വമ്പൻ വിലക്കുറവിൽ ഐഫോൺ എയർ സ്വന്തമാക്കാം; റിലയൻസ് ഡിജിറ്റൽ ബ്ലാക്ക് ഫ്രൈഡേ സെയിലിൽ മികച്ച ഓഫറുകൾ

ഈ വർഷത്തെ ആപ്പിളിൻ്റെ പ്രധാന ലോഞ്ചിങ്ങ് ഇവൻ്റിൽ ഐഫോൺ 17 ലൈനപ്പിനൊപ്പം ഐഫോൺ എയറും അവതരിപ്പിച്ചിരുന്നു. കമ്പനി ഇതുവരെ നിർമ്മിച്ചതിൽ വച്ച് ഏറ്റവും കനം കുറഞ്ഞതും ഭാരം കുറഞ്ഞതുമായ ഐഫോൺ എന്നതിനാൽ ഇതു വളരെയധികം ശ്രദ്ധിക്കപ്പെട്ടിരുന്നു. ഇത്രയും കനം കുറഞ്ഞ ഡിസൈനിൽ ആപ്പിൾ എങ്ങനെ ശക്തമായ പെർഫോമൻസ് നൽകുമെന്ന് കാര്യത്തിൽ പലർക്കും ആകാംക്ഷയുണ്ടായിരുന്നു. എന്നാൽ ഐഫോൺ എയറിന് ഉപഭോക്താക്കൾക്കിടയിൽ ശക്തമായ സ്വാധീനം ചെലുത്താൻ കഴിഞ്ഞില്ലെന്നാണു റിപ്പോർട്ടുകൾ പറയുന്നത്. എന്തായാലും ഐഫോൺ എയർ വിലക്കുറവിൽ സ്വന്തമാക്കാനുള്ള ഒരു അവസരം ഇപ്പോൾ വന്നിട്ടുണ്ട്. ഈ ഫോൺ പുറത്തിറക്കിയ സമയത്ത്, 256 ജിബി സ്റ്റോറേജുള്ള അടിസ്ഥാന മോഡലിന് 1,19,900 രൂപയായിരുന്നു വില. എന്നാൽ ഇപ്പോൾ, റിലയൻസ് ഡിജിറ്റലിന്റെ ബ്ലാക്ക് ഫ്രൈഡേ സെയിലിൽ ഫോൺ ഡിസ്കൗണ്ട് വിലയ്ക്ക് ലഭ്യമാണ്. 13,000 രൂപ വരെ ലാഭമുണ്ടാക്കാൻ നിങ്ങൾക്കു കഴിയും. ഓഫർ കുറഞ്ഞ സമയത്തേക്ക് മാത്രമേ ലഭ്യമാകൂ എന്നത് ആപ്പിൾ, ഐഫോൺ പ്രേമികൾ പ്രത്യേകം ശ്രദ്ധിക്കുക.

റിലയൻസ് ഡിജിറ്റലിന്റെ ബ്ലാക്ക് ഫ്രൈഡേ സെയിലിൽ ഐഫോൺ എയറിന് വമ്പൻ ഓഫർ:

ഈ വർഷത്തെ ബ്ലാക്ക് ഫ്രൈഡേ സെയിലിൽ, ഐഫോൺ എയറിന് പ്രത്യേക ഡിസ്‌കൗണ്ട് റിലയൻസ് ഡിജിറ്റൽ വാഗ്ദാനം ചെയ്യുന്നു. ഫോണിന്റെ 256 ജിബി പതിപ്പ് നിലവിൽ 1,09,990 രൂപയ്ക്ക് ലഭ്യമാണ്. ഇതിൻ്റെ സാധാരണ വിലയായ 1,19,900 രൂപയെ അപേക്ഷിച്ച് ഏകദേശം 10,000 രൂപ കുറവിലാണ് ഇപ്പോൾ വിൽക്കപ്പെടുന്നത്. 512 ജിബി മോഡലിനും ശ്രദ്ധേയമായ വിലക്കുറവ് ലഭിക്കുന്നു. ഇത് 1,28,990 രൂപയിലാണ് ലിസ്റ്റ് ചെയ്തിരിക്കുന്നത്. 1,39,900 രൂപയെന്ന ലോഞ്ച് വിലയുമായി താരതമ്യം ചെയ്യുമ്പോൾ വാങ്ങുന്നവർക്ക് ഏകദേശം 11,000 രൂപയുടെ കിഴിവ് ലഭിക്കും.

ഏറ്റവും വലിയ കിഴിവ് ടോപ്പ്-എൻഡ് 1TB സ്റ്റോറേജ് വേരിയന്റിലാണ്. ഈ മോഡൽ 1,46,990 രൂപയ്ക്കാണു വിൽക്കുന്നത്. ഇത് അതിന്റെ സാധാരണ വിലയായ 1,59,900 രൂപയെ വെച്ചു നോക്കുമ്പോൾ 13,000 രൂപയോളം കുറവാണ്. കുറഞ്ഞ വിലയ്ക്ക് ഐഫോൺ എയറിന്റെ വിവിധ സ്റ്റോറേജ് വേരിയൻ്റുകൾ വാങ്ങാൻ ഈ ഓഫറുകൾ ഉപഭോക്താക്കൾക്ക് അവസരം നൽകുന്നു.

ഐഫോൺ എയറിൻ്റെ കളർ ഓപ്ഷൻസും സവിശേഷതകളും:

ഐഫോൺ എയർ ക്ലൗഡ് വൈറ്റ്, ലൈറ്റ് ഗോൾഡ്, സ്കൈ ബ്ലൂ, സ്പേസ് ബ്ലാക്ക് എന്നിങ്ങനെ നാലു നിറങ്ങളിൽ ലഭ്യമാണ്. ഇതുവരെ നിർമ്മിച്ചതിൽ വച്ച് ഏറ്റവും കനം കുറഞ്ഞ ഐഫോൺ ഇതാണെന്ന് ആപ്പിൾ പറയുന്നു, വെറും 5.6 മില്ലീമീറ്റർ കനവും 165 ഗ്രാം ഭാരവും മാത്രമേ ഇതിനുള്ളൂ. ഫോണിനെ കൂടുതൽ ശക്തമാക്കുന്നതിന് മുന്നിലും പിന്നിലും സെറാമിക് ഷീൽഡ് 2 പ്രൊട്ടക്ഷൻ ഉപയോഗിക്കുന്നു.

ഐഫോൺ എയർ eSIM-ൽ മാത്രമേ ഉപയോഗിക്കാൻ കഴിയൂ. iOS 26-ൽ പ്രവർത്തിക്കുന്ന ഫോണിൽ 120Hz വരെ റിഫ്രഷ് റേറ്റ്, 3,000nits പീക്ക് ബ്രൈറ്റ്‌നസ്, പ്രോമോഷൻ ടെക്നോളജി എന്നിവയെ പിന്തുണയ്ക്കുന്ന 6.5 ഇഞ്ച് സൂപ്പർ റെറ്റിന XDR OLED ഡിസ്‌പ്ലേയാണുള്ളത്. ആറ് കോർ CPU, അഞ്ച് കോർ GPU, 16 കോർ ന്യൂറൽ എഞ്ചിൻ എന്നിവ ഉൾപ്പെടുന്ന ബിന്ന്ഡ് A19 പ്രോ ചിപ്പാണ് ഈ ഉപകരണത്തിന് കരുത്ത് പകരുന്നത്. സെക്കൻഡ് ജനറേഷൻ ഡൈനാമിക് കാഷിംഗ്, ആപ്പിൾ ഇന്റലിജൻസ് സവിശേഷതകളെയും ഇത് പിന്തുണയ്ക്കുന്നു.

സെൻസർ-ഷിഫ്റ്റ് OIS, 2X ടെലിഫോട്ടോ എന്നിവയുള്ള 48 മെഗാപിക്സൽ ഫ്യൂഷൻ മെയിൻ ക്യാമറയാണ് ഐഫോൺ എയറിനുള്ളത്. മുൻവശത്ത്, ഐഫോൺ 17 ലൈനപ്പിന് സമാനമായ 18 മെഗാപിക്സൽ സെന്റർ സ്റ്റേജ് ക്യാമറയും ഇതിലുണ്ട്. കണക്റ്റിവിറ്റിക്കായി, വൈ-ഫൈ 7, ബ്ലൂടൂത്ത് 6 എന്നിവയ്‌ക്കായുള്ള ആപ്പിളിന്റെ പുതിയ N1 ചിപ്പും, വേഗതയേറിയ നെറ്റ്‌വർക്ക് പെർഫോമൻസിനായി ഒരു C1X മോഡവും ഇതിൽ ഉൾപ്പെടുന്നു. ബാറ്ററി ദിവസം മുഴുവൻ നീണ്ടുനിൽക്കുമെന്നും, 27 മണിക്കൂർ വരെ വീഡിയോ പ്ലേബാക്കും 30 മിനിറ്റിനുള്ളിൽ 50% ചാർജിങ്ങും വാഗ്ദാനം ചെയ്യുമെന്നും ആപ്പിൾ അവകാശപ്പെടുന്നു.