ഓപ്പോ ഫൈൻഡ് X10 പ്രോ സീരീസിൻ്റെ ചിപ്പ് വിവരങ്ങൾ പുറത്ത്; മീഡിയാടെക് ഡൈമൻസിറ്റി 9600 ആയിരിക്കുമെന്നു സൂചന

ഓപ്പോ തങ്ങളുടെ അടുത്ത വലിയ ഫ്ലാഗ്ഷിപ്പ് സ്മാർട്ട്‌ഫോൺ ലൈനപ്പായ ഓപ്പോ ഫൈൻഡ് X10 സീരീസ് അണിയറയിൽ ഒരുക്കുകയാണ്. കഴിഞ്ഞ വർഷം ഇന്ത്യയിൽ ലോഞ്ച് ചെയ്ത ഫൈൻഡ് X9 ലൈനപ്പിൻ്റെ പിൻഗാമിയായി ഈ സീരീസ് വരുമെന്ന് പ്രതീക്ഷിക്കുന്നു. ഓപ്പോ ഇതുവരെ ഔദ്യോഗികമായി ഒരു വിശദാംശങ്ങളും സ്ഥിരീകരിച്ചിട്ടില്ലെങ്കിലും, ലീക്കുകളും ടിപ്പുകളും ഓൺലൈനിൽ പ്രത്യക്ഷപ്പെട്ടു തുടങ്ങിയിട്ടുണ്ട്. സമീപകാലത്തെ റിപ്പോർട്ടുകൾ പ്രകാരം, ഫൈൻഡ് X10 സീരീസിൽ ഓപ്പോ ഫൈൻഡ് X10, ഫൈൻഡ് X10 പ്രോ, ഫൈൻഡ് X10 പ്രോ മാക്സ് എന്നിങ്ങനെ മൂന്നു മോഡലുകൾ ഉൾപ്പെട്ടേക്കാം. ലീക്കുകളിലെ ഏറ്റവും വലിയ ഹൈലൈറ്റുകളിൽ ഒന്ന്, 2nm പ്രോസസിൽ നിർമിച്ചതെന്ന് അഭ്യൂഹമുള്ള നെക്സ്റ്റ് ജനറേഷൻ മീഡിയടെക് ഡൈമെൻസിറ്റി ചിപ്‌സെറ്റ് ഇവയിൽ ഉപയോഗിച്ചേക്കാം എന്നാണ്. അതിനാൽ ഗംഭീര പ്രകടനം ഇത് ഉറപ്പു നൽകുന്നു. പെർഫോമൻസിലെ അപ്‌ഗ്രേഡുകൾക്കൊപ്പം, ക്യാമറ ടെക്നോളജിയെ കൂടുതൽ മുന്നോട്ട് കൊണ്ടുപോകാനും ഓപ്പോക്കു പദ്ധതിയുണ്ട്. ഏറ്റവും കരുത്തുറ്റതും ക്യാമറ കേന്ദ്രീകൃതവുമായ ഫ്ലാഗ്ഷിപ്പ് സീരീസുകളിലൊന്നു നൽകാനാണ് ഓപ്പോ ലക്ഷ്യമിടുന്നത്.

ഓപ്പോ ഫൈൻഡ് X10 സീരീസിൻ്റെ പെർഫോമൻസ്, ചിപ്പ്സെറ്റ് എന്നിവ സംബന്ധിച്ചു ലീക്കായ വിവരങ്ങൾ:

ടിപ്‌സ്റ്റർ ഡിജിറ്റൽ ചാറ്റ് സ്റ്റേഷന്റെ വെയ്‌ബോ പോസ്റ്റ് അനുസരിച്ച്, ഓപ്പോ ഫൈൻഡ് X10 സീരീസിൽ ഇതുവരെ റിലീസ് ചെയ്തിട്ടില്ലാത്ത മീഡിയടെക് ഡൈമെൻസിറ്റി പ്രോസസ്സറുകൾ ആയിരിക്കാം. ഫൈൻഡ് X10 പ്രോ, ഫൈൻഡ് X10 പ്രോ മാക്സ് എന്നിവയിൽ മീഡിയടെക് ഡൈമെൻസിറ്റി 9600 ചിപ്‌സെറ്റായിരിക്കും എന്നു സൂചനയുണ്ട്. ഈ ചിപ്പ് കട്ടിംഗ്-എഡ്ജ് 2nm പ്രോസസ്സിൽ നിർമ്മിച്ചതാണെന്ന് അഭ്യൂഹമുണ്ട്. അതു സത്യമാണെങ്കിൽ ഇതുവരെയുള്ളതിൽ ഏറ്റവും നൂതനമായ മൊബൈൽ പ്രോസസ്സറുകളിൽ ഒന്നായിരിക്കുമത്.

ഇത് ശരിയാണെങ്കിൽ, 2nm സാങ്കേതികവിദ്യ ഉപയോഗിക്കുന്ന കാര്യത്തിൽ മീഡിയടെക് സാംസങ്ങിനൊപ്പം ചേരും. കാരണം സാംസങ്ങിന്റെ എക്‌സിനോസ് 2600 ആണ് നിലവിൽ 2nm പ്രോസസ്സിൽ നിർമിച്ചതെന്നു സ്ഥിരീകരിക്കപ്പെട്ട ഒരേയൊരു മൊബൈൽ ചിപ്‌സെറ്റ്. അതേസമയം, സ്റ്റാൻഡേർഡ് ഓപ്പോ ഫൈൻഡ് X10-ൽ മീഡിയടെക് ഡൈമെൻസിറ്റി 9500+ ചിപ്‌സെറ്റ് ആയിരിക്കുമെന്നു പറയപ്പെടുന്നു. ഇത് ഫൈൻഡ് X9 സീരീസിൽ ഉപയോഗിക്കുന്ന 3nm പ്രോസസ്സിൽ നിർമിച്ച ഡൈമെൻസിറ്റി 9500 ചിപ്പിനു സമാനമായിരിക്കുമെന്ന് പ്രതീക്ഷിക്കുന്നു.

3nm പ്രോസസിൽ നിർമിച്ച ഡൈമൻസിറ്റി 9500 ചിപ്പിൽ പ്രവർത്തിക്കുന്ന ഓപ്പോ ഫൈൻഡ് X9, ഫൈൻഡ് X9 പ്രോ എന്നിവയുമായി താരതമ്യപ്പെടുത്തുമ്പോൾ, ഫൈൻഡ് X10 ലൈനപ്പിന് വേഗത, പവർ എഫിഷ്യൻസി, AI പെർഫോമൻസ് എന്നിവയിൽ മെച്ചപ്പെടുത്തലുകൾ വാഗ്ദാനം ചെയ്യാൻ കഴിയും. ഇതിലൂടെ മികച്ച ഗെയിമിംഗ്, സുഗമമായ മൾട്ടിടാസ്കിംഗ്, ദീർഘമായ ബാറ്ററി ലൈഫ് എന്നിവ ലഭിക്കും.

ഓപ്പോ ഫൈൻഡ് X10 പ്രോയുടെ ക്യാമറ, മറ്റു സവിശേഷതകൾ:

ക്യാമറ പെർഫോമൻസാണ് ഓപ്പോ കൂടുതൽ ശ്രദ്ധ കേന്ദ്രീകരിക്കുന്ന മറ്റൊരു മേഖല. അടുത്തിടെ പുറത്തുവന്ന ഒരു ലീക്ക് ഓപ്പോ ഫൈൻഡ് X10 പ്രോയുടെ ക്യാമറ സെറ്റപ്പിനെ കുറിച്ചുള്ള സൂചന നൽകി. സ്മാർട്ട്‌ഫോണിൽ ഡ്യുവൽ 200 മെഗാപിക്സൽ റിയർ ക്യാമറ സെറ്റപ്പ് ഉണ്ടാകുമെന്നാണു പ്രതീക്ഷിക്കുന്നത്. ഇതിൽ 1/1.3 ഇഞ്ച് സെൻസറുള്ള 200 മെഗാപിക്സൽ പ്രൈമറി ക്യാമറയും, അതേ 1/1.3 ഇഞ്ച് സെൻസറുള്ള 200 മെഗാപിക്സൽ പെരിസ്കോപ്പ് ടെലിഫോട്ടോ ക്യാമറയും ഉൾപ്പെടുന്നു

അഭ്യൂഹങ്ങൾ കൃത്യമാണെങ്കിൽ, ഹാസൽബ്ലാഡ് ട്യൂൺ ചെയ്ത ട്രിപ്പിൾ ക്യാമറ സിസ്റ്റം ഉൾക്കൊള്ളുന്ന ഫൈൻഡ് X9 പ്രോയെ അപേക്ഷിച്ച് ഇതൊരു പ്രധാന അപ്‌ഗ്രേഡായിരിക്കും. ഫൈൻഡ് X9 പ്രോയുടെ ക്യാമറ സെറ്റപ്പിൽ 50 മെഗാപിക്സൽ സോണി എൽ‌വൈ‌ടി-828 മെയിൻ ക്യാമറ, ഒ‌ഐ‌എസ് ഉള്ള 200 മെഗാപിക്സൽ ടെലിഫോട്ടോ ക്യാമറ, 50 മെഗാപിക്സൽ അൾട്രാ-വൈഡ് ക്യാമറ എന്നിവയാണ് ഉൾപ്പെടുന്നത്.

മെച്ചപ്പെട്ട ലോ-ലൈറ്റ് ഫോട്ടോഗ്രാഫി, മികച്ച സൂമിങ്ങ്, ഉയർന്ന ഇമേജ് ഡീറ്റയിൽസ് എന്നിവ പുതിയ സെൻസറുകൾ നൽകുന്നു. ക്യാമറ ട്യൂണിംഗിനായി ഓപ്പോ ഹാസൽബ്ലാഡുമായുള്ള പങ്കാളിത്തം തുടരാനും സാധ്യതയുണ്ട്. മൊത്തത്തിൽ, പ്രകടനത്തിലും ഫോട്ടോഗ്രാഫിയിലും മെച്ചപ്പെടുത്തലുകൾ ഫൈൻഡ് X10 സീരീസിലുണ്ടാകും. അതിനാൽ ഓപ്പോയിൽ നിന്നും ഏറ്റവും പ്രതീക്ഷയോടെ കാത്തിരിക്കുന്ന ലോഞ്ചുകളിലൊന്നായി ഈ ഫോൺ മാറുന്നു.