റിയൽമി 16 പ്രോ+ പ്രതീക്ഷിച്ചതിലും പൊളിയാണ്; ടെനാ സർട്ടിഫിക്കേഷൻ ലിസ്റ്റിങ്ങിലൂടെ മുഴുവൻ സവിശേഷതകളും പുറത്ത്

റിയൽമി 16 സീരീസിലെ മോഡലുകളിൽ ഒന്നായ റിയൽമി 16 പ്രോ+ ലോഞ്ചിങ്ങിനായി തയ്യാറെടുത്തു കൊണ്ടിരിക്കുകയാണ്. ഔദ്യോഗിക പ്രഖ്യാപനത്തിന് മുമ്പ് പ്രധാനപ്പെട്ട ഹാർഡ്‌വെയർ വിശദാംശങ്ങൾ പരിശോധിക്കുന്നതിനു വേണ്ടി ചൈനയുടെ TENAA സർട്ടിഫിക്കേഷൻ വെബ്‌സൈറ്റിൽ ഈ ഫോൺ കണ്ടെത്തിയിട്ടുണ്ട്. റിയൽമി 16 പ്രോ+ ഫോണിന്റെ ചൈനീസ് പതിപ്പാണെന്ന് വിശ്വസിക്കപ്പെടുന്ന RMX5130 എന്ന മോഡൽ നമ്പറുള്ള ഫോണാണ് ലിസ്റ്റിംഗിൽ കാണിച്ചിരിക്കുന്നത്. പെർഫോമൻസ്, ഫീച്ചറുകൾ എന്നിവയുടെ കാര്യത്തിൽ പ്രോ+ മോഡൽ എന്താണ് വാഗ്ദാനം ചെയ്യുന്നത് എന്നതിനെപ്പറ്റി ഉൾക്കാഴ്ച നൽകുന്ന നിരവധി പ്രധാന സവിശേഷതകൾ TENAA ഡാറ്റാബേസിൽ ഉൾപ്പെടുന്നു. TENAA ലിസ്റ്റിംഗിൽ ഫോൺ എത്തിയതിനാൽ ഇത് അംഗീകാരത്തിന്റെ അവസാന ഘട്ടത്തിലാണെന്ന സൂചന നൽകുന്നു. എന്നാൽ, ലോഞ്ച് തീയതിയെക്കുറിച്ചോ വിപണിയിലെ ലഭ്യതയെക്കുറിച്ചോ റിയൽമി ഇതുവരെ ഒരു ഔദ്യോഗിക വിവരവും പങ്കിട്ടിട്ടില്ല. എന്തായാലും, സർട്ടിഫിക്കേഷൻ വിശദാംശങ്ങൾ വരാനിരിക്കുന്ന ഹാൻഡ്‌സെറ്റിന്റെയും അതിന്റെ ഹാർഡ്‌വെയർ സെറ്റപ്പുകളുടെയും വ്യക്തമായ ചിത്രം നൽകുന്നു. ലോഞ്ച് തീയ്യതി അടുക്കുമ്പോൾ കൂടുതൽ വിവരങ്ങൾ പുറത്തു വരുമെന്നാണു പ്രതീക്ഷിക്കുന്നത്.

റിയൽമി 16 പ്രോ+ ഫോണിൽ പ്രതീക്ഷിക്കുന്ന ഡിസ്പ്ലേ, ക്യാമറ സവിശേഷതകൾ:

TENAA സർട്ടിഫിക്കേഷൻ ലിസ്റ്റിംഗ് അനുസരിച്ച്, റിയൽമി 16 പ്രോ+ ഫോണിന് 162.45x76.27x8.49mm ബോഡി വലുപ്പവും 203 ഗ്രാം ഭാരവുമുണ്ട്. ഇത് സൂചിപ്പിക്കുന്നത് ഫോൺ സാധാരണ റിയൽമി 16 പ്രോയെക്കാൾ അൽപ്പം കട്ടിയും ഭാരവും ഉള്ളതാണെന്നാണ്. 2800 x 1280 പിക്സൽ റെസല്യൂഷനുള്ള വലിയ 6.8 ഇഞ്ച് AMOLED ഡിസ്പ്ലേയാണ് ഈ സ്മാർട്ട്ഫോണിൽ ഉള്ളത്. ഒരു ബില്യണിലധികം നിറങ്ങളുടെ കളർ ഡെപ്ത്തിനെ ഇതു പിന്തുണയ്ക്കുമെന്നത് മെച്ചപ്പെട്ട കളർ ആക്യുസി, വിഷ്യൽ ക്വാളിറ്റി എന്നിവയെ സൂചിപ്പിക്കുന്നു. ലിസ്റ്റിംഗിൽ റിഫ്രഷ് റേറ്റ് പരാമർശിച്ചിട്ടില്ലെങ്കിലും, ഡിസ്പ്ലേ ഉയർന്ന റിഫ്രഷ് റേറ്റ് വാഗ്ദാനം ചെയ്യാൻ സാധ്യതയുണ്ടെന്ന് പ്രോ+ ബ്രാൻഡിംഗ് സൂചിപ്പിക്കുന്നു.

ക്യാമറകളുടെ കാര്യത്തിൽ, റിയൽമി 16 പ്രോ+ ക്വാഡ് റിയർ ക്യാമറ സെറ്റപ്പുമായാണ് വരികയെന്നു പട്ടികപ്പെടുത്തിയിരിക്കുന്നു. ഇതിൽ 200 മെഗാപിക്സൽ മെയിൻ ക്യാമറ, 8 മെഗാപിക്സൽ അൾട്രാ-വൈഡ് ലെൻസ്, ഒരു അധിക 50 മെഗാപിക്സൽ സെൻസർ എന്നിവ ഉൾപ്പെടുന്നു. ഫോൺ 3.5x ഒപ്റ്റിക്കൽ സൂം വരെ പിന്തുണയ്ക്കുന്നു. മുൻവശത്ത്, സെൽഫികൾക്കും വീഡിയോ കോളുകൾക്കുമായി 50 മെഗാപിക്സൽ ക്യാമറയും ഉണ്ടാകും.

റിയൽമി 16 പ്രോ+ ഫോണിൽ പ്രതീക്ഷിക്കുന്ന മറ്റു സവിശേഷതകൾ:

2.8GHz പരമാവധി ക്ലോക്ക് സ്പീഡുള്ള ഒക്ടാ-കോർ പ്രോസസറാണ് റിയൽമി 16 പ്രോ+ ഫോണിലുള്ളത്. എന്നിരുന്നാലും TENAA ലിസ്റ്റിംഗിൽ ചിപ്‌സെറ്റ് ഏതാണെന്നു കൃത്യമായി പരാമർശിച്ചിട്ടില്ല. അടുത്തിടെ പുറത്തുവന്ന ഒരു ഗീക്ക്ബെഞ്ച് ലിസ്റ്റിംഗ് സൂചിപ്പിക്കുന്നത് ഫോൺ സ്നാപ്ഡ്രാഗൺ 7 ജെൻ 4 പ്രോസസറിന്റെ പരിഷ്കരിച്ച പതിപ്പ് ഉപയോഗിക്കുമെന്നാണ്. ആൻഡ്രോയ്ഡ് 16 അടിസ്ഥാനമാക്കിയ റിയൽമി UI 7-ലാണ് സ്മാർട്ട്‌ഫോൺ പ്രവർത്തിക്കുന്നത്.

ആഗോളതലത്തിൽ, ഫോണിന് മൂന്ന് പ്രധാന ആൻഡ്രോയിഡ് OS അപ്‌ഡേറ്റുകളും നാല് വർഷത്തെ സെക്യൂരിറ്റി അപ്‌ഡേറ്റുകളും ലഭിക്കുമെന്ന് പ്രതീക്ഷിക്കുന്നു. TENAA ലിസ്റ്റിങ്ങ് അനുസരിച്ച്, റിയൽമി 16 പ്രോ+ ഒന്നിലധികം മെമ്മറി, സ്റ്റോറേജ് ഓപ്ഷനുകളിൽ ലഭ്യമാകും. ഇതിൽ 128GB, 256GB, 512GB, 1TB വരെ ഇന്റേണൽ സ്റ്റോറേജ് എന്നിവയുമായി ജോടിയാക്കിയ 8GB, 12GB, 16GB, 24GB റാം വേരിയൻ്റുകൾ ഉൾപ്പെടുന്നു.

TENAA ഡാറ്റാബേസിൽ 6,850mAh ആണ് ബാറ്ററി കപ്പാസിറ്റി ലിസ്റ്റ് ചെയ്തിരിക്കുന്നത്. ഇത് ഏകദേശം 7,000mAh ശേഷിയുള്ളതായി കാണിച്ചു വിപണനം ചെയ്യാം. മറ്റ് റിപ്പോർട്ടുകൾ 80W ഫാസ്റ്റ് ചാർജിംഗിനുള്ള പിന്തുണയും പരാമർശിക്കുന്നു. ലിസ്റ്റിംഗിൽ പറയുന്ന അധിക സവിശേഷതകളിൽ ഇൻ-ഡിസ്പ്ലേ ഫിംഗർപ്രിന്റ് സെൻസർ, ഇൻഫ്രാറെഡ് (IR) ബ്ലാസ്റ്റർ എന്നിവ ഉൾപ്പെടുന്നു.