സാധാരണക്കാർക്കു വേണ്ടിയൊരു അസാധാരണ ഫോൺ; ലാവ യുവ സ്റ്റാർ 3 ഇന്ത്യൻ വിപണിയിലെത്തി

താങ്ങാവുന്ന വിലയിൽ മികച്ച സ്മാർട്ട്ഫോണുകൾ പുറത്തിറക്കുന്ന ഇന്ത്യൻ ബ്രാൻഡായ ലാവ അവരുടെ ഇന്ത്യയിലെ ബജറ്റ് സ്മാർട്ട്‌ഫോൺ പോർട്ട്‌ഫോളിയോ വിപുലീകരിച്ച് ലാവ യുവ സ്റ്റാർ 3 ലോഞ്ച് ചെയ്തു. വലിയ ഡിസ്‌പ്ലേ, മികച്ച ബാറ്ററി ലൈഫ്, താങ്ങാവുന്ന വിലയിൽ മികച്ച ക്യാമറ സവിശേഷതകൾ എന്നിവയുള്ള എൻട്രി ലെവൽ ഫോൺ ആഗ്രഹിക്കുന്ന ഉപയോക്താക്കളെ ലക്ഷ്യമിട്ടാണ് പുതിയ ഹാൻഡ്‌സെറ്റ് എത്തുന്നത്. കഴിഞ്ഞ വർഷം മെയ് മാസത്തിൽ അവതരിപ്പിച്ച ലാവ യുവ സ്റ്റാർ 2-ന്റെ പിൻഗാമിയായാണ് ഈ ഫോൺ വരുന്നത്. 90Hz ഡിസ്‌പ്ലേ, ആൻഡ്രോയിഡ് 15 ഗോ എഡിഷൻ, പൊടിയെയും വെള്ളത്തുള്ളികളെയും പ്രതിരോധിക്കാനുള്ള IP64 റേറ്റിംഗ് തുടങ്ങിയ പ്രായോഗിക സവിശേഷതകൾ വാഗ്ദാനം ചെയ്യുന്ന, 8,000 രൂപയിൽ താഴെ വിലയുള്ള സ്മാർട്ട്ഫോണാണ് ലാവ യുവ സ്റ്റാർ 3. സ്മാർട്ട്‌ഫോണിന് യൂണിസോക്ക് പ്രോസസർ കരുത്തു നൽകുന്നു, കൂടാതെ 5,000mAh ബാറ്ററിയും ഇതിലുണ്ട്. ഒരു വർഷത്തെ വാറണ്ടിയും ഡോർ സ്റ്റെപ്പ് ആഫ്റ്റർ സെയിൽ സർവീസും ലാവ നൽകുന്നുണ്ട്.

ലാവ യുവ സ്റ്റാർ 3-യുടെ ഇന്ത്യയിലെ വിലയും ലഭ്യതയും:

ലാവ യുവ സ്റ്റാർ 3-യുടെ ഇന്ത്യയിലെ വില 7,499 രൂപയാണ്. 4 ജിബി റാമും 64 ജിബി ഇന്റേണൽ സ്റ്റോറേജുമുള്ള സിംഗിൾ വേരിയന്റിലാണ് ഇത് വരുന്നത്. ഇൻഡസ് ബ്ലാക്ക്, സിയാച്ചിൻ വൈറ്റ് എന്നീ രണ്ട് കളർ ഓപ്ഷനുകളിൽ ഫോൺ ലഭ്യമാകും. മാർച്ച് മുതൽ രാജ്യത്തുടനീളമുള്ള ഓഫ്‌ലൈൻ റീട്ടെയിൽ സ്റ്റോറുകൾ വഴി ഹാൻഡ്‌സെറ്റ് വിൽപ്പനയ്‌ക്കെത്തുമെന്ന് ലാവ സ്ഥിരീകരിച്ചു.

ഫോണിന് ഒരു വർഷത്തെ വാറണ്ടിയും കമ്പനി വാഗ്ദാനം ചെയ്യുന്നു. കൂടാതെ, ഉപഭോക്താക്കൾക്ക് അവരുടെ വാതിൽപ്പടിയിൽ ആഫ്റ്റർ സെയിൽ സർവീസും കമ്പനി വാഗ്ദാനം ചെയ്യുന്നു. അതായത് ഫോൺ ശരിയാക്കാൻ സർവീസ് സെന്റർ സന്ദർശിക്കേണ്ട കാര്യമില്ല. ലാവയുടെ ടെക്നീഷ്യൻസ് വീട്ടിലെത്തി അറ്റകുറ്റപ്പണികൾ ചെയ്തു തരും. ബജറ്റ് വിഭാഗത്തിലുള്ള ഫോൺ വാങ്ങുന്നവരെ സംബന്ധിച്ച് ഇതൊരു പ്രധാന നേട്ടമാണ്.

ലാവ യുവ സ്റ്റാർ 3-യുടെ പ്രധാന സവിശേഷതകൾ:

ഡ്യുവൽ സിം ലാവ യുവ സ്റ്റാർ 3 ആൻഡ്രോയിഡ് 15 ഗോ എഡിഷനിലാണ് പ്രവർത്തിക്കുന്നത്, ഇത് മിതമായ ഹാർഡ്‌വെയറുള്ള എൻട്രി ലെവൽ സ്മാർട്ട്‌ഫോണുകൾക്കായി രൂപകൽപ്പന ചെയ്‌തിരിക്കുന്ന ഓപ്പറേറ്റിങ്ങ് സിസ്റ്റമാണ്. 720x1,600 പിക്‌സൽ റെസല്യൂഷനുള്ള 6.75 ഇഞ്ച് HD+ ഡിസ്‌പ്ലേയാണ് ഇതിനുള്ളത്. സ്‌ക്രീൻ 90Hz റീഫ്രഷ് റേറ്റിനെ പിന്തുണയ്ക്കുന്നു, കൂടാതെ 20:9 ആസ്പക്റ്റ് റേഷ്യോയുമുണ്ട്.

ഹൂഡിന് കീഴിൽ, സ്മാർട്ട്‌ഫോണിന് കരുത്ത് പകരുന്നത് ഒക്ടാ-കോർ യൂണിസോക്ക് SC9863A പ്രോസസറാണ്. ഇത് 4GB റാമും 64GB ഇന്റേണൽ സ്റ്റോറേജുമായി ജോടിയാക്കിയിരിക്കുന്നു. ഉപയോഗിക്കാത്ത സ്റ്റോറേജ് സ്‌പെയ്‌സ് ഉപയോഗിച്ച് റാം 8GB വരെ വികസിപ്പിക്കാൻ കഴിയും. ബ്രൗസിംഗ്, സോഷ്യൽ മീഡിയ തുടങ്ങിയ അടിസ്ഥാന ജോലികൾക്കും മൾട്ടിടാസ്കിംഗ് പെർഫോമൻസ് മെച്ചപ്പെടുത്താനും ഇത് സഹായിക്കും.

ഫോട്ടോഗ്രാഫിക്ക്, ഫോണിൽ Al പിന്തുണയുള്ള 13 മെഗാപിക്സൽ റിയർ ക്യാമറയുണ്ട്.

മുൻവശത്ത്, സെൽഫികൾക്കും വീഡിയോ കോളുകൾക്കുമായി 5 മെഗാപിക്സൽ ക്യാമറയുമുണ്ട്. വെള്ളം, പൊടി എന്നിവയിൽ നിന്നുള്ള സംരക്ഷണത്തിനായി IP64 റേറ്റിംഗോടെയാണ് ഈ ഫോൺ വരുന്നത്.

കണക്ടിവിറ്റിയുടെ കാര്യത്തിൽ, ലാവ യുവ സ്റ്റാർ 3 ബ്ലൂടൂത്ത് 4.2, വൈ-ഫൈ, 3.5mm ഹെഡ്‌ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവയെ പിന്തുണയ്ക്കുന്നു.

സുരക്ഷയ്ക്കും വേഗത്തിലുള്ള അൺലോക്കിംഗിനുമായി സൈഡ്-മൗണ്ടഡ് ഫിംഗർപ്രിന്റ് സെൻസറും ഇതിലുണ്ട്.

10W ചാർജിംഗിനുള്ള പിന്തുണയുള്ള 5,000mAh ബാറ്ററിയാണ് ഈ

സ്മാർട്ട്‌ഫോണിലുള്ളത്. ഒറ്റ ചാർജിൽ 30 മണിക്കൂർ വരെ ടോക്ക് ടൈമും 340 മണിക്കൂർ വരെ സ്റ്റാൻഡ്‌ബൈ സമയവും നൽകാൻ ബാറ്ററിക്ക് കഴിയുമെന്ന് ലാവ അവകാശപ്പെടുന്നു. 164.9 x 76.1 x 8.5mm വലിപ്പവും 193.7 ഗ്രാം ഭാരവുമുള്ളതാണ് ലാവയുടെ പുതിയ ഫോൺ.