സ്നാപ്ഡ്രാഗൻ്റെ പുതിയ ചിപ്പ് സാസംങ്ങ് ഗാലക്സി S25 പ്ലസിലുണ്ടാകില്ല

ഏവരും ആകാംക്ഷയോടെ കാത്തിരിക്കുന്ന സാംസങ്ങ് ഗാലക്‌സി S25 സീരീസ് 2025 ആദ്യ പകുതിയിൽ ലോഞ്ച് ചെയ്യാൻ ഒരുങ്ങുകയാണ്. മുൻ പതിപ്പുകൾ പോലെത്തന്നെ, പുതിയ ഗാലക്‌സി S25 ലൈനപ്പിലും ഗാലക്‌സി S25, ഗാലക്‌സി S25+, ഗാലക്‌സി S25 അൾട്രാ എന്നീ മൂന്ന് മോഡലുകൾ ഉണ്ടാകുമെന്നാണു പ്രതീക്ഷിക്കുന്നത്. അടുത്തിടെ, ഇക്കൂട്ടത്തിലെ സാംസങ്ങ് S25+ മോഡൽ ഗീക്ക്ബെഞ്ച് ബെഞ്ച്മാർക്കിംഗ് സൈറ്റിൽ കണ്ടെത്തിയിരുന്നു. അതിലൂടെ ഈ ഫോണുമായി ബന്ധപ്പെട്ട ചില വിശദാംശങ്ങളും ലഭിച്ചിട്ടുണ്ട്. നേരത്തെ, സാംസങ് ഗാലക്‌സി S25 സീരീസിൽ വരുന്ന എല്ലാ മോഡലുകളിലും സ്‌നാപ്ഡ്രാഗൺ പ്രോസസറുകൾ ആയിരിക്കുമെന്ന അഭ്യൂഹങ്ങൾ ഉണ്ടായിരുന്നു. എന്നാൽ സാംസങ്ങ് ഗാലക്സി S25+ ഫോണിൽ എക്സിനോസ് 2500 ആയിരിക്കുമെന്നാണ് സൂചനകൾ. ഔദ്യോഗിക ലോഞ്ചിംഗ് അടുക്കുന്തോറും ഈ ഫോണിൻ്റെ സവിശേഷതകളുമായി ബന്ധപ്പെട്ട കൂടുതൽ വിവരങ്ങൾ ലഭ്യമാകുമെന്നാണു പ്രതീക്ഷിക്കുന്നത്.

സാംസങ്ങിൻ്റെ പുതിയ മോഡൽ ഗീക്ക്ബെഞ്ചിൽ കണ്ടെത്തി:

SM-S936B എന്ന മോഡൽ നമ്പറുള്ള ഒരു സാംസങ് സ്മാർട്ട്‌ഫോണാണ് ഗീക്ക്ബെഞ്ചിൽ കണ്ടെത്തിയത്. ഇത് വരാനിരിക്കുന്ന ഗാലക്സി S25+ മോഡലിൻ്റെ പ്രോട്ടോടൈപ്പായിരിക്കും എന്നാണു കരുതുന്നത്. ലിസ്റ്റിംഗ് അനുസരിച്ച്, ഉപകരണം 2,359 എന്ന സിംഗിൾ-കോർ സ്‌കോറും 8,141 എന്ന മൾട്ടി-കോർ സ്‌കോറും നേടി. ഇതിന് 10.72 ജിബി റാം ഉണ്ടെന്ന് കാണിക്കുന്നു, അത് 12 ജിബിയായി വിപണിയിൽ എത്തിയേക്കാം. ആൻഡ്രോയിഡ് 15ലാണ് ഈ സാംസങ് ഫോൺ പ്രവർത്തിക്കുന്നതെന്നും ലിസ്റ്റിങ്ങിൽ നിന്നും മനസിലാകുന്നു.

സാംസങ്ങ് ഗാലക്സി S25+ എക്സിനോസ് 2500 ചിപ്പിലായിരിക്കും പ്രവർത്തിക്കുക:

's5e9955' എന്ന് ലേബൽ ചെയ്‌ത മദർബോർഡുള്ള ടെൻ-കോർ ചിപ്‌സെറ്റാണ് ഫോണിന് ഊർജം പകരുന്നതെന്ന് ലിസ്‌റ്റിംഗ് വെളിപ്പെടുത്തുന്നു. സിപിയുവിന് 1+2+5+2 കോർ സജ്ജീകരണമുണ്ട്, അതിൽ ഒരു പ്രധാന കോർ 3.30GHz ക്ലോക്ക് സ്പീഡിൽ പ്രവർത്തിക്കുന്നു. രണ്ട് കോറുകൾ 2.75GHz വേഗതയിലും അഞ്ച് കോറുകൾ 2.36GHz വേഗതയിലും പ്രവർത്തിക്കും. 1.80GHz ഉള്ള രണ്ട് അധിക കോറുകളും ഈ CPU-വിലുണ്ട്. ഈ കോർ സ്പീഡുകൾ എക്സിനോസ് 2500 ചിപ്‌സെറ്റുമായി ബന്ധപ്പെട്ടിരിക്കുന്നതാണ്.

ബെഞ്ച്മാർക്ക് ടെസ്റ്റുകളിൽ, എക്സിനോസ് 2500 നേടിയ സിംഗിൾ-കോർ, മൾട്ടി-കോർ സ്‌കോറുകൾ ക്വാൽകോമിൻ്റെ ഏറ്റവും പുതിയ സ്നാപ്ഡ്രാഗൺ 8 എലീറ്റ് ചിപ്പ് നേടിയതിനേക്കാൾ കുറവാണ്. ഏതാനും മാസങ്ങൾക്ക് മുമ്പ്, സ്നാപ്ഡ്രാഗൺ 8 എലീറ്റ് ചിപ്പ് (മോഡൽ SM-S938U) ഉപയോഗിക്കുന്ന ഗാലക്സി S25 അൾട്രായുടെ യുഎസ് പതിപ്പ്, ഗീക്ക്ബെഞ്ചിൽ സിംഗിൾ-കോറിൽ 3,069 പോയിൻ്റും മൾട്ടി-കോർ ടെസ്റ്റുകളിൽ 9,080 പോയിൻ്റും നേടിയതായി ഫലങ്ങൾ കാണിച്ചു.

സാംസങ് അതിൻ്റെ മുഴുവൻ ഗാലക്‌സി S25 സീരീസിലും സ്‌നാപ്ഡ്രാഗൺ 8 എലീറ്റ് ചിപ്പുകൾ ഉപയോഗിച്ചേക്കുമെന്ന് കിംവദന്തിയുണ്ടായിരുന്നു. ഗാലക്സി S24 സീരീസിൻ്റെ കാര്യം പരിശോധിച്ചാൽ സാംസങ് ചില പ്രദേശങ്ങളിൽ സ്നാപ്ഡ്രാഗൺ 8 ജെൻ 4 ചിപ്പും മറ്റുള്ളവയിൽ എക്സിനോസ് 2400 ചിപ്പുകളുമാണ് ഉപയോഗിച്ചത്. അതേസമയം 2023-ൽ സാംസങ് എല്ലാ ഗാലക്‌സി S സീരീസ് ഫോണുകളും സ്‌നാപ്ഡ്രാഗൺ പ്രോസസറുകൾ ഉപയോഗിച്ചാണ് പുറത്തിറക്കിയത്.