എച്ച്എംഡി വൈബ് 2 5ജി വരുന്നു; മികച്ച ബാറ്ററിയും ക്യാമറയും സ്വന്തമാക്കാൻ തയ്യാറായിക്കോളൂ

എച്ച്എംഡി വൈബ് 2 5ജി ഉടൻ ഇന്ത്യയിൽ പുറത്തിറങ്ങും. ഫോൺ വിപണിയിലെത്തുന്നതിന് ഒരാഴ്ച മുൻപ് തന്നെ വില, റാം, സ്റ്റോറേജ് വിവരങ്ങൾ, പ്രധാന സവിശേഷതകൾ തുടങ്ങിയവ ഓൺലൈനിൽ പുറത്തുവന്നു. ഈ സ്മാർട്ട്ഫോൺ മൂന്ന് സ്റ്റോറേജ് വകഭേദങ്ങളിൽ ലഭ്യമാകുമെന്നാണ് പ്രതീക്ഷിക്കുന്നത്. ഇതിലെ ഉയർന്ന മോഡലിൽ 6ജിബി റാമും 128ജിബി സ്റ്റോറേജും ഉണ്ടായിരിക്കും. യൂണിസോക് ചിപ്‌സെറ്റായിരിക്കും ഫോണിന്റെ കരുത്ത്. ഈ ഫോൺ ഇന്ത്യയിൽ മൂന്ന് നിറങ്ങളിൽ ലഭ്യമാകുമെന്ന് കമ്പനി അടുത്തിടെ സ്ഥിരീകരിച്ചിട്ടുണ്ട്. കൂടാതെ, 6,000എംഎഎച്ച് ബാറ്ററിയുമായാണ് എച്ച്എംഡി വൈബ് 2 5ജി എത്തുന്നത്.

എച്ച്എംഡി വൈബ് 2 5ജി വിലയും പ്രത്യേകതകളും 

എച്ച്എംഡി വൈബ് 2 5ജി ഫോണിന്റെ വിവരങ്ങൾ ടിപ്‌സ്റ്റർ അഭിഷേക് യാദവ് പുറത്തുവിട്ടു. 4ജിബി റാം, 64ജിബി സ്റ്റോറേജ് ഉള്ള അടിസ്ഥാന മോഡലിന് 8,999 രൂപയാണ് പ്രാരംഭ വില.

4ജിബി റാം, 128ജിബി സ്റ്റോറേജ് ഉള്ള പതിപ്പിന് 9,999 രൂപയും, 6ജിബി റാം, 128ജിബി സ്റ്റോറേജ് ഉള്ള ഉയർന്ന മോഡലിന് 10,999 രൂപയുമായിരിക്കും വില.

യൂണിസോക് ടി8200 ചിപ്‌സെറ്റിലാണ് ഫോൺ പ്രവർത്തിക്കുന്നത്. 6ജിബി വരെ റാമും 128ജിബി വരെ സ്റ്റോറേജും ഇതിൽ ലഭ്യമാണ്. 8 മെഗാപിക്സൽ ഫ്രണ്ട് ക്യാമറയും ഫോണിലുണ്ട്. പൊടി, വെള്ളം എന്നിവയെ ചെറുക്കുന്ന ഐപി64 റേറ്റിംഗും ഈ ഫോണിന്റെ പ്രത്യേകതയാണ്.

എച്ച്എംഡി വൈബ് 2 5ജി മെയ് 21-ന് ഉച്ചയ്ക്ക് 12 മണിക്ക് ഇന്ത്യയിൽ പുറത്തിറങ്ങുമെന്ന് ഇതിനകം സ്ഥിരീകരിച്ചിട്ടുണ്ട്. ഫ്ലിപ്പ്കാർട്ട് വഴിയായിരിക്കും ഫോൺ വിൽപ്പനയ്‌ക്കെത്തുന്നത്. കോസ്മിക് ലാവെൻഡർ, നോർഡിക് ബ്ലൂ, പീച്ച് പിങ്ക് എന്നീ മൂന്ന് നിറങ്ങളിൽ ഈ ഫോൺ ലഭ്യമാകും.

6,000എംഎഎച്ച് ബാറ്ററിയാണ് ഈ ഫോണിന്റെ പ്രധാന പ്രത്യേകത. ഇതിനോടൊപ്പം യുഎസ്ബി ടൈപ്പ്-സി പോർട്ട് വഴി 18 വാട്ട് വയർഡ് ചാർജിംഗും ലഭ്യമാകും. ക്യാമറയുടെ കാര്യമെടുത്താൽ, 50 മെഗാപിക്സൽ എഐ മെയിൻ സെൻസർ ഉൾപ്പെടെയുള്ള ഡ്യുവൽ റിയർ ക്യാമറ യൂണിറ്റാണ് ഇതിലുള്ളത്. കൂടാതെ, 3.5 എംഎം ഓഡിയോ ജാക്കും ഈ ഫോണിലുണ്ട്.