ആകർഷകമായ ഫീച്ചറുകളല്ല, ഈടുനിൽപ്പാണ് താരം; സ്മാർട്ട്ഫോൺ ഉപഭോക്താക്കളുടെ മുൻഗണനകളിൽ വലിയ മാറ്റം

ഇന്ത്യൻ വിപണിയിൽ സ്മാർട്ട്ഫോൺ തിരഞ്ഞെടുക്കുമ്പോൾ ആകർഷകമായ ഫീച്ചറുകളേക്കാളും കുറഞ്ഞ വിലയേക്കാളും ഉപഭോക്താക്കൾ ഇപ്പോൾ മുൻഗണന നൽകുന്നത് ഫോണിന്റെ ഈടുനിൽപ്പിനും വിശ്വാസ്യതയ്ക്കുമാണ്. പുതിയ പഠനങ്ങൾ പ്രകാരം മികച്ച പ്രകടനം, ദീർഘകാലം നിലനിൽക്കുന്ന ബാറ്ററി, മികച്ച സർവീസ് സൗകര്യങ്ങൾ എന്നിവയ്ക്കാണ് ആളുകൾ പ്രാധാന്യം നൽകുന്നത്. ഹാർഡ്‌വെയറിലെ താൽക്കാലിക നേട്ടങ്ങളേക്കാൾ ഫോണിന്റെ ഈടുനിൽപ്പും താങ്ങാനാവുന്ന വിലയുമാണ് ഇപ്പോൾ ഉപഭോക്താക്കളെ പ്രധാനമായും സ്വാധീനിക്കുന്നത്.

ഇന്ത്യൻ സ്മാർട്ട്ഫോൺ വിപണിയിലെ ട്രെൻഡ് മാറുന്നു: മുൻഗണന ഈടുനിൽപ്പിനും വിശ്വാസ്യതയ്ക്കും

ഇന്ത്യയിലെ സ്മാർട്ട്ഫോൺ ഉപഭോക്താക്കളുടെ താൽപ്പര്യങ്ങളിൽ വലിയ മാറ്റം പ്രകടമാകുന്നതായി സൈബർ മീഡിയ റിസർച്ച് നടത്തിയ പഠനം വ്യക്തമാക്കുന്നു. 13 നഗരങ്ങളിലായി നടന്ന സർവേയിൽ പങ്കെടുത്ത ഭൂരിഭാഗം യുവാക്കളും മികച്ച ഫീച്ചറുകളേക്കാൾ ഫോണിന്റെ ഈടുനിൽപ്പിനും ദീർഘകാല വിശ്വാസ്യതയ്ക്കുമാണ് നിലവിൽ മുൻഗണന നൽകുന്നത്. ഒരു പുതിയ ഫോൺ വാങ്ങുമ്പോഴോ ബ്രാൻഡ് മാറുമ്പോഴോ 87 ശതമാനം പേരും ശ്രദ്ധിക്കുന്നത് ഫോണിന്റെ ഈടുനിൽപ്പാണ്. ഇതിൽ പ്രധാനമായും ബാറ്ററിയുടെ കാര്യക്ഷമതയും മികച്ച കോൾ ഗുണമേന്മയുമാണ് ഉപഭോക്താക്കൾ ആഗ്രഹിക്കുന്നത്. ബാറ്ററി പ്രകടനം മോശമാകുന്നത് ഉപഭോക്താക്കളെ ഒരു ബ്രാൻഡിൽ നിന്ന് അകറ്റുന്ന പ്രധാന ഘടകമാണ്. ഏകദേശം 70 ശതമാനം ആളുകളും ബാറ്ററി തകരാറുകൾ മൂലം ബ്രാൻഡ് മാറാൻ ആലോചിക്കുമ്പോൾ 60 ശതമാനം പേരെ ഫോണിന്റെ നിർമാണ നിലവാരമില്ലായ്മ സ്വാധീനിക്കുന്നു.

മുൻകാലങ്ങളിൽ സ്പെസിഫിക്കേഷനുകൾക്കും വിലയ്ക്കും നൽകിയിരുന്ന പ്രാധാന്യം ഇപ്പോൾ ഫോണിന്റെ മികച്ച പ്രകടനത്തിലേക്കും ദീർഘകാല ഉപയോഗത്തിലേക്കും മാറിയെന്ന് സിഎംആർ പ്രതിനിധി പ്രഭു റാം അഭിപ്രായപ്പെട്ടു. ഇതിൽ ആഫ്റ്റർ സെയിൽസ് സർവീസിനും വലിയ പങ്കുണ്ട്. സർവേയിൽ പങ്കെടുത്തവരിൽ 28 ശതമാനം പേർ ഡിസ്‌പ്ലേ തകരാറുകളും 28 ശതമാനം പേർ വെള്ളം കയറിയുള്ള പ്രശ്നങ്ങളും റിപ്പോർട്ട് ചെയ്തിട്ടുണ്ട്. 27 ശതമാനം ഉപഭോക്താക്കൾ ഫോൺ അമിതമായി ചൂടാകുന്ന പ്രശ്നം നേരിടുന്നവരാണ്. യുവതലമുറയെ സംബന്ധിച്ചിടത്തോളം ഫോണിന്റെ കരുത്ത് എന്നാൽ ബോഡിയുടെ ഉറപ്പ് മാത്രമല്ല. സ്ഥിരതയുള്ള ബാറ്ററി ലൈഫ്, തടസ്സമില്ലാത്ത സോഫ്റ്റ്‌വെയർ അനുഭവം, മികച്ച കണക്റ്റിവിറ്റി എന്നിവയാണ് അവർ ഈടുനിൽപ്പിലൂടെ അർത്ഥമാക്കുന്നത്.

10,000 രൂപയിൽ താഴെ വിലയുള്ള ഫോണുകളുടെ വിഭാഗത്തിൽ സിഎംആർ ഡ്യൂറബിലിറ്റി ഇൻഡക്സ് പ്രകാരം ഐറ്റെൽ ഒന്നാമതെത്തി. സാംസങ്, വിവോ എന്നിവയാണ് തൊട്ടുപിന്നാലെയുള്ള സ്ഥാനങ്ങളിൽ.