ലാപ്ടോപ്പും ചാർജ് ചെയ്യാം; 67W ഫാസ്റ്റ് ചാർജിംഗ് പിന്തുണയുമായി പുതിയ ഷവോമി പവർ ബാങ്ക്

20,000mAh ബാറ്ററിയും 67W അതിവേഗ ചാർജിംഗും ഇൻ-ബിൽറ്റ് ടൈപ്പ്-സി കേബിളുമുള്ള 'പവർ ബാങ്ക് 5i 20000 67W' ഷവോമി ഇന്ത്യയിൽ പുറത്തിറക്കി. സ്മാർട്ട്‌ഫോണുകൾ മുതൽ ലാപ്ടോപ്പുകൾ വരെയുള്ള വിവിധ ഡിവൈസുകൾ ചാർജ് ചെയ്യാനും 65W ഫാസ്റ്റ് ഇൻപുട്ട് വഴി വേഗത്തിൽ റീചാർജ് ചെയ്യാനും സാധിക്കുന്ന ഈ ഉപകരണം ഈ മാസം അവസാനത്തോടെ വിൽപ്പനയ്‌ക്കെത്തും.

ഷവോമി പവർ ബാങ്ക് 5i 20000 67W വിലയും ലഭ്യതയും

ഷവോമി പവർ ബാങ്ക് 5i 20000 67W-ന് ഇന്ത്യയിൽ 3,499 രൂപയാണ് പ്രാരംഭ വിലയെന്ന് കമ്പനി വാർത്താക്കുറിപ്പിൽ അറിയിച്ചു. ബ്ലാക്ക്, ബ്ലൂ നിറങ്ങളിൽ ലഭിക്കുന്ന ഈ ഉപകരണം ജൂലൈ 28 ഉച്ചയ്ക്ക് 12 മണി മുതൽ ഷവോമിയുടെ ഔദ്യോഗിക വെബ്‌സൈറ്റ്, ആമസോൺ ഇന്ത്യ, ഷവോമി റീട്ടെയിൽ സ്റ്റോറുകൾ എന്നിവ വഴി സ്വന്തമാക്കാം.

ഷവോമി പവർ ബാങ്ക് 5i 20000 67W സവിശേഷതകൾ

ഇൻ-ബിൽറ്റ് യുഎസ്ബി ടൈപ്പ്-സി (USB Type-C) കേബിളോട് കൂടിയ ഒതുക്കമുള്ള ഡിസൈനായതിനാൽ ഇതിനായി പ്രത്യേകം കേബിൾ കൈയിൽ കരുതേണ്ടതില്ല. കൂടാതെ, ബാക്കിയുള്ള ബാറ്ററിയുടെ അളവും ചാർജിംഗ് വിവരങ്ങളും തത്സമയം അറിയാൻ സഹായിക്കുന്ന സ്മാർട്ട് ഡിജിറ്റൽ ഡിസ്‌പ്ലേയും ഇതിലുണ്ട്.

കണക്റ്റിവിറ്റിയുടെ കാര്യത്തിൽ, ഇൻ-ബിൽറ്റ് യുഎസ്ബി ടൈപ്പ്-സി കേബിൾ, യുഎസ്ബി ടൈപ്പ്-സി പോർട്ട്, യുഎസ്ബി ടൈപ്പ്-എ പോർട്ട് എന്നിവ ഷവോമി പവർ ബാങ്ക് 5i-ൽ നൽകിയിട്ടുണ്ട്. ഒരേസമയം ഒന്നിലധികം ഡിവൈസുകൾ ചാർജ് ചെയ്യാൻ ഇത് സഹായിക്കും. ആൻഡ്രോയിഡ്, ഐഒഎസ് ഉപകരണങ്ങൾക്ക് അനുയോജ്യമായ PD 3.0 PPS, QC 3.5, BC1.2, Apple 2.4A തുടങ്ങിയ ഫാസ്റ്റ് ചാർജിംഗ് പ്രോട്ടോക്കോളുകളും ഇത് പിന്തുണയ്ക്കുന്നു.

20,000mAh ബാറ്ററിയുള്ള ഈ പവർ ബാങ്കിന് 67W അതിവേഗ ചാർജിംഗ് ശേഷിയുമുണ്ട്. സ്മാർട്ട്‌ഫോണുകൾ, ടാബ്‌ലെറ്റുകൾ, ലാപ്ടോപ്പുകൾ, ഗെയിമിംഗ് ഉപകരണങ്ങൾ, മറ്റ് യുഎസ്ബി അധിഷ്ഠിത ഡിവൈസുകൾ എന്നിവയെല്ലാം ഇതിൽ ചാർജ് ചെയ്യാം. വേഗത്തിൽ റീചാർജ് ചെയ്തെടുക്കാൻ 65W ഇൻപുട്ട് ചാർജിംഗ് സൗകര്യവും ഈ പവർ ബാങ്കിൽ ലഭ്യമാണ്.

ദിനംപ്രതിയുള്ള ഉപയോഗത്തിനും യാത്രകൾക്കും ഒരുപോലെ അനുയോജ്യമായ രീതിയിലാണ് ഇതിന്റെ ഒതുക്കമുള്ള ഡിസൈൻ ഒരുക്കിയിരിക്കുന്നതെന്ന് ഷവോമി വ്യക്തമാക്കുന്നു. 140 × 72 × 31.2 മി.മീ വലിപ്പമുള്ള ഷവോമി പവർ ബാങ്ക് 5i 20000 67W-ന് 420 ഗ്രാം ഭാരമാണുള്ളത്.