സാംസങ്ങ് ഫോണുകൾ പകുതി വിലയ്ക്ക്! പുതിയ 'ഗാലക്സി ഫോറെവർ' പ്ലാനുമായി സാംസങ്ങ്

സാംസങ്ങ് കമ്പനിയുടെ ഏറ്റവും മികച്ച സ്മാർട്ട്ഫോണുകൾ ഉപഭോക്താക്കൾക്ക് കൂടുതൽ എളുപ്പത്തിൽ സ്വന്തമാക്കാൻ സഹായിക്കുന്നതിനായി ഇന്ത്യയിൽ ഗാലക്സി ഫോറെവർ എന്ന പുതിയ പർച്ചേസ് സ്കീം അവതരിപ്പിച്ചു. ഫെബ്രുവരിയിൽ രാജ്യത്ത് പുറത്തിറക്കിയ ഗാലക്സി എസ് 26 അൾട്ര, ഗാലക്സി എസ് 26 പ്ലസ് എന്നീ മോഡലുകൾക്കാണ് ഈ ഓഫർ ലഭ്യമാകുന്നത്. ഈ പദ്ധതിയിലൂടെ ഫോണിന്റെ പകുതി വില മാത്രം നൽകി പന്ത്രണ്ട് മാസത്തെ പലിശരഹിത ഇഎംഐ സൗകര്യത്തിലൂടെ പണം അടച്ച് ഒരു വർഷത്തേക്ക് ഈ ഫോണുകൾ ഉപയോഗിക്കാൻ സാധിക്കും. ഒരു വർഷത്തിന് ശേഷം ഫോൺ കമ്പനി തിരികെ എടുക്കുമെന്ന് ഉറപ്പുനൽകുന്നതിലൂടെ ഫോണിന്റെ വിലയിൽ അൻപത് ശതമാനം കുറവ് മുൻകൂട്ടി തന്നെ ലഭ്യമാകുന്നു എന്നതാണ് ഇതിന്റെ പ്രത്യേകത.

ഗാലക്സി എസ് 26 സീരീസിന് സാംസങ്ങിന്റെ 50 ശതമാനം ബൈബാക്ക് ഓഫർ

സാംസങ്ങ് കമ്പനിയുടെ ഏറ്റവും മികച്ച സ്മാർട്ട്ഫോണുകൾ ഉപഭോക്താക്കൾക്ക് കൂടുതൽ എളുപ്പത്തിൽ സ്വന്തമാക്കാൻ സഹായിക്കുന്നതിനായി ഇന്ത്യയിൽ ഗാലക്സി ഫോറെവർ എന്ന പുതിയ പർച്ചേസ് സ്കീം അവതരിപ്പിച്ചു. ഫെബ്രുവരിയിൽ രാജ്യത്ത് പുറത്തിറക്കിയ ഗാലക്സി എസ് 26 അൾട്ര, ഗാലക്സി എസ് 26 പ്ലസ് എന്നീ മോഡലുകൾക്കാണ് ഈ ഓഫർ ലഭ്യമാകുന്നത്. ഈ സ്കീമിൽ ചേരുന്നവർക്ക് 12 മാസത്തിന് ശേഷം തങ്ങളുടെ ഫോൺ തിരികെ നൽകാനോ, സ്വന്തമായി നിലനിർത്താനോ അല്ലെങ്കിൽ പുതിയ മോഡലിലേക്ക് മാറാനോ ഉള്ള അവസരമുണ്ട്. യാതൊരു നിബന്ധനകളുമില്ലാതെ ഫോൺ തിരികെ നൽകാനുള്ള സൗകര്യവും ഇതിലുണ്ട്. ക്രെഡിറ്റ് കാർഡ് വഴി പണമടയ്ക്കുന്നവർക്ക് 50 ശതമാനം ഉറപ്പായ ബൈബാക്ക് തുകയോടെ ഫോൺ തിരികെ നൽകാം, അല്ലെങ്കിൽ ബാക്കി തുക അടുത്ത 12 മാസത്തെ പലിശരഹിത ഇഎംഐ സൗകര്യത്തിലൂടെ അടച്ചുതീർത്ത് ഫോൺ സ്വന്തമായി സൂക്ഷിക്കാം. സാംസങ്ങ് ഫിനാൻസ് പ്ലസ് ഉപയോഗിക്കുന്നവർക്ക് 12 മാസം കഴിഞ്ഞ് ഫോൺ തിരികെ നൽകി പുതിയ ഫ്ലാഗ്ഷിപ്പ് മോഡലിലേക്ക് മാറാം, അല്ലെങ്കിൽ 13-ാം മാസം ബാക്കി 50 ശതമാനം തുക അടച്ച് ഫോൺ കൈവശം വെക്കാമെന്നും കമ്പനി അറിയിച്ചു.

സാംസങ്ങ് ഗാലക്സി ഫോറെവർ പദ്ധതിയുടെ ഭാഗമായി പതിമൂന്ന് മാസത്തേക്ക് സാംസങ്ങ് കെയർ പ്ലസ് സുരക്ഷാ സേവനം ലഭിക്കും. ഫോൺ താഴെ വീണോ വെള്ളം കയറിയോ ഉണ്ടാകുന്ന തകരാറുകൾക്ക് അധിക പണം നൽകാതെ തന്നെ ഇതിലൂടെ പരിഹാരം കാണാം. 13,999 രൂപ മൂല്യമുള്ള ഈ ഇൻഷുറൻസ് സേവനം, പുതിയ ഫോണുകളിലേക്ക് മാറാനുള്ള സൗകര്യം, ഉറപ്പായ ബൈബാക്ക് ആനുകൂല്യങ്ങൾ എന്നിവ ലഭിക്കുന്നതിനായി ഉപഭോക്താക്കൾ പ്രതിമാസം 749.92 രൂപ വീതം ഒരു വർഷത്തേക്ക് പ്ലാൻ ഫീസായി നൽകണം.

12 ജിബി റാം + 256 ജിബി സ്റ്റോറേജ് സൗകര്യമുള്ള സാംസങ്ങ് ഗാലക്സി എസ് 26 അൾട്ര മോഡലിന് 1,39,999 രൂപയാണ് തുടക്കവില. ഇതിന്റെ പ്രതിമാസ ഇഎംഐ 5,833.29 രൂപയാണ് വരുന്നത്. സ്കീം ഫീസും ഉൾപ്പെടുത്തിയാൽ ആകെ പ്രതിമാസ തുക 6,583.21 രൂപയാകും. അതേസമയം, സമാനമായ സ്റ്റോറേജ് സൗകര്യമുള്ള സാംസങ്ങ് ഗാലക്സി എസ് 26 പ്ലസ് മോഡലിന് 1,19,999 രൂപയാണ് വില. ഇതിന് പ്രതിമാസ ഇഎംഐ ആയി 4,999.96 രൂപയും, പ്ലാൻ ഫീസടക്കം ആകെ 5,749.88 രൂപയും വരും.

സാംസങ്ങ് ഡോട്ട് കോം വഴിയും ഇന്ത്യയിലുടനീളമുള്ള ആയിരത്തി അഞ്ഞൂറിലധികം സാംസങ്ങ് എക്സ്പീരിയൻസ് സ്റ്റോറുകൾ വഴിയും ഗാലക്സി ഫോറെവർ സ്കീം ലഭ്യമാണ്. സാംസങ്ങ് ഫിനാൻസ് പ്ലസ് അല്ലെങ്കിൽ ക്രെഡിറ്റ് കാർഡ് ഉപയോഗിച്ച് പലിശരഹിത ഇഎംഐ സൗകര്യത്തിലൂടെ ഉപഭോക്താക്കൾക്ക് പണമടയ്ക്കാൻ സാധിക്കും. സാംസങ്ങ് ഫിനാൻസ് പ്ലസ് ഓൺലൈനായും സ്റ്റോറുകളിലും ഒരുപോലെ ഉപയോഗിക്കാം, എന്നാൽ ക്രെഡിറ്റ് കാർഡ് വഴിയുള്ള ഈ ഓഫർ സാംസങ്ങ് ഡോട്ട് കോമിലൂടെ മാത്രമാണ് ലഭിക്കുന്നത്.

ഫോണുകൾ തിരികെ നൽകുന്നതും പുതിയ മോഡലുകളിലേക്ക് മാറുന്നതും ഉൾപ്പെടെയുള്ള കാര്യങ്ങൾ ഏകോപിപ്പിക്കുന്നതിനായി സർവിഫൈ, ഡിഎംഐ ഫിനാൻസ് എന്നീ കമ്പനികളുമായി സാംസങ്ങ് കൈകോർത്തിട്ടുണ്ട്. ഇതിനുപുറമെ,തിരഞ്ഞെടുത്ത കോർപ്പറേറ്റ് ജീവനക്കാർക്കും വിദ്യാർത്ഥികൾക്കും കമ്പനിയുടെ കോർപ്പറേറ്റ് പ്ലസ്, സ്റ്റുഡന്റ് പ്ലസ് ഓൺലൈൻ സ്റ്റോറുകൾ വഴി ഈ പദ്ധതിയുടെ ആനുകൂല്യം ലഭ്യമാക്കുമെന്നും സാംസങ്ങ് അറിയിച്ചു.