ഇനി പോക്കറ്റ് ചോരും; നതിംഗ് ഫോൺ 3എ ലൈറ്റിന് ഇന്ത്യയിൽ പുതിയ വില

മീഡിയടെക് ഡൈമെൻസിറ്റി 7300 പ്രോ ചിപ്‌സെറ്റുമായി കഴിഞ്ഞ വർഷം നവംബറിലാണ് നതിംഗ് ഫോൺ 3എ ലൈറ്റ് ഇന്ത്യയിൽ പുറത്തിറങ്ങിയത്. രണ്ട് റാം, സ്റ്റോറേജ് വേരിയന്റുകളിൽ ലഭ്യമായ ഈ ഫോണിന്റെ പ്രാരംഭ വില 20,999 രൂപയായിരുന്നു. എന്നാൽ മെമ്മറി ചിപ്പുകളുടെ വില വർധിക്കുന്ന സാഹചര്യത്തിൽ ഈ ഹാൻഡ്‌സെറ്റിന് ഇനി ഇന്ത്യയിൽ വില കൂടുമെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. ഗ്ലിഫ് ലൈറ്റ് ഡിസൈൻ, 33 വാട്ട് വയർഡ് ഫാസ്റ്റ് ചാർജിംഗ് പിന്തുണയുള്ള 5,000 എംഎഎച്ച് ബാറ്ററി എന്നിവയാണ് നതിംഗ് ഫോൺ 3എ ലൈറ്റിന്റെ പ്രധാന സവിശേഷതകൾ.

നതിംഗ് ഫോൺ 3എ ലൈറ്റിന് ഇന്ത്യയിൽ വില കൂടും

നതിംഗ് ഫോൺ 3എ ലൈറ്റിന് ഇന്ത്യയിൽ 3,000 രൂപ വർധിപ്പിക്കാൻ കമ്പനി ഒരുങ്ങുന്നതായി ടിപ്‌സ്റ്റർ സഞ്ജു ചൗധരി അവകാശപ്പെടുന്നു. തിങ്കളാഴ്ച മുതൽ വില വർധനവ് ഉണ്ടായേക്കുമെന്നും നിലവിലുള്ള സ്റ്റോക്ക് വിറ്റഴിയുന്നതോടെ പുതിയ നിരക്കുകൾ പ്രാബല്യത്തിൽ വരുമെന്നുമാണ് സൂചന. പുതിയ റിപ്പോർട്ടുകൾ പ്രകാരം 8ജിബി റാം + 128ജിബി സ്റ്റോറേജ് മോഡലിന് 24,999 രൂപയും 256ജിബി സ്റ്റോറേജ് മോഡലിന് 26,999 രൂപയുമാകും വില. എന്നാൽ നിലവിൽ തന്നെ ഫോണിന്റെ വിലയിൽ ലോഞ്ച് വിലയെക്കാൾ 1,000 രൂപയുടെ വർധനവ് ഉണ്ടായിട്ടുണ്ട്.

കഴിഞ്ഞ വർഷം നവംബറിലാണ് നതിംഗ് ഫോൺ 3എ ലൈറ്റ് പുറത്തിറങ്ങിയത്. ബേസ് വേരിയന്റിന് 20,999 രൂപയും 256ജിബി സ്റ്റോറേജ് പതിപ്പിന് 22,999 രൂപയുമായിരുന്നു ലോഞ്ച് സമയത്തെ വില. എന്നാൽ നിലവിൽ ഫ്ലിപ്പ്കാർട്ടിൽ 128ജിബി മോഡലിന് 21,999 രൂപയും 256ജിബി മോഡലിന് 23,999 രൂപയുമാണ് രേഖപ്പെടുത്തിയിരിക്കുന്നത്.

മെമ്മറി ചിപ്പുകൾക്കുണ്ടാകുന്ന വിലവർധനവാണ് ഫോണിന്റെ വില കൂട്ടാൻ കാരണമെന്നാണ് റിപ്പോർട്ട്. നിലവിലുള്ള സ്റ്റോക്ക് തീരുന്നത് വരെ മാത്രമേ പഴയ വില തുടരുകയുള്ളൂവെന്നും പുതിയ സ്റ്റോക്ക് എത്തുന്നതോടെ പുതുക്കിയ ഉയർന്ന നിരക്കുകൾ പ്രാബല്യത്തിൽ വരുമെന്നും ഒരു റീട്ടെയിലർ സന്ദേശത്തെ ഉദ്ധരിച്ച് ടിപ്‌സ്റ്റർ വ്യക്തമാക്കുന്നു.

നതിംഗ് ഫോൺ 3എ ലൈറ്റിന്റെ സവിശേഷതകൾ

120 ഹെർട്സ് റിഫ്രഷ് റേറ്റും 3,000 നിറ്റ്സ് പീക്ക് ബ്രൈറ്റ്‌നസ്സുമുള്ള 6.77 ഇഞ്ച് ഫുൾ എച്ച്ഡി പ്ലസ് ഫ്ലെക്സിബിൾ അമോലെഡ് സ്ക്രീനാണ് നതിംഗ് ഫോൺ 3എ ലൈറ്റിലുള്ളത്. മീഡിയടെക് ഡൈമെൻസിറ്റി 7300 പ്രോ ചിപ്‌സെറ്റിൽ പ്രവർത്തിക്കുന്ന ഈ ഫോണിന്റെ പിന്നിൽ ഗ്ലിഫ് ലൈറ്റ് ഡിസൈൻ നൽകിയിരിക്കുന്നു. 50 മെഗാപിക്സൽ പ്രൈമറി ക്യാമറ, 8 മെഗാപിക്സൽ അൾട്രാ വൈഡ് ആംഗിൾ ലെൻസ്, മൂന്നാമതൊരു സെൻസർ എന്നിവയടങ്ങുന്ന ട്രിപ്പിൾ റിയർ ക്യാമറ യൂണിറ്റാണ് ഇതിലുള്ളത്. സെൽഫികൾക്കും വീഡിയോ കോളുകൾക്കുമായി 16 മെഗാപിക്സൽ ഫ്രണ്ട് ക്യാമറയും ഫോണിലുണ്ട്.

നതിംഗ് ഫോൺ 3എ ലൈറ്റിന് പൊടിയിൽ നിന്നും വെള്ളത്തുള്ളികളിൽ നിന്നും സംരക്ഷണം നൽകുന്ന ഐപി54 റേറ്റിംഗ് ഉണ്ട്. 33 വാട്ട് വയർഡ് ഫാസ്റ്റ് ചാർജിംഗ് പിന്തുണയുള്ള 5,000 എംഎഎച്ച് ബാറ്ററിയാണ് ഇതിൽ ഉൾപ്പെടുത്തിയിരിക്കുന്നത്.