും വ്യക്തമാക്കി ശിവം രഞ്ജൻ

വർഷങ്ങളായി, മടക്കാവുന്ന (foldable) സ്മാർട്ട്‌ഫോണുകളുടെ വിപണി അഭൂതപൂർവമായ വളർച്ചയ്ക്കാണ് സാക്ഷ്യം വഹിക്കുന്നത്. സാംസങ് ആണ് ഫോൾഡബിൾ ഫോണുകളെ മുഖ്യധാരാ വിപണിയിൽ എത്തിച്ചതും, പിന്നീട് തങ്ങളുടെ 'ഫോൾഡ്' (Fold) സീരീസിലൂടെ ഈ ശ്രേണി ആക്രമണാത്മകമായി വികസിപ്പിച്ചതും നമ്മൾ കണ്ടു. മറ്റ് ബ്രാൻഡുകളും ഈ പാത പിന്തുടരുകയും ബുക്ക്-സ്റ്റൈൽ ഫോൾഡബിൾ ഫോണുകളുടെ സ്വന്തം പതിപ്പുകൾ വിപണിയിൽ നിരന്തരമായി അവതരിപ്പിക്കുകയും ചെയ്തു.

എന്നാൽ അവിടെയാണ് മോട്ടറോളയുടെ (Motorola) പ്രസക്തി. ക്ലാംഷെൽ (clamshell - മുകളിലേക്ക് മടക്കാവുന്ന) ഡിസൈനിലുള്ള ഫോൾഡബിൾ സ്മാർട്ട്‌ഫോൺ ആദ്യമായി വിപണിയിലെത്തിച്ച ബ്രാൻഡുകളിലൊന്ന് മോട്ടറോളയാണെന്ന കാര്യം ഒരുപക്ഷേ നിങ്ങൾക്ക് അറിയില്ലായിരിക്കാം. അതെ, ഒറിജിനൽ 'മോട്ടറോള റേസർ' (Motorola Razr)-നെ കുറിച്ചാണ് നമ്മൾ പറയുന്നത്. അതിനുശേഷം, മറ്റ് കമ്പനികൾ ബുക്ക്-സ്റ്റൈൽ ഫോൾഡബിളുകളിൽ പരീക്ഷണങ്ങൾ നടത്തുകയും അവ അവതരിപ്പിക്കുകയും ചെയ്തപ്പോൾ, മോട്ടറോള തങ്ങളുടെ റേസർ ലൈനപ്പിലൂടെ ഫ്ലിപ്പ്-സ്റ്റൈൽ ഫോൾഡബിളുകളെ കൂടുതൽ മെച്ചപ്പെടുത്തുന്നതിലായിരുന്നു ശ്രദ്ധ കേന്ദ്രീകരിച്ചത്. പതുക്കെ, ഈ ഫോൾഡ് ഫോണുകൾ കേവലം പരീക്ഷണങ്ങൾ എന്നതിലുപരി എല്ലാവരും ആഗ്രഹിക്കുന്ന ഒരു ഫ്ലാഗ്ഷിപ്പ് ഉൽപ്പന്നമായി പരിണമിക്കുന്നത് നമ്മൾ കണ്ടു.

അതുകൊണ്ടുതന്നെ, 2026-ൽ മോട്ടറോള ഒടുവിൽ തങ്ങളുടെ 'റേസർ ഫോൾഡ്' (Razr Fold) പുറത്തിറക്കിയപ്പോൾ, എല്ലാവരുടെയും മനസ്സിലുയർന്ന സ്വാഭാവികമായ ചോദ്യം അതിന്റെ സവിശേഷതകളെയോ (specifications) വിലയെയോ കുറിച്ചായിരുന്നില്ല. പകരം, അത് കൂടുതൽ തന്ത്രപരമായ ഒന്നായിരുന്നു: എന്തുകൊണ്ട് ഇപ്പോൾ? മോട്ടറോള തങ്ങളുടെ ആദ്യത്തെ ബുക്ക്-സ്റ്റൈൽ ഫോൾഡബിൾ സ്മാർട്ട്‌ഫോൺ അവതരിപ്പിക്കാൻ എന്തുകൊണ്ടാണ് ഇത്രയും സമയമെടുത്തതെന്ന് മനസ്സിലാക്കാൻ മോട്ടറോളയുടെ അപാക് (APAC) മാർക്കറ്റിംഗ് ഹെഡ് ആയ ശിവം രഞ്ജനുമായി സംസാരിക്കാൻ ഞങ്ങൾക്ക് അവസരം ലഭിച്ചു.

വൈകിയെത്തിയതാണോ അതോ കൃത്യസമയത്ത് എത്തിയതാണോ?

മറ്റ് ബ്രാൻഡുകൾ തലമുറകൾ മുന്നിൽ നിൽക്കുമ്പോഴും, ഒരു ബുക്ക്-സ്റ്റൈൽ ഫോൾഡബിൾ സ്മാർട്ട്‌ഫോൺ വിപണിയിൽ എത്തിക്കാത്തതിന് മോട്ടറോള ഏറെ വിമർശനങ്ങൾ നേരിട്ടിരുന്നു.

എന്നാൽ, വിപണിയിലെ ആദ്യകാല ട്രെൻഡുകൾ ചെറിയ ഫോൾഡബിൾ ഫോണുകൾക്ക് (candy bar/flip) അനുകൂലമായിരുന്നുവെന്ന് ശിവം രഞ്ജൻ ചൂണ്ടിക്കാണിക്കുന്നു. “ഞങ്ങൾ 2019-ൽ തുടക്കം കുറിച്ചപ്പോൾ ഫ്ലിപ്പ് ഫോം ഫാക്ടറിലാണ് (രൂപകൽപ്പന) ശ്രദ്ധ കേന്ദ്രീകരിച്ചത്. അന്നത്തെ വിപണിയുടെ ഗതി അങ്ങോട്ടായിരുന്നു. പ്രത്യേകിച്ച്, ഇപ്പോൾ നോക്കിയാൽ പോലും യുഎസ് വിപണിയിലും കൊറിയ പോലുള്ള മറ്റ് പ്രധാന വിപണികളിലും ആദ്യകാല ട്രെൻഡുകൾ ഇത്തരം കോംപാക്റ്റ് (ചെറിയ) ഡിസൈനുകളോടായിരുന്നു,” അദ്ദേഹം പറഞ്ഞു.

ഫോൾഡബിൾ വിപണിയിൽ ഇപ്പോൾ വലിയൊരു മാറ്റം വന്നിട്ടുണ്ടെന്ന് അദ്ദേഹം കൂട്ടിച്ചേർത്തു. “കുറച്ചു വർഷങ്ങൾക്ക് മുമ്പ് ആളുകൾ 'എനിക്ക് ഒരു ഫോൾഡബിൾ ഫോൺ ആവശ്യമുണ്ടോ ഇല്ലയോ?' എന്ന് ചോദിച്ചിരുന്ന സ്ഥാനത്ത്, ഇന്ന് 'എനിക്ക് ഏത് ഫോൾഡബിൾ ഫോണാണ് വേണ്ടത്?' എന്നാണ് ചോദിക്കുന്നത്,” രഞ്ജൻ വിശദീകരിക്കുന്നു.

സാധാരണ ഫോണുകൾ വേണോ അതോ ഫോൾഡബിൾ ഫോണുകൾ വേണോ എന്ന ആശയക്കുഴപ്പത്തിന്റെ കാലഘട്ടം വിപണി പിന്നിട്ടതായി അദ്ദേഹം വിലയിരുത്തുന്നു. “2026 ആണ് ഇതിന് ഏറ്റവും അനുയോജ്യമായ സമയമെന്ന് ഞങ്ങൾ വിശ്വസിക്കുന്നു... ഉപഭോക്താക്കൾക്ക് മുന്നിൽ രണ്ടാമതൊരു ചോയ്‌സ്, അല്ലെങ്കിൽ ഒരു ബുക്ക്-സ്റ്റൈൽ ഫോൾഡബിൾ ഓപ്ഷൻ കൂടി അവതരിപ്പിക്കാൻ പറ്റിയ ഏറ്റവും കൃത്യമായ സമയമാണിത്.”

റേസർ ബ്രാൻഡിംഗും മോട്ടറോളയും

പുതിയ റേസർ ഫോൾഡ് എന്ന പേര് ബ്രാൻഡിംഗിന്റെ കാര്യത്തിൽ കമ്പനിക്ക് ചില വെല്ലുവിളികൾ ഉയർത്തിയേക്കാം. കാര്യം വ്യക്തമല്ലാത്തവർക്കായി പറയാം, മോട്ടറോള തങ്ങളുടെ ഒറിജിനൽ റേസർ ഫോണിനോടുള്ള ആദരസൂചകമായാണ് 2019 ൽ റേസർ ഫ്ലിപ്പ് ഫോണുകൾ വീണ്ടും വിപണിയിൽ എത്തിച്ചത്. അന്നുമുതൽ റേസർ എന്ന പേര് ഫ്ലിപ്പ് ഫോണുകളുമായി മാത്രമാണ് ഉപഭോക്താക്കൾ ബന്ധപ്പെടുത്തിയിരുന്നത്.

എന്നാൽ റേസർ എന്ന ഫ്രാഞ്ചൈസി യഥാർത്ഥത്തിൽ അർത്ഥമാക്കുന്നത് വളരെ നേർത്ത രൂപകൽപ്പനയെയാണെന്ന് ശിവം രഞ്ജൻ വ്യക്തമാക്കുന്നു. നിലവിൽ വിപണിയിലുള്ള ഏറ്റവും കനം കുറഞ്ഞ ഫോൾഡ് ഫോണുകളിൽ ഒന്നാണിത്, അതായത് തുറന്നുപിടിക്കുമ്പോൾ ഇതിന് വെറും 4.6 മില്ലിമീറ്റർ മാത്രമാണ് കനം. അതുകൊണ്ടുതന്നെ റേസർ ഫോൾഡ് വരുന്നതോടെ റേസർ സീരീസിന്റെ വ്യാപ്തി കൂടുകയാണ് ചെയ്യുന്നതെന്നും അദ്ദേഹം കൂട്ടിച്ചേർക്കുന്നു.

മികച്ച ഫോൾഡിനായുള്ള രൂപകൽപ്പനയും എഞ്ചിനീയറിംഗും

അൺഫോൾഡ് ഫ്ലാവ്‌ലെസ്സ് എന്ന ശക്തമായ ടാഗ്‌ലൈനോടെയാണ് മോട്ടറോള റേസർ ഫോൾഡ് എത്തിയിരിക്കുന്നത്. ആദ്യത്തെ തവണ തന്നെ എല്ലാം കൃത്യമായിരിക്കാൻ കമ്പനി പ്രത്യേകം ശ്രദ്ധിച്ചിട്ടുണ്ട്. വിപണിയിലുള്ള ബുക്ക്-സ്റ്റൈൽ ഫോണുകളിൽ നിലവിലെ ഏറ്റവും വലിയ ഡിസ്‌പ്ലേകളിൽ ഒന്നായ 8.1 ഇഞ്ച് ഇന്നർ ഡിസ്‌പ്ലേയുമായാണ് റേസർ ഫോൾഡ് വരുന്നത്. എന്നാൽ, റേസർ ഫോൾഡ് രൂപകൽപ്പന ചെയ്യുന്നത് പരീക്ഷണങ്ങളുടെയും പ്രയത്നങ്ങളുടെയും ഒന്നിലധികം ഘട്ടങ്ങളിലൂടെയായിരുന്നു എന്ന് ശിവം രഞ്ജൻ വ്യക്തമാക്കുന്നു.

ഫോൾഡബിൾ ഫോണുകളുടെ രൂപകൽപ്പനയിൽ തങ്ങൾക്കുള്ള പരിചയസമ്പത്ത് സമാനതകളില്ലാത്തതാണെന്ന് മോട്ടറോളയുടെ അപാക് മാർക്കറ്റിംഗ് ഹെഡ് ശിവം രഞ്ജൻ പറയുന്നു. ഈ സാങ്കേതികവിദ്യയുടെ തുടക്കക്കാർ എന്ന നിലയിൽ ഏറ്റവും മികച്ച ഹിഞ്ച് ഡിസൈനാണ് പുതിയ ഫോണിനായി ഒരുക്കിയിരിക്കുന്നത്. സ്റ്റെയിൻലെസ്സ് സ്റ്റീൽ മെക്കാനിസത്തിൽ നിർമ്മിച്ച ഹിഞ്ചും അലുമിനിയം ഫ്രെയിമും ഫോണിന് മികച്ച കരുത്ത് നൽകുന്നുണ്ട്. ഡിസ്‌പ്ലേയുടെ ദീർഘകാല സുരക്ഷയ്ക്കായി വലിയൊരു മാറ്റവും കമ്പനി വരുത്തിയിട്ടുണ്ട്. കാലക്രമേണ സ്ക്രീനിൽ മടക്കുകൾ വീഴുന്നതോ രൂപമാറ്റം വരുന്നതോ തടയാൻ ഇന്നർ ഡിസ്‌പ്ലേയ്ക്ക് താഴെയായി ടൈറ്റാനിയം പ്ലേറ്റ് ഉൾപ്പെടുത്തിയിട്ടുണ്ട്. ഈ സവിശേഷത ഡിസ്‌പ്ലേയ്ക്ക് മികച്ച പിന്തുണ നൽകുമെന്നും എഞ്ചിനീയറിംഗിലെ എല്ലാ മികവുകളും ഈ ഫോണിൽ ഒത്തുചേരുന്നുണ്ടെന്നും അദ്ദേഹം കൂട്ടിച്ചേർത്തു.

വിപണിയിലെ ഏറ്റവും പുതിയ സ്നാപ്ഡ്രാഗൺ 8 എലൈറ്റ് പ്രൊസസ്സറിന് പകരം സ്നാപ്ഡ്രാഗൺ 8 ജെൻ 5 തിരഞ്ഞെടുത്തതിനെക്കുറിച്ച് ഉയർന്ന ചോദ്യത്തിന് ഇതൊരു തന്ത്രപരമായ തീരുമാനമായിരുന്നു എന്നാണ് ശിവം രഞ്ജൻ വ്യക്തമാക്കുന്നത്. സ്നാപ്ഡ്രാഗൺ 8 ജെൻ 5 പ്രൊസസ്സർ ഉപയോഗിച്ച് ഈ ഫോണിൽ എന്തെങ്കിലും കാര്യങ്ങൾ ഫലപ്രദമായി ചെയ്യാൻ കഴിയില്ലെന്ന് തോന്നിയിരുന്നെങ്കിൽ കമ്പനി തീർച്ചയായും മറ്റൊരു ചിപ്‌സെറ്റ് ഉപയോഗിക്കുമായിരുന്നു. എന്നാൽ എല്ലാ ഫ്ലാഗ്ഷിപ്പ് ഫീച്ചറുകളും സുഗമമായി പ്രവർത്തിപ്പിക്കാൻ ശേഷിയുള്ള വളരെ കരുത്തുറ്റ പ്രൊസസ്സറാണ് ഇതെന്നും അദ്ദേഹം ഓർമ്മിപ്പിച്ചു.

ഈ വർഷം ആദ്യം പുറത്തിറക്കിയ സിഗ്നേച്ചർ സ്മാർട്ട്ഫോണിന്റെ പ്രധാന സവിശേഷതകൾ പുതിയ റേസർ ഫോൾഡിലും കമ്പനി നിലനിർത്തിയിട്ടുണ്ട്. സിഗ്നേച്ചർ ഫോണിൽ ഉപയോഗിച്ച അതേ ചിപ്‌സെറ്റും ക്യാമറ സെൻസറുകളുമാണ് ഇതിലും നൽകിയിരിക്കുന്നത്. ഇവ കൃത്യമായി ട്യൂൺ ചെയ്തതിലൂടെ ക്യാമറ പെർഫോമൻസിന്റെ കാര്യത്തിൽ ഡിക്സ്ഒ മാർക്ക് റേറ്റിംഗിൽ ലോകത്തിലെ ആദ്യത്തെ പത്ത് സ്ഥാനങ്ങളിൽ ഇടം നേടാൻ കഴിഞ്ഞിട്ടുണ്ട്. ഇത് റേസർ ഫോൾഡിനെ വിപണിയിലെ ഏറ്റവും മികച്ച ഫോൾഡബിൾ ക്യാമറ ഫോണാക്കി മാറ്റുമെന്നും രഞ്ജൻ വിശദീകരിച്ചു.

ഹാർഡ്‌വെയറിനപ്പുറമുള്ള മത്സരം

വിപണിയിലെ മറ്റ് ഫോൾഡബിൾ ഫോണുകളുടെ പോരായ്മകളും ഉപഭോക്താക്കളുടെ അഭിപ്രായങ്ങളും കൃത്യമായി പഠിച്ചാണ് മോട്ടറോള റേസർ ഫോൾഡ് നിർമ്മിച്ചിരിക്കുന്നതെന്ന് ശിവം രഞ്ജൻ വ്യക്തമാക്കുന്നു. സാംസങ് ഉൾപ്പെടെയുള്ള കമ്പനികൾ ഈ രംഗത്ത് കടുത്ത മത്സരം ഉയർത്തുന്നുണ്ടെങ്കിലും റേസർ ഫോൾഡ് വെറുമൊരു മത്സരത്തിന് വേണ്ടിയുള്ളതല്ലെന്നാണ് അദ്ദേഹത്തിന്റെ പക്ഷം. ക്യാമറ പെർഫോമൻസ്, ബാറ്ററി ലൈഫ്, ഈട് നിലനിൽപ്പ് എന്നിവയായിരുന്നു ഇതുവരെ വിപണിയിലുണ്ടായിരുന്ന ഫോൾഡബിൾ ഫോണുകളുടെ പ്രധാന പോരായ്മകൾ. പലർക്കും ഫോൾഡബിൾ ഫോണിനൊപ്പം മറ്റൊരു ഫോൺ കൂടി കൂടെക്കരുതേണ്ട അവസ്ഥയുണ്ടായിരുന്നു. എന്നാൽ ഈ പ്രശ്നങ്ങളെല്ലാം റേസർ ഫോൾഡിലൂടെ മോട്ടറോള പരിഹരിച്ചിട്ടുണ്ട്. ഉപഭോക്താക്കൾക്ക് തള്ളിക്കളയാനാകാത്ത അത്ര മികച്ചൊരു ഓഫറാണ് തങ്ങൾ ഇതിലൂടെ മുന്നോട്ട് വെക്കുന്നതെന്നും അതുകൊണ്ടാണ് ഇതിനെ കുറ്റമറ്റ ഫോൾഡ് എന്ന് വിശേഷിപ്പിക്കുന്നതെന്നും ഗോഡ്ഫാദർ സിനിമയിലെ പ്രശസ്തമായ ഡയലോഗ് ഓർമ്മിപ്പിച്ചുകൊണ്ട് അദ്ദേഹം കൂട്ടിച്ചേർത്തു.

പ്രീമിയം സ്മാർട്ട്ഫോൺ വിപണി കൈപ്പിടിയിലൊതുക്കാൻ മോട്ടറോള

പുതിയ റേസർ ഫോൾഡിന്റെ വരവോടെ പ്രീമിയം സ്മാർട്ട്ഫോൺ വിപണിയിൽ തങ്ങളുടെ സ്വാധീനം ശക്തമാക്കാനാണ് മോട്ടറോള ശ്രമിക്കുന്നതെന്ന് വ്യക്തമാകുകയാണ്. ആഗോളതലത്തിൽ കമ്പനിയുടെ എഡ്ജ്, റേസർ സീരീസുകളിൽ നിന്നുള്ള വരുമാനം മുപ്പത് ശതമാനമായി ഉയർന്നുവെന്ന് ശിവം രഞ്ജൻ വെളിപ്പെടുത്തുന്നു. ഏഷ്യാ പസഫിക് മേഖലയിൽ ഈ വളർച്ച അതിവേഗത്തിലായിരുന്നു. നിലവിൽ ഏഷ്യാ പസഫിക് വിപണിയിൽ മോട്ടറോളയുടെ ആകെ വരുമാനത്തിന്റെ അൻപത് ശതമാനത്തിലധികവും വരുന്നത് പ്രീമിയം ഫോണുകളിൽ നിന്നാണെന്ന സന്തോഷവാർത്തയും അദ്ദേഹം പങ്കുവെച്ചു.

എല്ലാ വില വിഭാഗങ്ങളിലും മികച്ച ഉൽപ്പന്നങ്ങൾ എത്തിക്കാനാണ് മോട്ടറോള ഇപ്പോൾ ലക്ഷ്യമിടുന്നതെന്ന് ശിവം രഞ്ജൻ വ്യക്തമാക്കുന്നു. പ്രീമിയം സ്മാർട്ട്ഫോൺ വിപണിയിൽ കൂടുതൽ ശ്രദ്ധ കേന്ദ്രീകരിക്കുന്നതിനൊപ്പം ഉപഭോക്താക്കൾക്ക് തങ്ങളുടെ താല്പര്യത്തിനനുസരിച്ച് തിരഞ്ഞെടുക്കാൻ വൈവിധ്യമാർന്ന ലൈനപ്പുകളും കമ്പനി ഒരുക്കുന്നുണ്ട്. വിപണിയിലെ വിവിധ വിഭാഗങ്ങളിലുള്ള ഉപഭോക്താക്കളുടെ ആവശ്യങ്ങൾ മനസ്സിലാക്കി അവർക്ക് അനുയോജ്യമായ ഫോണുകൾ നൽകാനാണ് ശ്രമിക്കുന്നതെന്ന് അദ്ദേഹം പറഞ്ഞു.

ഇതുവരെ കമ്പനിയുടെ അൾട്രാ പ്രീമിയം അല്ലെങ്കിൽ ഫ്ലാഗ്ഷിപ്പ് ശ്രേണിയിൽ റേസർ ഫ്ലിപ്പ് ഫോണുകൾ മാത്രമാണുണ്ടായിരുന്നതെന്ന് അദ്ദേഹം ഓർമ്മിപ്പിച്ചു. എന്നാൽ ഇപ്പോൾ ഉപഭോക്താക്കൾക്ക് ഒരു മികച്ച സാധാരണ ഫ്ലാഗ്ഷിപ്പ് ഫോണും അതോടൊപ്പം ബുക്ക്-സ്റ്റൈൽ ഫോൾഡബിൾ ഫോണും ഓപ്ഷനുകളായി നൽകാൻ കമ്പനിക്ക് സാധിക്കുന്നുണ്ട്. ഇതോടെ മോട്ടറോളയുടെ പ്രീമിയം പോർട്ട്ഫോളിയോ പൂർണ്ണമാകുകയാണ്. ഉപഭോക്താക്കൾക്ക് ആവശ്യമായ എല്ലാ ഓപ്ഷനുകളും നൽകാൻ കഴിയുന്നു എന്നത് ഒരു ബ്രാൻഡ് എന്ന നിലയിൽ തങ്ങൾക്ക് വലിയ ആത്മവിശ്വാസമാണ് നൽകുന്നതെന്നും രഞ്ജൻ കൂട്ടിച്ചേർത്തു.

ഒരു പുതിയ തുടക്കം

മോട്ടറോള റേസർ ഫോൾഡ് വെറുമൊരു പരീക്ഷണമല്ല, മറിച്ച് കമ്പനിയുടെ ഐഡന്റിറ്റിയുടെ സ്ഥിരമായ വിപുലീകരണമായാണ് അവർ ഇതിനെ കാണുന്നത്. ഇതൊരു പുതിയ തുടക്കമാണെന്നും പുതിയൊരു വിഭാഗം ഉപഭോക്താക്കൾക്ക് വേണ്ടിയുള്ളതാണെന്നും വിപണിയിൽ ആവശ്യത്തിന് ഡിമാൻഡ് ഉള്ളടത്തോളം കാലം ഈ രംഗത്ത് ഉറച്ചുനിൽക്കുമെന്നും ശിവം രഞ്ജൻ വ്യക്തമാക്കുന്നു. 2026 ൽ ഒരു ബുക്ക്-സ്റ്റൈൽ ഫോൾഡബിൾ സ്മാർട്ട്ഫോൺ അവതരിപ്പിച്ചതിലൂടെ മോട്ടറോള ഈ വിപണിയിലേക്ക് വൈകിയാണ് എത്തിയതെങ്കിലും പ്രീമിയം രംഗത്ത് ഉപഭോക്താക്കളുടെ ശ്രദ്ധ നേടാൻ കൃത്യമായ തയ്യാറെടുപ്പുകളോടെയാണ് കമ്പനി എത്തിയിരിക്കുന്നത്.

മോട്ടറോള റേസർ ഫോൾഡിന്റെ വിപണിയിലെ വിജയം അതിന്റെ സവിശേഷതകളെയോ ഫീച്ചറുകളെയോ മാത്രം ആശ്രയിച്ചല്ല ഇരിക്കുന്നത്, മറിച്ച് ഉപഭോക്താക്കൾക്ക് ഈ ഫോൺ നൽകുന്ന മികച്ച അനുഭവത്തെക്കൂടി അടിസ്ഥാനമാക്കിയായിരിക്കും. സാധാരണ ഫോണുകളെ അപേക്ഷിച്ച് ആളുകൾ ഫോൾഡബിൾ ഫോണുകൾ കൂടുതൽ കാലം ഉപയോഗിക്കാൻ വേണ്ടിയാണ് വാങ്ങാറുള്ളത്. ഒരു ബ്രാൻഡിന്റെ ഫോൾഡബിൾ ഫോൺ തിരഞ്ഞെടുക്കുമ്പോൾ അതിന്റെ ഈട് നിലനിൽപ്പ്, വിൽപ്പനാനന്തര സേവനങ്ങൾ, സോഫ്റ്റ്‌വെയർ സ്ഥിരത എന്നിവയിലാണ് ഉപഭോക്താക്കൾ വിശ്വാസമർപ്പിക്കുന്നത്. വർഷങ്ങളായി ഈ രംഗത്ത് വിശ്വാസ്യത നേടിയെടുത്ത സാംസങ് പോലുള്ള പ്രമുഖ കമ്പനികളോട് മത്സരിക്കുമ്പോൾ മോട്ടറോള നേരിടുന്ന പ്രധാന വെല്ലുവിളിയും ഇതുതന്നെയാണ്.

എന്നാൽ ഫോൾഡബിൾ വിപണിയിലേക്കുള്ള മോട്ടറോളയുടെ ഈ വൈകിയുള്ള വരവ് അവർക്ക് അനുകൂലമാകാനും സാധ്യതയുണ്ട്. ഫോൾഡബിൾ ഫോണുകൾ വെറുമൊരു പരീക്ഷണ ഘട്ടം പിന്നിട്ട്, കൂടുതൽ വ്യക്തതയുള്ള ഒരു പ്രീമിയം ഫ്ലാഗ്ഷിപ്പ് ആയി മാറിയ സമയത്താണ് കമ്പനി ഈ രംഗത്തേക്ക് പ്രവേശിക്കുന്നത്. അതുകൊണ്ടുതന്നെ ഉപഭോക്താക്കളെ ഈ സാങ്കേതികവിദ്യയെക്കുറിച്ച് പഠിപ്പിക്കുന്നതിന് പകരം, ദീർഘകാല ഉപയോഗത്തിൽ അവർ നേരിടുന്ന പ്രധാന പ്രശ്നങ്ങൾക്ക് നേരിട്ട് പരിഹാരം കാണാനാണ് മോട്ടറോള ശ്രമിക്കുന്നത്. എങ്കിലും ഈ വൈകിയുള്ള വരവ് മോട്ടറോളയ്ക്ക് ഗുണമാണോ അതോ ദോഷമാണോ എന്ന് കാലം തെളിയിക്കും.