ഐഒഎസ് 26.5 പുതിയ വേർഷൻ എത്തി; ഐഫോണിൽ ഇനി വലിയ മാറ്റങ്ങൾ

ഐഫോണും ആൻഡ്രോയിഡും തമ്മിലുള്ള സന്ദേശങ്ങൾ കൂടുതൽ സുരക്ഷിതമാക്കുന്ന ആർസിഎസ് (RCS) മെസേജിംഗ് ഫീച്ചർ ആപ്പിൾ വീണ്ടും പരീക്ഷിക്കുന്നു. നിലവിലുള്ള ഐഒഎസ് 26.4 പതിപ്പിൽ ഈ ഫീച്ചർ പ്രതീക്ഷിച്ചിരുന്നെങ്കിലും സ്റ്റേബിൾ വേർഷനിൽ ഇത് ലഭ്യമായിരുന്നില്ല. എന്നാൽ ഇപ്പോൾ പുറത്തിറക്കിയ ഐഒഎസ് 26.5 ബീറ്റാ പതിപ്പിൽ എൻഡ്-ടു-എൻഡ് എൻക്രിപ്ഷനോട് കൂടിയ ആർസിഎസ് ഫീച്ചർ ഡെവലപ്പർമാർക്കായി ആപ്പിൾ തിരികെ കൊണ്ടുവന്നിരിക്കുകയാണ്. വൈകാതെ തന്നെ എല്ലാ ഐഫോൺ ഉപഭോക്താക്കൾക്കും ഈ സേവനം ലഭ്യമായേക്കും.

ഐഒഎസ് 26.5 ബീറ്റാ പതിപ്പ് പുറത്തിറങ്ങി; ആപ്പിൾ മാപ്‌സിൽ പുതിയ മാറ്റങ്ങൾ

ഐഒഎസ് 26.5 അപ്‌ഡേറ്റിന്റെ ആദ്യ ബീറ്റാ പതിപ്പിനൊപ്പം ഐപാഡ് ഒഎസ് 26.5 ബീറ്റാ വണ്ണും ആപ്പിൾ പുറത്തിറക്കി. പുതിയ പതിപ്പിലെ മാറ്റങ്ങളെക്കുറിച്ചുള്ള വിവരങ്ങളും കമ്പനി പങ്കുവെച്ചിട്ടുണ്ട്. നിലവിൽ ആപ്പിളിന്റെ ബീറ്റാ പ്രോഗ്രാമിൽ രജിസ്റ്റർ ചെയ്തവർക്കും ഡെവലപ്പർമാർക്കുമാണ് ഈ അപ്‌ഡേറ്റ് ലഭ്യമാകുന്നത്.

ഐഒഎസ് 26.5 എല്ലാവരിലേക്കും എത്തുന്നതിന് മുൻപായി പുതിയ ഫീച്ചറുകൾ നേരിട്ട് പരീക്ഷിക്കാനും അതിലെ പിഴവുകൾ ആപ്പിളിനെ അറിയിക്കാനും ഈ ബീറ്റാ പതിപ്പിലൂടെ സാധിക്കും. ആപ്പിൾ മാപ്‌സിൽ 'സജസ്റ്റഡ് പ്ലേസസ്' ഉൾപ്പെടെയുള്ള ഫീച്ചറുകൾ ഈ പുതിയ അപ്‌ഡേറ്റിൽ ലഭ്യമാണ്.

മാക് റൂമേഴ്സിന്റെ റിപ്പോർട്ട് പ്രകാരം ആപ്പിൾ മാപ്‌സിൽ നിരവധി പുതിയ മാറ്റങ്ങളാണ് ഐഒഎസ് 26.5 ബീറ്റാ പതിപ്പ് കൊണ്ടുവരുന്നത്. ഇതിൽ ഏറ്റവും പ്രധാനപ്പെട്ടത് 'സജസ്റ്റഡ് പ്ലേസസ്' എന്ന ഫീച്ചറാണ്. ഉപഭോക്താക്കൾക്ക് അവരുടെ ലൊക്കേഷന് അടുത്തുള്ള ട്രെൻഡിംഗ് സ്ഥലങ്ങൾ ഈ ഫീച്ചറിലൂടെ നിർദ്ദേശിക്കപ്പെടും.

കൂടാതെ, പഴയ സെർച്ചുകളെ അടിസ്ഥാനമാക്കിയുള്ള നിർദ്ദേശങ്ങളും മാപ്‌സിൽ കാണാൻ സാധിക്കും. ഭാവിയിൽ ആപ്പിൾ മാപ്‌സിൽ വരാനിരിക്കുന്ന 'സെർച്ച് അഡ്‌വെർട്ടൈസ്‌മെന്റുകൾ'ക്കുള്ള മുന്നോടിയായാണ് ഈ മാറ്റങ്ങൾ വിലയിരുത്തപ്പെടുന്നത്. ഇതുവഴി പ്രാദേശിക സ്ഥാപനങ്ങൾക്ക് മാപ്‌സിൽ പരസ്യം നൽകാൻ അവസരം ലഭിച്ചേക്കും. ഇത്തരത്തിൽ കാണിക്കുന്ന പരസ്യങ്ങളിൽ പ്രത്യേക ലേബലുകൾ ഉണ്ടായിരിക്കുമെന്നും റിപ്പോർട്ടുകൾ സൂചിപ്പിക്കുന്നു.

പുതിയ ഐഒഎസ് 26.5 ബീറ്റാ പതിപ്പിലൂടെ ഐഫോണും ആൻഡ്രോയിഡും തമ്മിലുള്ള ആർസിഎസ് (RCS) സന്ദേശങ്ങൾക്ക് ആപ്പിൾ വീണ്ടും എൻഡ്-ടു-എൻഡ് എൻക്രിപ്ഷൻ സുരക്ഷ ഉറപ്പാക്കി. ഇതോടെ ഇരു പ്ലാറ്റ്‌ഫോമുകൾക്കുമിടയിൽ കൂടുതൽ സുരക്ഷിതമായി സന്ദേശങ്ങൾ കൈമാറാം. സെറ്റിങ്‌സിൽ ഇതിനായി പ്രത്യേക ഓപ്ഷൻ നൽകിയിട്ടുണ്ടെങ്കിലും ഇത് തനിയെ തന്നെ പ്രവർത്തിക്കും.

യൂറോപ്യൻ യൂണിയന്റെ നിയമങ്ങൾ പാലിക്കുന്നതിനായി മറ്റ് കമ്പനികളുടെ ഇയർഫോണുകൾ (TWS) എയർപോഡ്‌സിന് സമാനമായി വേഗത്തിൽ കണക്ട് ചെയ്യാനുള്ള 'പ്രോക്സിമിറ്റി പെയറിംഗ്' സൗകര്യവും ആപ്പിൾ പരീക്ഷിക്കുന്നുണ്ട്. കൂടാതെ, ഇനി മുതൽ മറ്റ് ബ്രാൻഡുകളുടെ സ്മാർട്ട് വാച്ചുകളിലും ഐഫോൺ നോട്ടിഫിക്കേഷനുകൾ കാണാനും മറുപടി നൽകാനും സാധിക്കും. ആപ്പിൾ വാച്ചിന് സമാനമായ ഈ ഫീച്ചർ മറ്റ് വാച്ച് ഉപയോക്താക്കൾക്കും വലിയ ആശ്വാസമാകും.

ഇതോടൊപ്പം തേർഡ് പാർട്ടി വെയറബിൾസിലും ഇനി 'ലൈവ് ആക്റ്റിവിറ്റീസ്' (Live Activities) ലഭ്യമാകും. നേരത്തെ ചില ബീറ്റാ പതിപ്പുകളിൽ പ്രോക്സിമിറ്റി പെയറിംഗും നോട്ടിഫിക്കേഷൻ ഫീച്ചറുകളും ആപ്പിൾ പരീക്ഷിച്ചിരുന്നു. എന്നാൽ മറ്റ് കമ്പനികളുടെ സ്മാർട്ട് വാച്ചുകളിലും മറ്റും ലൈവ് ആക്റ്റിവിറ്റീസ് പിന്തുണ പരീക്ഷിക്കുന്നത് ആദ്യമായാണ്. ഐഒഎസ് 26.5 ബീറ്റാ വൺ പതിപ്പിലാണ് ഈ പുതിയ മാറ്റം വരുന്നത്.

ഇതുകൂടാതെ, യുഎസ്ബി ടൈപ്പ്-സി പോർട്ട് വഴി മാജിക് കീബോർഡ് ഐഫോണുമായി ബന്ധിപ്പിക്കുമ്പോൾ ബ്ലൂടൂത്ത് വഴി തനിയെ കണക്ട് ആകാനുള്ള സൗകര്യവും പുതിയ ഐഒഎസ് 26.5 ബീറ്റാ പതിപ്പിലുണ്ട്. ഐഫോണിൽ നിന്ന് ആൻഡ്രോയിഡ് ഫോണിലേക്ക് മാറുമ്പോൾ ആവശ്യമുള്ള മെസേജ് അറ്റാച്ച്‌മെന്റുകൾ മാത്രം തിരഞ്ഞെടുത്ത് മാറ്റാനുള്ള സൗകര്യവും ഈ അപ്‌ഡേറ്റിൽ ആപ്പിൾ ഉൾപ്പെടുത്തിയിട്ടുണ്ട്.