ചാർജിംഗ് ടെൻഷൻ ഇനി വേണ്ട; 8550 എംഎഎച്ച് ബാറ്ററിയുമായി റെഡ്മിയുടെ പുത്തൻ കരുത്തൻ വിപണിയിൽ

റെഡ്മി കെ സീരീസിലെ ഏറ്റവും പുതിയ മോഡലായ റെഡ്മി കെ90 മാക്സ് ചൈനയിൽ പുറത്തിറക്കി. സീരീസിലെ മറ്റ് മോഡലുകളായ കെ90 പ്രോ മാക്സ്, സ്റ്റാൻഡേർഡ് കെ90 എന്നിവയ്ക്ക് പിന്നാലെയാണ് ഇതിന്റെ വരവ്. 165 ഹെർട്സ് റിഫ്രഷ് റേറ്റ് നൽകുന്ന 6.83 ഇഞ്ച് വലിപ്പമേറിയ ഡിസ്‌പ്ലേയാണ് ഫോണിന്റെ മുഖ്യ സവിശേഷത. 100 വാട്ട് ഫാസ്റ്റ് ചാർജിംഗ് പിന്തുണയുള്ള 8,550 എംഎഎച്ച് മെഗാ ബാറ്ററിയും ഇതിൽ ഉൾപ്പെടുത്തിയിട്ടുണ്ട്.

മീഡിയടെക് ഡൈമെൻസിറ്റി 9500 ചിപ്‌സെറ്റിന്റെ കരുത്തിൽ എത്തുന്ന ഫോണിന് 16 ജിബി വരെ റാം പിന്തുണയുമുണ്ട്. മികച്ച ശബ്ദാനുഭവത്തിനായി ബോസ് ട്യൂൺ ചെയ്ത സ്പീക്കറുകളും, മനോഹരമായ ചിത്രങ്ങൾക്കായി 50 മെഗാപിക്സൽ പ്രൈമറി സെൻസർ അടങ്ങുന്ന ഡ്യുവൽ റിയർ ക്യാമറ സജ്ജീകരണവുമാണ് റെഡ്മി ഈ മോഡലിൽ ഒരുക്കിയിരിക്കുന്നത്.

റെഡ്മി K90 മാക്സ്: വിലയും ലഭ്യതയും

റെഡ്മി K90 മാക്സിന്റെ 12 ജിബി റാം + 256 ജിബി സ്റ്റോറേജ് പതിപ്പിന് ചൈനയിൽ 2,999 യുവാൻ (ഏകദേശം 41,000 രൂപ) ആണ് വില. ഫോണിന്റെ 12 ജിബി + 512 ജിബി, 16 ജിബി + 256 ജിബി പതിപ്പുകൾക്ക് 3,499 യുവാൻ (ഏകദേശം 47,000 രൂപ) വില വരും.

കൂടുതൽ സ്റ്റോറേജ് ആവശ്യമുള്ളവർക്കായി പുറത്തിറക്കിയ 16 ജിബി + 512 ജിബി പതിപ്പിന് 3,999 യുവാനും (ഏകദേശം 54,000 രൂപ), ഏറ്റവും ഉയർന്ന പതിപ്പായ 16 ജിബി + 1 ടിബി മോഡലിന് 4,699 യുവാനും (ഏകദേശം 64,000 രൂപ) ആണ് വില നിശ്ചയിച്ചിരിക്കുന്നത്. സ്പേസ് സിൽവർ, ഷാഡോ ബ്ലാക്ക്, സ്കൈ ബ്ലൂ എന്നീ നിറങ്ങളിൽ ഈ പുതിയ ഫോൺ ലഭ്യമാണ്.

റെഡ്മി കെ90 മാക്സ്: സവിശേഷതകൾ

ആൻഡ്രോയിഡ് 16 അടിസ്ഥാനമാക്കിയുള്ള ഹൈപ്പർ ഒഎസ് 3 ലാണ് ഈ ഡ്യുവൽ സിം ഫോണിന്റെ പ്രവർത്തനം. 6.83 ഇഞ്ച് 1.5കെ ഡിസ്‌പ്ലേയുള്ള ഫോണിൽ 165 ഹെർട്സ് റിഫ്രഷ് റേറ്റും 3500 നിറ്റ്സ് പീക്ക് ബ്രൈറ്റ്‌നസ്സും ലഭ്യമാണ്. ഡോൾബി വിഷൻ, എച്ച്ഡിആർ 10 പ്ലസ് എന്നിവ പിന്തുണയ്ക്കുന്ന ഡിസ്‌പ്ലേയിൽ ഗെയിമിംഗ് സുഗമമാക്കാൻ 3500 ഹെർട്സ് ടച്ച് സാംപ്ലിംഗ് റേറ്റും നൽകിയിട്ടുണ്ട്.

മീഡിയടെക് ഡൈമെൻസിറ്റി 9500 ചിപ്‌സെറ്റാണ് ഇതിന് കരുത്ത് പകരുന്നത്. 16 ജിബി വരെ റാമും 1 ടിബി വരെ സ്റ്റോറേജും ഇതിൽ ലഭ്യമാണ്. ഗെയിമിംഗ് ആവശ്യങ്ങൾക്കായി പ്രത്യേക ഡി2 ഡിസ്‌പ്ലേ ചിപ്പും ഫോണിലുണ്ട്. ചൂട് കുറയ്ക്കാൻ ഐസ് സീൽഡ് കൂളിംഗ് സംവിധാനവും ഗ്രാഫൈറ്റ് ഏരിയയും ഇതിൽ ഒരുക്കിയിരിക്കുന്നു. ഇതിലെ ആക്റ്റീവ് കൂളിംഗ് ഫാൻ വെറും 100 സെക്കൻഡിനുള്ളിൽ താപനില 10 ഡിഗ്രി സെൽഷ്യസ് വരെ താഴ്ത്താൻ സഹായിക്കുമെന്ന് കമ്പനി വ്യക്തമാക്കുന്നു.

ക്യാമറകളുടെ കാര്യമെടുത്താൽ, ഒഐഎസ് പിന്തുണയുള്ള 50 മെഗാപിക്സൽ പ്രധാന ക്യാമറയും 8 മെഗാപിക്സൽ സെക്കൻഡറി സെൻസറും അടങ്ങുന്ന ഡ്യുവൽ റിയർ ക്യാമറ യൂണിറ്റാണ് ഇതിലുള്ളത്. സെൽഫികൾക്കും വീഡിയോ കോളുകൾക്കുമായി 20 മെഗാപിക്സൽ ഫ്രണ്ട് ക്യാമറയും ഫോണിലുണ്ട്. ബോസ് ട്യൂൺ ചെയ്ത സിമ്മട്രിക് സ്റ്റീരിയോ ഡ്യുവൽ സ്പീക്കറുകളാണ് മികച്ച ശബ്ദാനുഭവം ഉറപ്പാക്കുന്നത്.

5ജി, വൈ-ഫൈ 7, ബ്ലൂടൂത്ത് 4, നാവിക്, എൻഎഫ്സി തുടങ്ങി വിപുലമായ കണക്റ്റിവിറ്റി സൗകര്യങ്ങൾ ഇതിലുണ്ട്. പൊടിയിൽ നിന്നും വെള്ളത്തിൽ നിന്നും സംരക്ഷണം നൽകുന്ന ഐപി66, ഐപി68, ഐപി69 റേറ്റിംഗുകളുമായാണ് ഫോൺ എത്തുന്നത്. സുരക്ഷയ്ക്കായി 3ഡി അൾട്രാസോണിക് ഫിംഗർപ്രിന്റ് സെൻസറും ഇതിൽ ഒരുക്കിയിട്ടുണ്ട്. 100 വാട്ട് ഫാസ്റ്റ് ചാർജിംഗ് പിന്തുണയുള്ള 8,550 എംഎഎച്ച് ആണ് ഇതിലെ വലിയ ബാറ്ററി. കൂടാതെ 22.5 വാട്ട് റിവേഴ്സ് വയർഡ് ചാർജിംഗും ഈ ഫോൺ പിന്തുണയ്ക്കുന്നു.