മാജിക് പോയിന്ററും ജെമിനി AI ഫീച്ചറുകളും ഇനി ലാപ്‌ടോപ്പുകളിൽ

ആൻഡ്രോയിഡ് ഷോ ഐ/ഒ എഡിഷനിൽ ഗൂഗിൾ തങ്ങളുടെ പുതിയ തരം ലാപ്‌ടോപ്പായ 'ഗൂഗിൾബുക്ക്' ചൊവ്വാഴ്ച അവതരിപ്പിച്ചു. ജെമിനി ഐ അടിസ്ഥാനമാക്കി പ്രവർത്തിക്കുന്ന ഈ അത്യാധുനിക ലാപ്‌ടോപ്പുകളിൽ ഗൂഗിളിന്റെ ആപ്പ് സ്റ്റോറും ബ്രൗസറും ഒരുമിച്ചുണ്ടാകും. ആൻഡ്രോയിഡ് സ്മാർട്ട്‌ഫോണുകളുമായി വളരെ എളുപ്പത്തിൽ കണക്ട് ചെയ്യാമെന്നതാണ് ഇതിന്റെ പ്രധാന മെച്ചം. ജെമിനി സേവനങ്ങൾ വേഗത്തിൽ ഉപയോഗിക്കാൻ സഹായിക്കുന്ന 'മാജിക് പോയിന്റർ' എന്ന ഫീച്ചറും ഇതിലുണ്ട്. കൂടാതെ ഫോണിലെ ഫയലുകൾ നേരിട്ട് ലാപ്‌ടോപ്പിൽ തന്നെ കാണാനും സാധിക്കും. ക്രോംബുക്കുകൾ വന്ന് 15 വർഷത്തിന് ശേഷമാണ് ഗൂഗിൾ ഇങ്ങനെയൊരു മാറ്റത്തിന് തയ്യാറെടുക്കുന്നത്. ജെമിനി എഐ സാങ്കേതികവിദ്യ കൂടുതൽ ആളുകളിലേക്ക് എത്തിക്കാനുള്ള ഗൂഗിളിന്റെ വലിയൊരു നീക്കമാണിത്.

ഗൂഗിൾബുക്ക്: എന്ന് എത്തും? ആരെല്ലാം നിർമ്മിക്കും?

ഗൂഗിൾബുക്കിന്റെ വിലയെക്കുറിച്ചോ കൃത്യമായ വിവരങ്ങളെക്കുറിച്ചോ കമ്പനി ഇപ്പോൾ ഒന്നും പറഞ്ഞിട്ടില്ല. എങ്കിലും ഈ വർഷം അവസാനത്തോടെ (നവംബർ മാസത്തിന് മുൻപായി) പുതിയ ലാപ്‌ടോപ്പുകൾ വിപണിയിലെത്തുമെന്നാണ് സൂചന. അതുകൊണ്ട് തന്നെ വരും മാസങ്ങളിൽ കൂടുതൽ കാര്യങ്ങൾ നമുക്ക് അറിയാൻ സാധിക്കും. ആദ്യഘട്ടത്തിൽ ലാപ്‌ടോപ്പുകൾ നിർമ്മിക്കാനായി ഏസർ, അസൂസ്, ഡെൽ, എച്ച്പി, ലെനോവോ തുടങ്ങിയ പ്രമുഖ കമ്പനികളുമായി ഗൂഗിൾ ഇതിനോടകം ധാരണയിലെത്തിയിട്ടുണ്ട്.

ഗൂഗിൾബുക്ക്: പ്രധാന ഫീച്ചറുകളും സാങ്കേതിക വിവരങ്ങളും

പുതിയ ഗൂഗിൾബുക്ക് ലാപ്‌ടോപ്പുകളിൽ ഗൂഗിൾ ക്രോം ബ്രൗസറും പ്ലേ സ്റ്റോറും മുൻകൂട്ടി സജ്ജീകരിച്ചിട്ടുണ്ടാകും. ഇതിൽ ഒരു അത്യാധുനിക ഓപ്പറേറ്റിംഗ് സിസ്റ്റം (Modern OS) ലഭ്യമാകുമെന്ന് കമ്പനി അറിയിച്ചിട്ടുണ്ടെങ്കിലും, അത് നിലവിൽ വികസിപ്പിച്ചുകൊണ്ടിരിക്കുന്ന അലുമിനിയം ഒഎസ് ആണോ എന്ന കാര്യത്തിൽ ഔദ്യോഗിക സ്ഥിരീകരണമായിട്ടില്ല. ജെമിനി ഇൻ്റലിജൻസിന് (Gemini Intelligence) പരമാവധി മുൻഗണന നൽകിക്കൊണ്ട് നിർമ്മിച്ച ആദ്യത്തെ ലാപ്‌ടോപ്പുകളാണിതെന്നാണ് ഗൂഗിളിന്റെ അവകാശവാദം.

ഈ ലാപ്‌ടോപ്പിലെ ഏറ്റവും ശ്രദ്ധേയമായ മാറ്റം മാജിക് പോയിൻ്റർ (Magic Pointer) ആണ്. ഗൂഗിൾ ഡീപ്‌മൈൻഡുമായി ചേർന്ന് വികസിപ്പിച്ച ഈ ഫീച്ചർ വഴി വളരെ എളുപ്പത്തിൽ ജെമിനി AI ഉപയോഗിക്കാൻ സാധിക്കും. സ്ക്രീനിൽ കഴ്‌സർ ഒന്ന് വേഗത്തിൽ ചലിപ്പിക്കുമ്പോൾ തന്നെ സാഹചര്യത്തിനനുസരിച്ചുള്ള നിർദ്ദേശങ്ങൾ ജെമിനി ലഭ്യമാക്കും. ഒരു ഇമെയിലിലെ തീയതിയിൽ ക്ലിക്ക് ചെയ്ത് കലണ്ടറിൽ മീറ്റിംഗുകൾ നിശ്ചയിക്കാനും, രണ്ട് ചിത്രങ്ങൾ ഒരേസമയം തിരഞ്ഞെടുത്ത് അവ എഡിറ്റ് ചെയ്യാനോ സംയോജിപ്പിക്കാനോ ഈ സംവിധാനം ഉപയോക്താക്കളെ സഹായിക്കുന്നു.

ജെമിനി അധിഷ്ഠിതമായ 'ക്രിയേറ്റ് യുവർ വിഡ്ജറ്റ്' എന്ന സവിശേഷമായ ഫീച്ചർ ഗൂഗിൾബുക്കിൽ ഉൾപ്പെടുത്തിയിട്ടുണ്ട്. ലളിതമായ നിർദ്ദേശങ്ങൾ നൽകിക്കൊണ്ട് ഉപയോക്താക്കൾക്ക് സ്വന്തമായി വിഡ്ജറ്റുകൾ നിർമ്മിക്കാൻ ഇതിലൂടെ സാധിക്കും. ഇന്റർനെറ്റിൽ തിരയാനും ജിമെയിൽ, കലണ്ടർ തുടങ്ങിയ ഗൂഗിൾ ആപ്പുകളുമായി ബന്ധിപ്പിക്കാനും ജെമിനിക്ക് കഴിയുന്നതിനാൽ, ഓരോ വ്യക്തിക്കും അനുയോജ്യമായ ഒരു ഡാഷ്‌ബോർഡ് ഇതിലൂടെ തയ്യാറാക്കാം. ഉദാഹരണത്തിന്, ഒരു കുടുംബയാത്ര പ്ലാൻ ചെയ്യുന്നവർക്ക് ബുക്കിംഗ് വിവരങ്ങളും യാത്രയിലേക്കുള്ള ദിവസങ്ങളുടെ എണ്ണവും അടങ്ങുന്ന ഒരു വിഡ്ജറ്റ് ഡെസ്ക്ടോപ്പിൽ തന്നെ സജ്ജീകരിക്കാം.

ആൻഡ്രോയിഡ് ഫോണുകളുമായി വളരെ എളുപ്പത്തിൽ പൊരുത്തപ്പെടുന്ന രീതിയിലാണ് ഗൂഗിൾബുക്ക് രൂപകൽപ്പന ചെയ്തിരിക്കുന്നത്. ഫോണും ലാപ്‌ടോപ്പും മാറി മാറി ഉപയോഗിക്കുന്നത് ഇത് കൂടുതൽ സൗകര്യപ്രദമാക്കുന്നു. ഫോണിലെ ആപ്പുകൾ ലാപ്‌ടോപ്പിൽ പ്രത്യേകം ഡൗൺലോഡ് ചെയ്യാതെ തന്നെ നേരിട്ട് ലാപ്‌ടോപ്പ് സ്ക്രീനിൽ ഉപയോഗിക്കാൻ സാധിക്കും. ഇതുവഴി, ഫോൺ കയ്യിലെടുക്കാതെ തന്നെ ലാപ്‌ടോപ്പിലൂടെ നിങ്ങളുടെ ഫോണിലെ ആപ്പ് വഴി ഭക്ഷണം ഓർഡർ ചെയ്യാൻ വരെ സാധിക്കും.

ഈ ലാപ്‌ടോപ്പുകളിൽ ക്വിക്ക് ആക്സസ് എന്ന ഫീച്ചറും ലഭ്യമാണ്. ആൻഡ്രോയിഡ് ഫോണുകളിൽ സേവ് ചെയ്തിട്ടുള്ള ഫയലുകൾ പ്രത്യേകം ട്രാൻസ്ഫർ ചെയ്യാതെ തന്നെ ലാപ്‌ടോപ്പിലെ ഫയൽ ബ്രൗസറിലൂടെ കാണാനും സെർച്ച് ചെയ്യാനും ഉപയോഗിക്കാനും ഇതിലൂടെ സാധിക്കും. മികച്ച നിലവാരമുള്ള വസ്തുക്കൾ ഉപയോഗിച്ചാണ് ഈ ഉപകരണങ്ങൾ നിർമ്മിക്കുന്നതെന്നും ഇവ വിവിധ ആകൃതികളിലും വലുപ്പങ്ങളിലും ലഭ്യമാകുമെന്നും കമ്പനി അറിയിച്ചു. കൂടാതെ, ലൈവ് ഇവന്റിൽ പ്രദർശിപ്പിച്ചത് പോലെ ഗ്ലോബാർ എന്ന സവിശേഷമായ ഡിസൈൻ എലമെന്റും ഗൂഗിൾബുക്ക് ലാപ്‌ടോപ്പുകളുടെ പ്രത്യേകതയായിരിക്കും.