ഐഫോൺ ഉപയോക്താക്കൾക്ക് മുന്നറിയിപ്പ്: അടിയന്തര സുരക്ഷാ അപ്‌ഡേറ്റുമായി ആപ്പിൾ

പഴയ ഐഫോൺ, ഐപാഡ് ഉപയോക്താക്കൾക്ക് സുരക്ഷാ മുന്നറിയിപ്പുമായി ആപ്പിൾ. പഴയ ഉപകരണങ്ങളെ ലക്ഷ്യമിട്ടുള്ള സൈബർ ഭീഷണികൾ തടയുന്നതിനായി iOS 18.7.7, iPadOS 18.7.7 എന്നീ അടിയന്തര അപ്‌ഡേറ്റുകൾ കമ്പനി പുറത്തിറക്കി.

പുതിയ iOS 26 മോഡലിലേക്ക് മാറാൻ സാധിക്കാത്ത ഫോണുകളുടെയും ടാബ്‌ലറ്റുകളുടെയും സുരക്ഷ ഉറപ്പാക്കാനാണ് ഈ നീക്കം. 'ഡാർക്ക് സ്വോർഡ്' (DarkSword) എന്ന ടൂൾകിറ്റ് ഉപയോഗിച്ച് ഹാക്കർമാർ പഴയ ആപ്പിൾ ഉപകരണങ്ങളെ ആക്രമിക്കാൻ സാധ്യതയുണ്ടെന്ന് സുരക്ഷാ ഗവേഷകർ കണ്ടെത്തിയിരുന്നു. ഇതിന് പിന്നാലെയാണ് ഉപയോക്താക്കളുടെ സ്വകാര്യതയും സുരക്ഷയും മുൻനിർത്തി ആപ്പിൾ അപ്‌ഡേറ്റ് ലഭ്യമാക്കിയത്. ഉടൻ തന്നെ പുതിയ സോഫ്റ്റ്‌വെയർ മോഡലിലേക്ക് മാറാൻ ഉപയോക്താക്കളോട് കമ്പനി ആവശ്യപ്പെട്ടിട്ടുണ്ട്.

ആപ്പിൾ അടിയന്തര സുരക്ഷാ അപ്‌ഡേറ്റ് പുറത്തിറക്കി

ഏപ്രിൽ 1-ന് ഐഫോൺ, ഐപാഡ് ഉപയോക്താക്കൾക്കായി iOS 18.7.7, iPadOS 18.7.7 എന്നീ അപ്‌ഡേറ്റുകൾ ലഭ്യമാക്കിയതായി ആപ്പിൾ അറിയിച്ചു. 'ഡാർക്ക് സ്വോർഡ്' (DarkSword) എന്ന ടൂൾകിറ്റുമായി ബന്ധപ്പെട്ട വെബ് അധിഷ്ഠിത ആക്രമണങ്ങളിൽ നിന്ന് കൂടുതൽ ആപ്പിൾ ഉപകരണങ്ങൾക്ക് സംരക്ഷണം നൽകുന്നതാണ് ഈ അപ്‌ഡേറ്റ്. 2025-ൽ ആദ്യമായി അവതരിപ്പിച്ച ഈ സുരക്ഷാ ക്രമീകരണങ്ങൾ ഇപ്പോൾ കൂടുതൽ ഉപകരണങ്ങളിലേക്ക് വ്യാപിപ്പിക്കുകയാണെന്ന് കമ്പനി വ്യക്തമാക്കി.

ചൈന, മലേഷ്യ, തുർക്കി, സൗദി അറേബ്യ, ഉക്രെയ്ൻ തുടങ്ങിയ രാജ്യങ്ങളിലെ പ്രത്യേക ലക്ഷ്യങ്ങളെ ആക്രമിക്കാനാണ് ഈ ടൂൾകിറ്റ് പ്രധാനമായും ഉപയോഗിച്ചിരുന്നത്. അടുത്തിടെ ഇത് ഗിറ്റ്‌ഹബ് (GitHub) പോലുള്ള പ്ലാറ്റ്‌ഫോമുകളിൽ പരസ്യമായതോടെ, സൈബർ ആക്രമണങ്ങൾ നടത്തുന്നത് ഹാക്കർമാർക്ക് എളുപ്പമാകുമെന്ന് ഗവേഷകർ മുന്നറിയിപ്പ് നൽകിയിരുന്നു. ഇതിന് പിന്നാലെയാണ് പ്രതിരോധ നടപടിയുമായി ആപ്പിൾ രംഗത്തെത്തിയത്.

ഏറ്റവും പുതിയ iOS 26 വേർഷൻ ഉപയോഗിക്കുന്നവർക്ക് ഡാർക്ക് സ്വോർഡ് ഭീഷണിയിൽ നിന്ന് നേരത്തെ തന്നെ സംരക്ഷണം ലഭിക്കുന്നുണ്ടെന്ന് ആപ്പിൾ അറിയിച്ചു. എന്നാൽ പുതിയ ലിക്വിഡ് ഗ്ലാസ് (Liquid Glass) പോലുള്ള ഡിസൈൻ മാറ്റങ്ങൾ ഇഷ്ടപ്പെടാത്തതിനാലോ മറ്റോ പുതിയ പതിപ്പിലേക്ക് മാറാത്തവർക്കും ഈ അപ്‌ഡേറ്റിലൂടെ സുരക്ഷ ഉറപ്പാക്കാം.

ഫോണിൽ ഓട്ടോമാറ്റിക് അപ്‌ഡേറ്റ് ഓൺ ചെയ്തിട്ടുള്ളവർക്ക് ഈ സുരക്ഷാ ക്രമീകരണം താനേ ലഭിക്കും. കൂടാതെ, ഇത്തരം ഹാക്കിംഗ് നീക്കങ്ങളെ തടയാൻ ആപ്പിളിന്റെ ലോക്ക്ഡൗൺ മോഡ് (Lockdown Mode) ഉപയോഗിക്കാമെന്നും കമ്പനി പറയുന്നു. 2022-ൽ iOS 16-നൊപ്പം അവതരിപ്പിച്ച ഈ പ്രത്യേക സുരക്ഷാ ഫീച്ചർ iOS 18 പോലുള്ള പഴയ വേർഷനുകളിലും ലഭ്യമാണ്.

എന്താണ് ഡാർക്ക് സ്വോർഡ് (DarkSword) സ്പൈവെയർ?

ഐഫോണുകളെ പൂർണ്ണമായും ഹാക്ക് ചെയ്യാൻ ശേഷിയുള്ള ഒരു അത്യാധുനിക സോഫ്റ്റ്‌വെയർ സംവിധാനമാണ് ഡാർക്ക് സ്വോർഡ് സ്പൈവെയർ. ആപ്പിൾ പോലും തിരിച്ചറിഞ്ഞിട്ടില്ലാത്ത ഒന്നിലധികം സുരക്ഷാ പിഴവുകളെ (Zero-day vulnerabilities) ഒരേസമയം ഉപയോഗപ്പെടുത്തിയാണ് ഇത് പ്രവർത്തിക്കുന്നത്. ഒരു വെബ് പേജിൽ പ്രവേശിക്കുന്നതിലൂടെയോ അല്ലെങ്കിൽ ഒരു ലിങ്കിൽ ക്ലിക്ക് ചെയ്യുന്നതിലൂടെയോ ആരംഭിച്ച്, പടിപടിയായി ഫോണിന്റെ മുഴുവൻ നിയന്ത്രണവും ഹാക്കർമാർക്ക് നൽകാൻ ഈ സ്പൈവെയറിന് സാധിക്കും. അടുത്തിടെ ഇതിന്റെ ടൂൾകിറ്റ് പരസ്യമായി ലഭ്യമായതോടെ, കാര്യമായ സാങ്കേതിക പരിജ്ഞാനം ഇല്ലാത്തവർക്ക് പോലും ഐഫോണുകൾ ആക്രമിക്കാനുള്ള സാഹചര്യമുണ്ടായിരിക്കുകയാണ്. ഇതിനെ പ്രതിരോധിക്കാനാണ് ആപ്പിൾ ഇപ്പോൾ അടിയന്തരമായി രംഗത്തെത്തിയിരിക്കുന്നത്.

ഹാക്ക് ചെയ്യപ്പെട്ട ഫോണുകളിൽ നിന്ന് പ്രധാനപ്പെട്ട വിവരങ്ങൾ ചോർത്താനാണ് ഡാർക്ക് സ്വോർഡ് (DarkSword) പ്രധാനമായും ഉപയോഗിക്കുന്നത്. നിങ്ങളുടെ ഫോണിലെ കോൺടാക്റ്റുകൾ, മെസ്സേജുകൾ, കോൾ ലിസ്റ്റ് എന്നിവയ്ക്ക് പുറമെ ഫോണിൽ സേവ് ചെയ്തിരിക്കുന്ന പാസ്‌വേഡുകൾ വരെ കൈക്കലാക്കാൻ ഇതിന് കഴിയും. ഇങ്ങനെ ചോർത്തുന്ന വിവരങ്ങൾ ഹാക്കർമാരുടെ സെർവറുകളിലേക്ക് ഈ സ്പൈവെയർ രഹസ്യമായി അയച്ചുകൊടുക്കുകയും ചെയ്യും. ചുരുക്കത്തിൽ, നിങ്ങളുടെ സ്വകാര്യ വിവരങ്ങളെല്ലാം ഹാക്കർമാരുടെ കൈകളിൽ എത്താൻ ഇത് കാരണമാകും.