സാംസങ്ങ് ഗാലക്സി S25 എഡ്ജ് എത്താൻ അധികം കാത്തിരിക്കേണ്ട

സാംസങ്ങിൻ്റെ ഏറ്റവും പുതിയ ഫോണായ സാംസങ്ങ് ഗാലക്‌സി S25 എഡ്ജ് അടുത്ത ഏതാനും മാസങ്ങൾക്കുള്ളിൽ പുറത്തിറക്കുമെന്ന് ഏറ്റവും പുതിയ റിപ്പോർട്ട് സൂചിപ്പിക്കുന്നു. ബുധനാഴ്ച കാലിഫോർണിയയിലെ സാൻ ജോസിൽ നടന്ന ഗാലക്‌സി അൺപാക്ക്ഡ് 2025 ഇവൻ്റിലാണ് ദക്ഷിണ കൊറിയൻ ടെക് ഭീമനായ സാംസങ്ങ് അവരുടെ ഗാലക്‌സി S25 സീരീസ് അവതരിപ്പിച്ചത്. ഈ സീരീസിലെ മുൻനിര മോഡലുകൾക്കൊപ്പം, സാംസങ് "എഡ്ജ്" ലൈനപ്പിന് കീഴിലുള്ള ഒരു പുതിയ ഡിവൈസും പ്രദർശിപ്പിച്ചിരുന്നു. ഇതിനെ ഗാലക്സി S25 എഡ്ജ് എന്ന് വിളിക്കുന്നു. മറ്റ് മുൻനിര മോഡലുകളെ അപേക്ഷിച്ച് മെലിഞ്ഞ ഡിസൈനാണ് ഈ ഫോണിനുള്ളത്. എന്നിരുന്നാലും, സാംസങ് ഇതിൻ്റെ സവിശേഷതകളെക്കുറിച്ചോ വിലയെക്കുറിച്ചുള്ള വിശദാംശങ്ങളോ ഒന്നും ചടങ്ങിൽ വെളിപ്പെടുത്തിയില്ല. ആരാധകരുടെ ഇടയിൽ പ്രതീക്ഷകൾ വർധിപ്പിച്ചുകൊണ്ട് ഗാലക്സി S25 എഡ്ജിൻ്റെ ലോഞ്ച് ടൈംലൈനിനെക്കുറിച്ച് കമ്പനിയുടെ ഒരു പ്രതിനിധി സൂചന നൽകിയിട്ടുണ്ടെന്ന് അടുത്തിടെ പുറത്തു വന്ന റിപ്പോർട്ടുകൾ സൂചിപ്പിക്കുന്നു.

സാംസങ്ങ് ഗാലക്സി S25 എഡ്ജ് ലോഞ്ച് ടൈംലൈൻ:

9to5Google നൽകുന്ന വിവരങ്ങൾ അനുസരിച്ച്, ഗാലക്സി S25 സ്ലിം ഏപ്രിലിൽ ലോഞ്ച് ചെയ്യുമെന്ന് സാംസങ് പ്രതിനിധി (പേര് നൽകിയിട്ടില്ല) സൂചന നൽകിയിട്ടുണ്ട്. ഏപ്രിലിലോ മെയ് മാസത്തിലോ ഫോൺ അനാച്ഛാദനം ചെയ്യുമെന്ന് നേരത്തെ ഉണ്ടായിരുന്ന അഭ്യൂഹങ്ങൾ ശരിയാണെന്ന് ഇതിൽ നിന്നും മനസിലാക്കാം.

ഫോണിനെ കുറിച്ച് ഇതുവരെ കൂടുതൽ വിവരങ്ങൾ ലഭ്യമല്ല. ഗാലക്സി അൺപാക്ക്ഡ് ഇവൻ്റിൻ്റെ സമയത്ത്, ഉപകരണത്തിൻ്റെ ചില ആന്തരിക ഭാഗങ്ങൾ കാണിക്കുന്ന ഒരു ടീസർ വീഡിയോ സാംസങ്ങ് പങ്കിട്ടിരുന്നു. പിന്നിൽ രണ്ട് ലെൻസുകൾ ലംബമായി അടുക്കി വച്ചിരിക്കുന്ന ഡ്യുവൽ ക്യാമറ സെറ്റപ്പ് ഫോണിലുണ്ടാകുമെന്ന് വീഡിയോയിൽ സൂചന നൽകുന്നു. ഗാലക്‌സി S25 സീരീസിലെ മറ്റ് മുൻനിര മോഡലുകളുമായി താരതമ്യപ്പെടുത്തുമ്പോൾ ഗാലക്‌സി S25 എഡ്ജിന് വളരെ കനം കുറഞ്ഞ ഡിസൈൻ ആയിരിക്കുമെന്ന് പ്രതീക്ഷിക്കുന്നു.

സാംസങ്ങ് ഗാലക്സി S25 എഡ്ജിൽ പ്രതീക്ഷിക്കുന്ന സവിശേഷതകൾ:

സാംസങ് ഗാലക്‌സി S25 എഡ്ജിൽ ഗാലക്‌സി S25+ മോഡലിന് സമാനമായ 6.66 ഇഞ്ച് ഡിസ്‌പ്ലേ ആയിരിക്കും. ക്യാമറയില്ലാതെ 6.4 മില്ലിമീറ്ററും ക്യാമറ മൊഡ്യൂൾ ഉൾപ്പെടുത്തിയാൽ 8.3 മില്ലിമീറ്ററും എന്നിങ്ങനെ മെലിഞ്ഞ ഡിസൈനാകും ഈ ഫോണിനുണ്ടാവുക.

ക്യാമറകൾക്കായി, ഇതിൽ ഡ്യുവൽ റിയർ ക്യാമറ സജ്ജീകരണമുണ്ടാകുമെന്ന് പ്രതീക്ഷിക്കുന്നു. 200 മെഗാപിക്സൽ പ്രധാന ക്യാമറയാണ് ഹൈലൈറ്റ്. മുൻനിര ഗാലക്‌സി S25 മോഡലുകളിൽ കാണുന്ന സ്‌നാപ്ഡ്രാഗൺ 8 എലീറ്റ് ഗാലക്സി ചിപ്പ്സെറ്റ് ആയിരിക്കും ഗാലക്‌സി S25 എഡ്ജിനും കരുത്തു നൽകുക. ഇത് 12 ജിബി റാമിനൊപ്പം വരാം.