7,025mAh ബാറ്ററിയുമായി ഓപ്പോ ഫൈൻഡ് എക്സ്9എസ് വരുന്നു

ചോർന്ന വിലവിവരങ്ങൾ പ്രകാരം, ഓപ്പോ ഫൈൻഡ് എക്സ്9എസ് (Oppo Find X9s) അതിന്റെ ആഗോള പതിപ്പിനേക്കാൾ കുറഞ്ഞ വിലയിലായിരിക്കും ഇന്ത്യയിലെത്തുക. അടുത്ത മാസം ഇന്ത്യൻ വിപണിയിൽ അവതരിപ്പിക്കുന്ന ഈ ഫോൺ മൂന്ന് ആകർഷകമായ നിറങ്ങളിൽ ലഭ്യമാകും. വിലയ്ക്ക് പുറമെ, ഈ ഫോണിന്റെ പൂർണ്ണമായ സവിശേഷതകളും ഒരു ടിപ്‌സ്റ്റർ പുറത്തുവിട്ടിട്ടുണ്ട്. ആഗോള മോഡലിന് സമാനമായ ഫീച്ചറുകൾ തന്നെയാകും ഇന്ത്യൻ പതിപ്പിനുമുണ്ടാവുക എന്നാണ് സൂചന. മീഡിയടെക് ഡൈമൻസിറ്റി 9500എസ് പ്രൊസസറും 7,025mAh കരുത്തുള്ള ബാറ്ററിയും ഈ ഫോണിലുണ്ടാകുമെന്ന് കമ്പനി ഇതിനകം വ്യക്തമാക്കിയിട്ടുണ്ട്.

ഓപ്പോ ഫൈൻഡ് എക്സ്9എസ്: ഇന്ത്യയിലെ പ്രതീക്ഷിക്കുന്ന വിലയും സവിശേഷതകളും

ഓപ്പോയുടെ ഏറ്റവും പുതിയ പ്രീമിയം ഫോണായ ഫൈൻഡ് എക്സ്9എസ് (Oppo Find X9s) 79,999 രൂപ പ്രാരംഭ വിലയിൽ ഇന്ത്യയിലെത്തിയേക്കുമെന്ന് പ്രമുഖ ടിപ്‌സ്റ്റർ അഭിഷേക് യാദവ് വ്യക്തമാക്കുന്നു. ആഗോള വിപണിയേക്കാൾ അല്പം കുറഞ്ഞ നിരക്കാണിത്. മലേഷ്യയിൽ ഈ ഫോണിന് ഏകദേശം 85,000 രൂപയാണ് വില വരുന്നത് (3,599 മലേഷ്യൻ റിംഗിറ്റ്). ലോഞ്ച് ദിനത്തിൽ മാത്രമേ കമ്പനി ഔദ്യോഗിക വില പ്രഖ്യാപിക്കുകയുള്ളൂ.

മുൻപ് പ്രഖ്യാപിച്ചതുപോലെ ഓപ്പോ ഫൈൻഡ് എക്സ്9എസ്, ഫൈൻഡ് എക്സ്9 അൾട്ര എന്നീ മോഡലുകൾ മേയ് 21-നാണ് ഇന്ത്യയിൽ അവതരിപ്പിക്കുന്നത്. ഫ്ലിപ്കാർട്ട്, ആമസോൺ, ഓപ്പോ സ്റ്റോറുകൾ വഴി ഇവ സ്വന്തമാക്കാം.

ഫീച്ചറുകളുടെ കാര്യത്തിൽ ഇന്ത്യൻ പതിപ്പും ആഗോള പതിപ്പും ഒന്നുതന്നെയായിരിക്കും. ആൻഡ്രോയിഡ് 16 അധിഷ്‌ഠിത കളർഒഎസ് 16-ൽ പ്രവർത്തിക്കുന്ന ഫോണിന് കരുത്തേകുന്നത് 3nm മീഡിയടെക് ഡൈമൻസിറ്റി 9500എസ് ചിപ്‌സെറ്റാണ്. 7,025mAh ന്റെ ഭീമൻ ബാറ്ററിയും, 50MP പ്രധാന സെൻസറുള്ള ഹാസൽബ്ലാഡ് ട്രിപ്പിൾ ക്യാമറയും ഇതിലുണ്ട്. 120Hz റിഫ്രഷ് റേറ്റുള്ള 6.59 ഇഞ്ച് ഫുൾ-എച്ച്ഡി+ ഒഎൽഇഡി ഡിസ്‌പ്ലേ, 12GB റാം, 512GB സ്റ്റോറേജ്, പൊടിയെയും വെള്ളത്തെയും പ്രതിരോധിക്കാനുള്ള IP66/IP68/IP69 റേറ്റിംഗ്, 32MP സെൽഫി ക്യാമറ എന്നിവയാണ് മറ്റു പ്രധാന സവിശേഷതകൾ.