6,799 രൂപയ്ക്കൊരു അത്ഭുതം; മിലിറ്ററി ഗ്രേഡ് കരുത്തുമായി ഐടെൽ A100 4G ഇന്ത്യയിൽ ലോഞ്ച് ചെയ്തു

താങ്ങാനാവുന്ന വിലയിൽ മികച്ചതും കരുത്തുറ്റതുമായ ഒരു ഫോൺ ആഗ്രഹിക്കുന്ന ഉപയോക്താക്കളെ ലക്ഷ്യമിട്ട് ഐടെൽ പുതിയൊരു ബജറ്റ് സ്മാർട്ട്‌ഫോൺ ഇന്ത്യയിൽ പുറത്തിറക്കി. എൻട്രി ലെവൽ സെഗ്‌മെന്റിലാണ് ഇതിൻ്റെ വിലയെങ്കിലും, വൺപ്ലസ് 13s പോലുള്ള പ്രീമിയം സ്മാർട്ട്‌ഫോണുകളോട് സാമ്യമുള്ള ആധുനിക ഡിസൈനുമായാണ് ഹാൻഡ്‌സെറ്റ് വരുന്നത്. ഈ ലോഞ്ചിലൂടെ, ഇന്ത്യയിലെ ബജറ്റ് 4G സ്മാർട്ട്‌ഫോൺ വിപണിയിൽ തങ്ങളുടെ സാന്നിധ്യം ശക്തിപ്പെടുത്തുകയാണ് ഐടെൽ ലക്ഷ്യമിടുന്നത്. ഐടെൽ A100 4G-യുടെ പ്രധാന ആകർഷണങ്ങളിലൊന്ന് അതിന്റെ ഈട് ആണ്. ഈ വിലയിൽ അപൂർവമായ മിലിറ്ററി-ഗ്രേഡ് ഡ്യൂറബിലിറ്റി സ്റ്റാൻഡേർഡ്സ് ഈ ഫോൺ പാലിക്കുന്നുണ്ടെന്ന് കമ്പനി അവകാശപ്പെടുന്നു. ഉയർന്ന റിഫ്രഷ് റേറ്റുള്ള ഒരു വലിയ ഡിസ്‌പ്ലേ, ആൻഡ്രോയിഡ് 15 അധിഷ്ഠിത ഓപ്പറേറ്റിംഗ് സിസ്റ്റം, ദീർഘകാലം നിലനിൽക്കുന്ന ബാറ്ററി എന്നിവയും ഫോൺ വാഗ്ദാനം ചെയ്യുന്നു. ഫോൺ യൂണിസോക് ചിപ്‌സെറ്റ് ഉപയോഗിച്ചാണ് പ്രവർത്തിക്കുന്നത്, മികച്ച മൾട്ടിടാസ്കിംഗിനായി വെർച്വൽ റാം എക്സ്റ്റെൻഷനെ ഇതു പിന്തുണയ്ക്കുന്നു. ഇന്ത്യയിലെ സാധാരണക്കാരെ ആകർഷിക്കുന്ന ഒരു ഫോണായിരിക്കും ഐടെൽ A100 4G.

ഐടെൽ A100 4G-യുടെ ഇന്ത്യയിലെ വിലയും ലഭ്യതയും:

ഐടെൽ A100 5G-യുടെ 3GB റാമും 64GB സ്റ്റോറേജുമുള്ള വേരിയന്റിന് ഇന്ത്യയിലെ വില 6,799 രൂപയിൽ ആരംഭിക്കുന്നു. 4GB റാം വേരിയന്റിലും സ്മാർട്ട്‌ഫോൺ ലഭ്യമാണ്, അതിന്റെ വില 7,499 രൂപയാണ്. രണ്ട് വേരിയന്റുകളും ഒരേ സ്റ്റോറേജ് കപ്പാസിറ്റിയാണ് വാഗ്ദാനം ചെയ്യുന്നത്.

സിൽക്ക് ഗ്രീൻ, പ്യുവർ ബ്ലാക്ക്, ടൈറ്റാനിയം ഗോൾഡ് എന്നീ മൂന്ന് നിറങ്ങളിൽ ഐടെൽ A100 4G സ്മാർട്ട്‌ഫോൺ ഇന്ത്യയിൽ വാഗ്ദാനം ചെയ്യുന്നു. രാജ്യത്തുടനീളവുള്ള ഓഫ്‌ലൈൻ റീട്ടെയിൽ സ്റ്റോറുകൾ വഴി ഈ ഫോൺ വാങ്ങാം. ഫിസിക്കൽ സ്റ്റോറുകളിൽ നിന്ന് ഫോണുകൾ വാങ്ങാൻ ഇഷ്ടപ്പെടുന്ന ഉപഭോക്താക്കൾക്കും ഈ ഫോൺ എളുപ്പത്തിൽ ആക്‌സസ് ചെയ്യാൻ കഴിയും.

അധിക ആനുകൂല്യമെന്ന നിലയിൽ, വാങ്ങി 100 ദിവസത്തിനുള്ളിൽ ഫ്രീ സ്ക്രീൻ റീപ്ലേസ്മെൻ്റ് ഐടെൽ നൽകുന്നുണ്ട്. ബജറ്റ് വിഭാഗത്തിൽ സ്‌ക്രീൻ കേടുപാടുകൾ ഒരു പൊതുവായ ആശങ്കയാണെന്നിരിക്കെ ഈ ഓഫർ വളരെ ഉപയോഗപ്രദമാണ്. ആർക്കും താങ്ങാനാവുന്ന വിലയും മികച്ച സവിശേഷതകളും നൽകുന്നതോടെ സാധാരണക്കാർക്ക് മേധാവിത്വമുള്ള ഇന്ത്യൻ വിപണിയിൽ ശക്തമായ സ്വാധീനം ചെലുത്തുകയാണ് ഐടെല്ലിൻ്റെ ലക്ഷ്യം.

ഐടെൽ A100 4G-യുടെ പ്രധാന സവിശേഷതകൾ:

ഡ്യുവൽ സിം സ്മാർട്ട്ഫോണായ ഐടെൽ A100 4G, ആൻഡ്രോയിഡ് 15 അടിസ്ഥാനമാക്കിയുള്ള ഐടെൽ OS 15-ലാണ് പ്രവർത്തിക്കുന്നത്. 720 x 1,612 പിക്സൽ റെസല്യൂഷനുള്ള 6.6 ഇഞ്ച് HD+ IPS LCD ഡിസ്പ്ലേയാണ് ഇതിനുള്ളത്. സ്ക്രീൻ 90Hz റിഫ്രഷ് റേറ്റ്, 180Hz ടച്ച് സാമ്പിൾ റേറ്റ്, 269ppi പിക്സൽ ഡെൻസിറ്റി എന്നിവ പിന്തുണയ്ക്കുന്നു.

4GB വരെ റാമും 64GB ഇന്റേണൽ സ്റ്റോറേജുമായി ജോടിയാക്കിയ ഒക്ടാ-കോർ യൂണിസോക് T7100 ചിപ്‌സെറ്റാണ് ഈ സ്മാർട്ട്‌ഫോണിന് കരുത്ത് പകരുന്നത്. മൾട്ടിടാസ്കിംഗ് പെർഫോമൻസ് മെച്ചപ്പെടുത്താൻ സഹായിക്കുന്ന 8GB വരെയുള്ള വെർച്വൽ റാമിനെയും ഇത് പിന്തുണയ്ക്കുന്നു.

ക്യാമറകളുടെ കാര്യത്തിൽ, ഐടെൽ A100 4G-യിൽ LED ഫ്ലാഷോടുകൂടിയ 8 മെഗാപിക്സൽ റിയർ ക്യാമറയും സെൽഫികൾക്കും വീഡിയോ കോളുകൾക്കുമായി 5 മെഗാപിക്സൽ ഫ്രണ്ട് ക്യാമറയും ഉണ്ട്. 4G LTE, Wi-Fi, ബ്ലൂടൂത്ത്, GPS, 3.5mm ഹെഡ്‌ഫോൺ ജാക്ക്, IR ബ്ലാസ്റ്റർ, USB ടൈപ്പ്-സി പോർട്ട് എന്നിവയാണ് കണക്റ്റിവിറ്റി ഓപ്ഷനുകൾ.

നെറ്റ്‌വർക്ക് കവറേജ് ഇല്ലാത്ത പ്രദേശങ്ങളിൽ പോലും ഐടെൽ ഉപയോക്താക്കൾക്കു പരസ്പരം കോളുകൾ ചെയ്യാൻ അനുവദിക്കുന്ന അൾട്രാലിങ്ക് ഫീച്ചറും ഈ ഫോണിൽ ഉൾപ്പെടുന്നു. ഈടിൻ്റെ കാര്യത്തിൽ ഇത് IPX4 സ്പ്ലാഷ് റെസിസ്റ്റൻസും MIL-STD-810H സർട്ടിഫിക്കേഷനും വാഗ്ദാനം ചെയ്യുന്നു. 10W വയർഡ് ചാർജിംഗ് പിന്തുണയുള്ള 5,000mAh ബാറ്ററിയാണ് ഈ ഫോണിലുള്ളത്.