ലോഞ്ചിങ്ങിനു തയ്യാറെടുത്ത് ഇൻഫിനിക്സ് നോട്ട് 60 അൾട്ര; ഗീക്ബെഞ്ച് ലിസ്റ്റിങ്ങിലൂടെ പ്രധാന സവിശേഷതകൾ പുറത്ത്

മിതമായ വിലയ്ക്ക് മികച്ച സവിശേഷതകളുള്ള സ്മാർട്ട്ഫോണുകൾ നൽകി ശ്രദ്ധയാകർഷിച്ച ചൈനീസ് ബ്രാൻഡാണ് ഇൻഫിനിക്‌സ്. ഉടനെ വരാനിരിക്കുന്ന നോട്ട് 60 സീരീസിലൂടെ തങ്ങളുടെ ജനപ്രിയ നോട്ട് ലൈനപ്പ് വിപുലീകരിക്കാൻ ഒരുങ്ങുകയാണ് കമ്പനിയിപ്പോൾ. ഈ സീരീസിലെ നോട്ട് 60 പ്രോയുടെ ലോഞ്ച് കമ്പനി ഇതിനകം സ്ഥിരീകരിച്ചിട്ടുണ്ട്. ഇപ്പോൾ ടോപ്പ്-എൻഡ് മോഡലായ നോട്ട് 60 അൾട്രയെക്കുറിച്ചുള്ള വിശദാംശങ്ങൾ ഓൺലൈനിൽ പ്രത്യക്ഷപ്പെടാൻ തുടങ്ങി. അടുത്തിടെ, ഗീക്ക്ബെഞ്ച് ബെഞ്ച്മാർക്കിംഗ് പ്ലാറ്റ്‌ഫോമിൽ ഒരു പുതിയ ഇൻഫിനിക്സ് സ്മാർട്ട്‌ഫോൺ കണ്ടെത്തിയിരുന്നു. ഇതു ഇൻഫിനിക്സ് നോട്ട് 60 അൾട്ര ആയിരിക്കാമെന്നാണ് റിപ്പോർട്ടുകൾ സൂചിപ്പിക്കുന്നത്. ചിപ്‌സെറ്റ്, ഫോണിന്റെ പെർഫോമൻസ് എന്നിവയെ കുറിച്ചുള്ള പ്രധാന വിവരങ്ങൾ ഈ ലിസ്റ്റിംഗ് വെളിപ്പെടുത്തുന്നു. നോട്ട് 60 അൾട്ര മുൻഗാമിയുമായി താരതമ്യപ്പെടുത്തുമ്പോൾ ചില പ്രധാനപ്പെട്ട അപ്‌ഗ്രേഡുകൾ കൊണ്ടുവരുമെന്ന് പ്രതീക്ഷിക്കുന്നു. ശ്രദ്ധേയമായി, ഇറ്റാലിയൻ ഡിസൈൻ സ്ഥാപനമായ പിനിൻഫരിനയുമായി സഹകരിച്ച് രൂപകൽപ്പന ചെയ്ത ആദ്യത്തെ ഇൻഫിനിക്സ് സ്മാർട്ട്‌ഫോണായിരിക്കും ഇത്. നോട്ട് 60 സീരീസ് സാറ്റലൈറ്റ് കമ്മൂണിക്കേഷനെ പിന്തുണയ്ക്കുമെന്നും കമ്പനി സ്ഥിരീകരിച്ചു.

ഗീക്ക്ബെഞ്ചിൽ ലിസ്റ്റ് ചെയ്യപ്പെട്ട് ഇൻഫിനിക്സ് നോട്ട് 60 അൾട്രാ:

X6877 എന്ന മോഡൽ നമ്പറുള്ള വരാനിരിക്കുന്ന ഇൻഫിനിക്സ് സ്മാർട്ട്‌ഫോൺ ഫെബ്രുവരി 12-ന് ഗീക്ക്ബെഞ്ച് ഡാറ്റാബേസിൽ ലിസ്റ്റ് ചെയ്തിട്ടുണ്ട്. ഈ മോഡൽ നമ്പർ ഇൻഫിനിക്സ് നോട്ട് 60 അൾട്രായുടേതാണെന്ന് വിശ്വസിക്കപ്പെടുന്നു. 2.10GHz-ൽ നാല് കോറുകളും 3.0GHz-ൽ മൂന്ന് കോറുകളും 3.25GHz-ൽ ഒരു കോറുമുള്ള ഒക്ടാ-കോർ പ്രോസസർ ഹാൻഡ്‌സെറ്റിൽ ഉണ്ടെന്ന് ലിസ്റ്റിംഗ് കാണിക്കുന്നു. ഈ സിപിയു വേഗതകൾ സൂചിപ്പിക്കുന്നത് ഉപകരണം മീഡിയടെക് ഡൈമെൻസിറ്റി 8400 അൾട്രാ ചിപ്‌സെറ്റുമായി വരുമെന്നാണ്.

ഗീക്ക്ബെഞ്ച് ലിസ്റ്റിംഗ് വെളിപ്പെടുത്തുന്നത് ഫോൺ 12GB റാമിലാണ് പരീക്ഷിച്ചതെന്നാണ്. എന്നിരുന്നാലും, ലോഞ്ച് ചെയ്യുമ്പോൾ കമ്പനി കൂടുതൽ റാം ഓപ്ഷനുകൾ വാഗ്ദാനം ചെയ്യാൻ സാധ്യതയുണ്ട്. ആൻഡ്രോയിഡ് 16-ൽ പ്രവർത്തിക്കുന്ന ഉപകരണമാണിത്, ഇത് ഇൻഫിനിക്‌സിന്റെ കസ്റ്റം XOS 16 സ്‌കിനുമായി ജോടിയാക്കും.

പ്രകടനത്തിന്റെ കാര്യത്തിൽ, നോട്ട് 60 അൾട്രാ സിംഗിൾ-കോർ ടെസ്റ്റിൽ 1,609 പോയിന്റും മൾട്ടി-കോർ ടെസ്റ്റിൽ 6,762 പോയിന്റും നേടി. ഗെയിമിംഗ്, മൾട്ടിടാസ്കിംഗ്, ദൈനംദിന ഉപയോഗം എന്നിവയ്ക്ക് അനുയോജ്യമായ ശക്തമായ മിഡ്-റേഞ്ച് പെർഫോമൻസ് ഈ ഫോണിന് വാഗ്ദാനം ചെയ്യാൻ കഴിയുമെന്ന് ഈ സ്കോറുകൾ സൂചിപ്പിക്കുന്നു. ഗീക്ക്ബെഞ്ച് ലിസ്റ്റിംഗ് മറ്റ് സവിശേഷതകൾ വെളിപ്പെടുത്തുന്നില്ല, എന്നാൽ മുമ്പത്തെ ചോർച്ചകൾ കൂടുതൽ വിവരങ്ങൾ പങ്കിട്ടിരുന്നു.

ഇൻഫിനിക്സ് നോട്ട് 60 അൾട്രയിൽ പ്രതീക്ഷിക്കുന്ന സവിശേഷതകളും നോട്ട് 60 പ്രോയുടെ വിശദാംശങ്ങളും:

മുൻ റിപ്പോർട്ടുകൾ പ്രകാരം, ഇൻഫിനിക്സ് നോട്ട് 60 അൾട്രാ 256 ജിബി, 512 ജിബി സ്റ്റോറേജ് വേരിയന്റുകളിൽ ലഭ്യമായേക്കാം. 144Hz റിഫ്രഷ് റേറ്റുള്ള AMOLED ഡിസ്പ്ലേ ഇതിലുണ്ടാകുമെന്ന് അഭ്യൂഹമുണ്ട്. സ്മാർട്ട്‌ഫോണിൽ 200 മെഗാപിക്സൽ മെയിൻ പിൻ ക്യാമറയും ഉൾപ്പെട്ടേക്കാം, ഇത് ഈ വിഭാഗത്തിൽ ഒരു പ്രധാന ഹൈലൈറ്റായിരിക്കും.

ബാറ്ററി ലൈഫ് മറ്റൊരു ശക്തമായ പോയിന്റാകും പ്രതീക്ഷിക്കുന്നു. 100W വയർഡ് ഫാസ്റ്റ് ചാർജിംഗിനും 30W വയർലെസ് ചാർജിംഗിനും പിന്തുണയുള്ള വലിയ 7,000mAh ബാറ്ററി ഈ ഫോണിന് ഉണ്ടായിരിക്കും. നോട്ട് 60 അൾട്രാ ടു-വേ സാറ്റലൈറ്റ് കമ്മ്യൂണിക്കേഷനെ പിന്തുണയ്ക്കുമെന്ന് ഇൻഫിനിക്സ് ഇതിനകം സ്ഥിരീകരിച്ചിട്ടുണ്ട്. മൊബൈൽ നെറ്റ്‌വർക്ക് ഇല്ലാത്ത പ്രദേശങ്ങളിൽ പോലും സന്ദേശങ്ങൾ അയയ്ക്കാനും സ്വീകരിക്കാനും ഈ ഫീച്ചറിലൂടെ ഉപയോക്താക്കൾക്കു കഴിയും.

അതിനിടയിൽ, നൈജീരിയ പോലുള്ള തിരഞ്ഞെടുത്ത അന്താരാഷ്ട്ര വിപണികളിൽ നോട്ട് 60 പ്രോ പുറത്തിറക്കാനും കമ്പനി ഒരുങ്ങുകയാണ്. സ്നാപ്ഡ്രാഗൺ 7s Gen 4 പ്രൊസസർ, 144Hz റിഫ്രഷ് റേറ്റ് ഉള്ള 1.5K റെസല്യൂഷൻ ഡിസ്പ്ലേ, 50 മെഗാപിക്സൽ റിയർ ക്യാമറ, 90W ഫാസ്റ്റ് ചാർജിംഗ് പിന്തുണയുള്ള 6,500mAh ബാറ്ററി എന്നിവയുമായാണ് പ്രോ മോഡൽ വരുന്നത്. നോട്ട് 60 സീരീസിൽ ഒരു സ്റ്റാൻഡേർഡ് നോട്ട് 60 മോഡലും ഉൾപ്പെടുമെന്ന് പ്രതീക്ഷിക്കുന്നു.