ഇതൊരു ഒന്നൊന്നര വരവ്! സംഗീത പ്രേമികളെ അമ്പരപ്പിക്കാൻ എച്ച്2 ചിപ്പുമായി ആപ്പിൾ എയർപോഡ്‌സ് മാക്സ് 2

ആപ്പിളിന്റെ ഏറ്റവും പുതിയ ഓവർ-ഇയർ ഹെഡ്‌ഫോണുകളായ എയർപോഡ്‌സ് മാക്സ് 2 തിങ്കളാഴ്ച പുറത്തിറങ്ങി. ആദ്യ മോഡൽ വിപണിയിലെത്തി അഞ്ച് വർഷത്തിന് ശേഷമാണ് ഈ പുതിയ പതിപ്പ് എത്തുന്നത്. ഏറ്റവും പുതിയ എയർപോഡ്‌സ് പ്രോയിലുള്ള അതേ കരുത്തുറ്റ എച്ച്2 (H2) ചിപ്പാണ് എയർപോഡ്‌സ് മാക്സ് 2-ലും ഉപയോഗിച്ചിരിക്കുന്നത്. പഴയ മോഡലിന്റെ അതേ മികച്ച ഡിസൈൻ നിലനിർത്തിക്കൊണ്ട് തന്നെ, കൂടുതൽ മെച്ചപ്പെട്ട ആക്ടീവ് നോയ്‌സ് ക്യാൻസലേഷൻ സൗകര്യം ഇതിൽ ഉൾപ്പെടുത്തിയിട്ടുണ്ട്. ട്രാൻസ്പരൻസി മോഡ്, ശബ്ദ മികവ് എന്നിവയിൽ വലിയ പുരോഗതി വരുത്തിയതായി ആപ്പിൾ അവകാശപ്പെടുന്നു. കൂടാതെ, മെച്ചപ്പെട്ട കമ്പ്യൂട്ടേഷണൽ ഓഡിയോ സാങ്കേതികവിദ്യയും ആപ്പിൾ ഉപകരണങ്ങളുമായി എളുപ്പത്തിൽ ബന്ധിപ്പിക്കാനുള്ള സൗകര്യവും ഇതിന്റെ പ്രത്യേകതയാണ്.

ആപ്പിൾ എയർപോഡ്‌സ് മാക്സ് 2: വിലയും വിപണിയിലെ ലഭ്യതയും

എയർപോഡ്‌സ് മാക്സിന് ഇന്ത്യയിൽ 67,900 രൂപയാണ് വില വരുന്നത്. ബ്ലൂ, മിഡ്‌നൈറ്റ്, ഓറഞ്ച്, പർപ്പിൾ, സ്റ്റാർലൈറ്റ് എന്നിങ്ങനെ അഞ്ച് നിറങ്ങളിൽ ഇവ ലഭ്യമാണ്. അമേരിക്കയുൾപ്പെടെ ലോകത്തിലെ മുപ്പതിലധികം രാജ്യങ്ങളിലുള്ളവർക്ക് മാർച്ച് 25 മുതൽ ആപ്പിളിന്റെ ഔദ്യോഗിക വെബ്‌സൈറ്റിലൂടെയും ആപ്പിൾ സ്റ്റോർ ആപ്പ് വഴിയും ഇവ ഓർഡർ ചെയ്യാൻ സാധിക്കും. അടുത്ത മാസം ആദ്യവാരത്തോടെ ഉൽപ്പന്നങ്ങൾ ഉപഭോക്താക്കൾക്ക് ലഭിച്ചു തുടങ്ങുമെന്നും റീട്ടെയിൽ സ്റ്റോറുകളിൽ ലഭ്യമാകുമെന്നും കമ്പനി അറിയിച്ചു.

പുതിയ ഹെഡ്‌ഫോണുകൾക്കൊപ്പം മികച്ച അധിക സേവനങ്ങളും ആപ്പിൾ നൽകുന്നുണ്ട്. ഉപഭോക്താക്കൾക്ക് ആപ്പിൾകെയർ പ്ലസ് സൗകര്യം ഇതിനായി ഉപയോഗിക്കാം. അപ്രതീക്ഷിതമായുണ്ടാകുന്ന കേടുപാടുകൾ, ബാറ്ററി മാറ്റിവെക്കൽ, മോഷണം അല്ലെങ്കിൽ നഷ്ടപ്പെടൽ എന്നിവയ്ക്ക് ഇതിലൂടെ പരിരക്ഷ ലഭിക്കും. കൂടാതെ ആപ്പിൾ വിദഗ്ധരുടെ മുഴുവൻ സമയ സേവനവും ലഭ്യമാണ്. പുതിയ വരിക്കാർക്ക് എയർപോഡ്‌സ് മാക്സ് 2 വാങ്ങുന്നതിലൂടെ മൂന്ന് മാസത്തെ ആപ്പിൾ മ്യൂസിക് സേവനം സൗജന്യമായി ലഭിക്കും.

എയർപോഡ്‌സ് മാക്സ് 2 ഫീച്ചറുകളും സ്പെസിഫിക്കേഷനുകളും

എയർപോഡ്‌സ് മാക്സ് 2 പ്രവർത്തിക്കുന്നത് ആപ്പിളിന്റെ എച്ച്2 (H2) ചിപ്പിന്റെ കരുത്തിലാണ്. മുൻ മോഡലിൽ ഉണ്ടായിരുന്ന എച്ച്1 (H1) ചിപ്പിന് പകരമായാണ് ഇത് അവതരിപ്പിച്ചിരിക്കുന്നത്. വിമാനത്തിന്റെ എൻജിൻ ശബ്ദം, യാത്രയ്ക്കിടയിലുള്ള മറ്റ് ശബ്ദങ്ങൾ തുടങ്ങി ചുറ്റുപാടുമുള്ള അനാവശ്യ ശബ്ദങ്ങളെ ഒന്നര ഇരട്ടി വരെ കൂടുതൽ ഫലപ്രദമായി തടയാൻ  പുതിയ ഹെഡ്‌ഫോണുകൾക്ക് സാധിക്കുമെന്ന് കമ്പനി അവകാശപ്പെടുന്നു. ഹെഡ്‌ഫോൺ ധരിച്ചിരിക്കുമ്പോഴും ചുറ്റുപാടുമുള്ള ശബ്ദങ്ങൾ വ്യക്തമായി കേൾക്കാൻ സഹായിക്കുന്ന ട്രാൻസ്പരൻസി മോഡിലും വലിയ മാറ്റങ്ങൾ വരുത്തിയിട്ടുണ്ട്. പുതിയ ഡിജിറ്റൽ സിഗ്നൽ പ്രോസസിംഗ് വഴി പുറംലോകത്തെ ശബ്ദങ്ങൾ കൂടുതൽ സ്വാഭാവികമായി കേൾക്കാനും ഒപ്പം ചുറ്റുപാടുകളെക്കുറിച്ച് ഉപയോക്താക്കൾക്ക് കൂടുതൽ അവബോധം നൽകാനും ഇത് സഹായിക്കും.

എയർപോഡ്‌സ് മാക്സ് 2-ലേക്ക് എത്തുന്ന പുത്തൻ ഇന്റലിജന്റ് ഫീച്ചറുകളെക്കുറിച്ചും ആപ്പിൾ പ്രഖ്യാപിച്ചു. ചുറ്റുപാടിലെ ശബ്ദത്തിനനുസരിച്ച് നോയ്‌സ് കൺട്രോൾ ലെവലുകൾ സ്വയം ക്രമീകരിക്കുന്ന അഡാപ്റ്റീവ് ഓഡിയോ, ഉപയോക്താവ് സംസാരിച്ചു തുടങ്ങുമ്പോൾ പാട്ടിന്റെയോ മറ്റോ വോളിയം കുറയ്ക്കുന്ന കോൺവർസേഷൻ അവയർനസ് എന്നിവ ഇതിൽ ഉൾപ്പെടുന്നു.

ആപ്പിൾ ഇന്റലിജൻസിന്റെ കരുത്തിൽ പ്രവർത്തിക്കുന്ന ലൈവ് ട്രാൻസ്ലേഷൻ സൗകര്യം ഈ ഹെഡ്‌ഫോണുകളുടെ പ്രത്യേകതയാണ്. ഇത് വിവിധ ഭാഷകൾ സംസാരിക്കുന്നവർക്കിടയിൽ തത്സമയ വിവർത്തനത്തിലൂടെ ആശയവിനിമയം എളുപ്പമാക്കുന്നു. കൂടാതെ, പശ്ചാത്തല ശബ്ദങ്ങൾ ഒഴിവാക്കി സംസാരിക്കുന്നയാളുടെ ശബ്ദത്തിന് മുൻഗണന നൽകുന്ന വോയിസ് ഐസൊലേഷൻ ഫീച്ചർ കോളുകൾക്ക് കൂടുതൽ വ്യക്തത നൽകുന്നു.

ക്രിയേറ്റർമാർക്കായി സ്റ്റുഡിയോ നിലവാരത്തിലുള്ള ഓഡിയോ റെക്കോർഡിംഗ് സൗകര്യവും ആപ്പിൾ അവതരിപ്പിച്ചിട്ടുണ്ട്. കൂടാതെ, ഹെഡ്‌ഫോണിലെ ഡിജിറ്റൽ ക്രൗൺ  ഉപയോഗിച്ച് ഫോട്ടോകൾ എടുക്കാനും വീഡിയോ റെക്കോർഡിംഗ് നിയന്ത്രിക്കാനും സഹായിക്കുന്ന ക്യാമറ റിമോട്ട് ഫംഗ്‌ഷനും ഇതിലുണ്ട്. ഉച്ചത്തിലുള്ള ശബ്ദങ്ങൾ കുറയ്ക്കുന്ന ലൗഡ് സൗണ്ട് റിഡക്ഷൻ, പേഴ്സണലൈസ്ഡ് വോളിയം, തലയുടെ ചലനങ്ങളിലൂടെ സിരിയോട് പ്രതികരിക്കാൻ സഹായിക്കുന്ന പുതിയ ഫീച്ചറുകൾ എന്നിവയാണ് മറ്റ് സവിശേഷതകൾ.

എഎൻസി, സ്പേഷ്യൽ ഓഡിയോ എന്നിവ പ്രവർത്തിക്കുമ്പോൾ തന്നെ എയർപോഡ്‌സ് മാക്സ് 2-ൽ 20 മണിക്കൂർ വരെ ബാറ്ററി ലൈഫ് ലഭിക്കുമെന്ന് ആപ്പിൾ അവകാശപ്പെടുന്നു. ഫാസ്റ്റ് ചാർജിംഗ് സൗകര്യവും ഈ ഹെഡ്‌ഫോണുകൾ പിന്തുണയ്ക്കുന്നുണ്ട്. പരിസ്ഥിതി സൗഹൃദമായ നിർമ്മാണ രീതിയാണ് ആപ്പിൾ ഇതിനായി സ്വീകരിച്ചിരിക്കുന്നത്. ഹെഡ്‌ഫോണിലെ കാന്തങ്ങളിൽ 100 ശതമാനം റീസൈക്കിൾ ചെയ്ത അപൂർവ്വ മൂലകങ്ങളും, ഇയർ കുഷ്യനുകളിൽ 100 ശതമാനം റീസൈക്കിൾ ചെയ്ത പോളിസ്റ്ററും, സർക്യൂട്ട് ബോർഡുകളിൽ റീസൈക്കിൾ ചെയ്ത സ്വർണ്ണവും ടിന്നും ആണ് ഉപയോഗിച്ചിരിക്കുന്നത്. 2030-ഓടെ കാർബൺ ന്യൂട്രാലിറ്റി കൈവരിക്കുക എന്ന ആപ്പിളിന്റെ ലക്ഷ്യത്തിന്റെ ഭാഗമായി ഇതിന്റെ പാക്കേജിംഗ് പൂർണ്ണമായും ഫൈബർ അധിഷ്ഠിതവും റീസൈക്കിൾ ചെയ്യാവുന്നതുമാണ്.