വൺപ്ലസ് നോർഡ് CE 6 സീരീസ്: വിലയും വിവരങ്ങളും

വൺപ്ലസ് നോർഡ് CE 6 സ്മാർട്ട്ഫോണും ഒപ്പം പുതിയ നോർഡ് CE 6 ലൈറ്റും (Nord CE 6 Lite) വ്യാഴാഴ്ച ഇന്ത്യയിൽ പുറത്തിറക്കി. നോർഡ് CE 5-ലെ പിൽ ഷേപ്പ് (Pill-shaped) ക്യാമറ ഡിസൈനിൽ നിന്ന് മാറി പുതിയ നോർഡ് CE 6-ൽ ചതുരാകൃതിയിലുള്ള (Square-shaped) ക്യാമറ മോഡ്യൂളാണ് നൽകിയിരിക്കുന്നത്. അതേസമയം, നോർഡ് CE 4 ലൈറ്റിന് ശേഷം പുറത്തിറങ്ങുന്ന ആദ്യത്തെ നോർഡ് CE ലൈറ്റ് മോഡലാണ് നോർഡ് CE 6 ലൈറ്റ്. പുതിയ നോർഡ് CE 6 സ്നാപ്ഡ്രാഗൺ 7 സീരീസ് ചിപ്‌സെറ്റിലാണ് പ്രവർത്തിക്കുന്നത്. എന്നാൽ ലൈറ്റ് മോഡലിൽ മീഡിയടെക് ഡൈമെൻസിറ്റി 7000 സീരീസ് SoC ആണ് ഉൾപ്പെടുത്തിയിരിക്കുന്നത്. 50 മെഗാപിക്സൽ പ്രൈമറി സെൻസറുകൾ നയിക്കുന്ന ഡ്യുവൽ റിയർ ക്യാമറ സംവിധാനമാണ് രണ്ട് സ്മാർട്ട്ഫോണുകളിലുമുള്ളത്.

വൺപ്ലസ് നോർഡ് CE 6, നോർഡ് CE 6 ലൈറ്റ്: ഇന്ത്യയിലെ വിലയും ലഭ്യതയും

ഇന്ത്യയിൽ വൺപ്ലസ് നോർഡ് CE 6-ന്റെ അടിസ്ഥാന മോഡലായ 8GB + 128GB വേരിയന്റിന് 29,999 രൂപയാണ് വില. ഇതിന്റെ 256GB സ്റ്റോറേജ് പതിപ്പിന് 32,999 രൂപയും വരും. മറുഭാഗത്ത്, വൺപ്ലസ് നോർഡ് CE 6 ലൈറ്റ് മോഡലിന്റെ 6GB + 128GB പതിപ്പിന് 20,999 രൂപയും, 8GB + 128GB പതിപ്പിന് 22,999 രൂപയുമാണ് വില നിശ്ചയിച്ചിരിക്കുന്നത്. ഇതിന്റെ ഏറ്റവും ഉയർന്ന 256GB സ്റ്റോറേജ് വേരിയന്റിന് 25,999 രൂപയാകും. എച്ച്ഡിഎഫ്‌സി ബാങ്ക് ക്രെഡിറ്റ് കാർഡ് ഉപയോഗിക്കുന്നവർക്ക് 2,000 രൂപ വരെ ഇൻസ്റ്റന്റ് ഡിസ്‌കൗണ്ടും കമ്പനി വാഗ്ദാനം ചെയ്യുന്നുണ്ട്.

ലഭ്യത: വൺപ്ലസ് നോർഡ് CE 6 മെയ് 8 ഉച്ചയ്ക്ക് 12 മണി മുതൽ ഫ്രഷ് ബ്ലൂ, ലൂണാർ പേൾ, പിച്ച് ബ്ലാക്ക് എന്നീ നിറങ്ങളിൽ വിൽപ്പനയ്ക്കെത്തും. വൺപ്ലസ് നോർഡ് CE 6 ലൈറ്റ് മെയ് 12 ഉച്ചയ്ക്ക് 12 മണി മുതൽ ഹൈപ്പർ ബ്ലാക്ക്, വിവിഡ് മിന്റ് നിറങ്ങളിൽ ലഭ്യമാകും. രണ്ട് ഫോണുകളും ആമസോൺ, വൺപ്ലസ് ഇന്ത്യ ഓൺലൈൻ സ്റ്റോർ എന്നിവ വഴി സ്വന്തമാക്കാം.

വൺപ്ലസ് നോർഡ് CE 6, നോർഡ് CE 6 ലൈറ്റ്: സവിശേഷതകൾ

ആൻഡ്രോയിഡ് 16 അധിഷ്ഠിത ഓക്സിജൻ ഒഎസ് 16-ലാണ് രണ്ട് ഫോണുകളും പ്രവർത്തിക്കുന്നത്. ഇവ രണ്ടും ഡ്യുവൽ സിം സൗകര്യമുള്ളവയാണ്. നോർഡ് CE 6-ൽ 6.78 ഇഞ്ച് 1.5K അമോലെഡ് ഡിസ്‌പ്ലേയാണുള്ളത്. 144Hz റിഫ്രഷ് റേറ്റ്, 3,600 നിറ്റ്സ് പീക്ക് ബ്രൈറ്റ്‌നസ്, ക്രിസ്റ്റൽ ഗാർഡ് പ്രൊട്ടക്ഷൻ എന്നിവ ഇതിന്റെ പ്രത്യേകതയാണ്. മികച്ച ടച്ച് അനുഭവത്തിനായി 3,200Hz ടച്ച് സാമ്പിളിംഗ് റേറ്റ് നൽകുന്ന ഡെഡിക്കേറ്റഡ് ടച്ച് റിഫ്ലെക്സ് ചിപ്പ് ഇതിൽ ഉൾപ്പെടുത്തിയിട്ടുണ്ട്. പൊടിയെയും വെള്ളത്തെയും പ്രതിരോധിക്കുന്നതിനായി IP66, IP68, IP69, IP69K റേറ്റിംഗുകളോടെയാണ് ഈ ഫോൺ എത്തുന്നത്.

വൺപ്ലസ് നോർഡ് CE 6 ലൈറ്റിൽ 6.72 ഇഞ്ച് ഫുൾ എച്ച്ഡി പ്ലസ് എൽസിഡി ഡിസ്‌പ്ലേയാണുള്ളത്. സ്റ്റാൻഡേർഡ് മോഡലിന് സമാനമായ റിഫ്രഷ് റേറ്റും, 1,000 നിറ്റ്‌സ് ബ്രൈറ്റ്‌നസും, 240Hz ടച്ച് സാമ്പിളിംഗ് റേറ്റും ഈ ഫോൺ നൽകുന്നുണ്ട്. ഐപി 64 റേറ്റിംഗിന് പുറമെ മിലിട്ടറി ഗ്രേഡ് സർട്ടിഫിക്കേഷനും (MIL-STD-810H) ഇതിന്റെ സവിശേഷതയാണ്.

സ്നാപ്ഡ്രാഗൺ 7s ജെൻ 4 ചിപ്‌സെറ്റാണ് നോർഡ് CE 6-ന്റെ കരുത്ത്. ഇതിൽ അഡ്രിനോ 810 ജിപിയു, 8GB റാം, 256GB വരെയുള്ള സ്റ്റോറേജ് എന്നിവ ലഭ്യമാണ്. ഫോൺ അമിതമായി ചൂടാകുന്നത് തടയാൻ വലിയ വിസ്തീർണ്ണമുള്ള വേപ്പർ ചേംബർ കൂളിംഗ് സംവിധാനവും ഇതിലുണ്ട്. എന്നാൽ ലൈറ്റ് മോഡലിൽ മീഡിയടെക് ഡൈമെൻസിറ്റി 7400 അപെക്സ് പ്രോസസറാണ് നൽകിയിരിക്കുന്നത്.

ക്യാമറയിലേക്ക് വന്നാൽ, രണ്ട് ഫോണുകളിലും 50 മെഗാപിക്സൽ പ്രൈമറി സെൻസറും 2 മെഗാപിക്സൽ സെക്കൻഡറി സെൻസറും അടങ്ങുന്ന ഡ്യുവൽ ക്യാമറ യൂണിറ്റാണുള്ളത്. ഇവയിൽ 4K വീഡിയോകൾ ചിത്രീകരിക്കാം. സെൽഫിക്കായി നോർഡ് CE 6-ൽ 32 മെഗാപിക്സൽ ക്യാമറയും ലൈറ്റ് മോഡലിൽ 8 മെഗാപിക്സൽ ക്യാമറയും വൺപ്ലസ് ഒരുക്കിയിട്ടുണ്ട്.

വൺപ്ലസ് നോർഡ് CE 6-ൽ 8,000mAh ബിഗ് ബാറ്ററിയാണ് നൽകിയിരിക്കുന്നത്. ഇതിനൊപ്പം 80W വയർഡ് ഫാസ്റ്റ് ചാർജിംഗും 27W റിവേഴ്സ് ചാർജിംഗും ഫോൺ പിന്തുണയ്ക്കും. അതേസമയം, നോർഡ് CE 6 ലൈറ്റിൽ 7,000mAh ബാറ്ററിയും 45W ഫാസ്റ്റ് ചാർജിംഗും 10W റിവേഴ്സ് ചാർജിംഗുമാണുള്ളത്. കണക്റ്റിവിറ്റിക്കായി 5G, 4G LTE, വൈ-ഫൈ, ബ്ലൂടൂത്ത് 5.4, യുഎസ്ബി ടൈപ്പ്-സി, ജിപിഎസ് തുടങ്ങിയ സേവനങ്ങളും ഇരു ഫോണുകളിലും ലഭ്യമാണ്.

സുരക്ഷയ്ക്കായി ഫിംഗർപ്രിന്റ് സ്കാനറും അതോടൊപ്പം ആക്സിലറോമീറ്റർ, കോമ്പസ്, ഗൈറോസ്കോപ്പ് തുടങ്ങിയ സെൻസറുകളും ഇതിലുണ്ട്. നോർഡ് CE 6 ലൈറ്റിന് ഏകദേശം 208 ഗ്രാം ഭാരവും നോർഡ് CE 6-ന് 215 ഗ്രാം ഭാരവുമാണുള്ളത്.