ആപ്പിളിൻ്റെ ഏറ്റവും വിലകുറഞ്ഞ മാക്ബുക്ക് ലാപ്ടോപ്പുകൾ കളർഫുൾ ആയേക്കും; ലോഞ്ചിങ്ങ് മാർച്ചിലെന്നു റിപ്പോർട്ട്

താങ്ങാനാവുന്ന വിലയുള്ള മാക്ബുക്ക് പുറത്തിറക്കി നോൺ-പ്രീമിയം ലാപ്‌ടോപ്പ് വിഭാഗത്തിലേക്ക് പ്രവേശിക്കാൻ ആപ്പിൾ ഒരുങ്ങുന്നതായി റിപ്പോർട്ട്. സമീപകാല റിപ്പോർട്ടുകൾ പ്രകാരം, മാർച്ചിൽ നടക്കുന്ന ഒരു പ്രത്യേക പരിപാടിയിൽ കുപെർട്ടിനോ ആസ്ഥാനമായുള്ള ടെക്‌നോളജി ഭീമൻ ഈ ഉപകരണം ലോഞ്ച് ചെയ്യും. അഭ്യൂഹങ്ങൾ ശരിയാണെങ്കിൽ, ഇത് ആപ്പിളിന്റെ തന്ത്രങ്ങളിലെ ഒരു പ്രധാന മാറ്റമായിരിക്കും. കാരണം, പരമ്പരാഗതമായി കമ്പനി മാക്ബുക്ക് എയർ, മാക്ബുക്ക് പ്രോ ലൈനപ്പിന് കീഴിലുള്ള പ്രീമിയം ലാപ്‌ടോപ്പുകളിളാണ് ശ്രദ്ധ കേന്ദ്രീകരിച്ചിരുന്നത്. വിദ്യാർത്ഥികൾ, ആദ്യമായി മാക് വാങ്ങുന്നവർ, കൂടുതൽ ബജറ്റ്-ഫ്രണ്ട്ലി ആപ്പിൾ ലാപ്‌ടോപ്പ് തിരയുന്ന ഉപയോക്താക്കൾ എന്നിവരെ പുതിയ മോഡൽ ലക്ഷ്യമിടുന്നതായി പറയപ്പെടുന്നു. ആപ്പിൾ പതിവായുള്ള നേർത്ത ഷേഡുകൾക്ക് പകരം തിളക്കമുള്ളതും കൂടുതൽ രസകരവുമായ കളർ ഓപ്ഷനുകൾ പരീക്ഷിക്കാനും സാധ്യതയുണ്ട്. ഐഫോൺ 16 പ്രോ മോഡലുകൾക്ക് ശക്തി പകരുന്ന അതേ A18 പ്രോ ചിപ്‌സെറ്റ് ഈ ലാപ്‌ടോപ്പിൽ ഉപയോഗിക്കാമെന്നും റിപ്പോർട്ടുകൾ സൂചിപ്പിക്കുന്നു. ഇന്ത്യ പോലുള്ള പ്രദേശങ്ങളിലെ വിപണികളിൽ വലിയ മുന്നേറ്റമുണ്ടാക്കാൻ ഇതിലൂടെ ആപ്പിളിനു കഴിയും.

ആപ്പിളിൻ്റെ ബജറ്റ് മാക്ബുക്ക് മാർച്ചിൽ ലോഞ്ച് ചെയ്തേക്കും:

ബ്ലൂംബെർഗിന്റെ മാർക്ക് ഗുർമാൻ പറയുന്നതു പ്രകാരം അടുത്ത മാസം ആപ്പിൾ ഒരു ലോഞ്ച് ഇവന്റ് നടത്താനും അതിൽ ഈ പുതിയ മാക്ബുക്ക് പ്രധാന ഹൈലൈറ്റ് ആകാനും സാധ്യതയുണ്ട്. എന്നാൽ, ഇവന്റ് ലാപ്‌ടോപ്പിൽ മാത്രം ശ്രദ്ധ കേന്ദ്രീകരിക്കുമോ അതോ മറ്റ് ചില ഉപകരണങ്ങളും പ്രഖ്യാപിക്കുമോ എന്ന് ഇതുവരെ സ്ഥിരീകരിച്ചിട്ടില്ല.

പുതിയ മാക്ബുക്കിന്റെ വില 1,000 ഡോളറിൽ (ഏകദേശം 90,700 രൂപ) താഴെയായിരിക്കുമെന്ന് റിപ്പോർട്ട് അവകാശപ്പെടുന്നു. ഇത് സംഭവിക്കുകയാണെങ്കിൽ, നിലവിൽ ലഭ്യമായ ഏറ്റവും വില കുറഞ്ഞ മാക്ബുക്കായി ഇത് മാറും. ചെലവ് നിയന്ത്രിക്കാൻ, ആപ്പിൾ A18 പ്രോ ചിപ്‌സെറ്റ് ഉപയോഗിക്കാൻ പദ്ധതിയിടുന്നതായി റിപ്പോർട്ടുണ്ട്. ഐഫോൺ 16 പ്രോ മോഡലുകളിൽ ഉപയോഗിക്കുന്ന അതേ പ്രോസസറാണിത്. മിക്ക മാക്കുകളും ആപ്പിളിന്റെ എം-സീരീസ് ചിപ്പുകൾ ഉപയോഗിക്കുന്നതിനാൽ ഇതൊരു വ്യത്യസ്തമായ സമീപനമായിരിക്കും.

ലാപ്‌ടോപ്പിന് 13 ഇഞ്ചിൽ താഴെ വലിപ്പമുള്ള അൽപ്പം ചെറിയ ഡിസ്‌പ്ലേ ഉണ്ടാകുമെന്നും പറയപ്പെടുന്നു. അതിനാൽ മാക്ബുക്ക് എയർ, മാക്ബുക്ക് പ്രോ മോഡലുകളുമായി താരതമ്യപ്പെടുത്തുമ്പോൾ ഇത് കൂടുതൽ ഒതുക്കമുള്ളതാകും.

വില കുറവാണെങ്കിലും, ബ്രൗസിംഗ്, സ്ട്രീമിംഗ്, ഡോക്യുമെന്റ് എഡിറ്റിംഗ്, ലൈറ്റ് ക്രിയേറ്റീവ് വർക്ക് തുടങ്ങിയ ദൈനംദിന ജോലികൾക്കായുള്ള പ്രകടനത്തിൽ ആപ്പിൾ വിട്ടുവീഴ്ച ചെയ്യുമെന്ന് തോന്നുന്നില്ല.

ഡിസൈൻ, കളർ, പ്രതീക്ഷിക്കുന്ന സവിശേഷതകൾ:

ഏറ്റവും രസകരമായ മാറ്റങ്ങളിലൊന്ന് ഡിസൈനിലും കളർ ഓപ്ഷനുകളിലും ആകാം. ആപ്പിൾ പതിവായുള്ള നേർത്ത ഷേഡുകളായ സ്പേസ് ഗ്രേ, സിൽവർ എന്നിവയിൽ നിന്ന് മാറുകയാണെന്ന് റിപ്പോർട്ടുണ്ട്. പകരം, ലൈറ്റ് യെല്ലോ, ലൈറ്റ് ഗ്രീൻ, ബ്ലൂ, പിങ്ക്, ക്ലാസിക് സിൽവർ, ഡാർക്ക് ഗ്രേയ് എന്നിവയുൾപ്പെടെ തിളക്കമുള്ള, കൂടുതൽ രസകരമായ നിറങ്ങൾ പരീക്ഷിച്ചേക്കുമെന്നു പറയപ്പെടുന്നു. എന്നിരുന്നാലും, ഈ നിറങ്ങളെല്ലാം ലോഞ്ച് സമയത്തു ലഭ്യമായേക്കില്ല.

J700 എന്ന കോഡ് നാമത്തിൽ അറിയപ്പെടുന്ന പുതിയ മാക്ബുക്കിൽ അലുമിനിയം ചേസിസ് ഉണ്ടാകുമെന്ന് പ്രതീക്ഷിക്കുന്നു. ഉൽ‌പാദനച്ചെലവ് കുറയ്ക്കുന്നതിനായി ആപ്പിൾ ഒരു പുതിയ നിർമ്മാണ പ്രക്രിയ വികസിപ്പിച്ചെടുത്തു എന്നും റിപ്പോർട്ടുകളുണ്ട്. ശക്തമായ ബിൽഡ് ക്വാളിറ്റി നിലനിർത്തി തന്നെയാണ് കമ്പനിയുടെ നിലവിലുള്ള സാങ്കേതികതയേക്കാൾ വേഗതയേറിയതും കാര്യക്ഷമവുമായ ഈ രീതി നടപ്പിലാക്കുന്നത്.

സ്പെസിഫിക്കേഷനുകളുടെ കാര്യത്തിൽ, ലാപ്ടോപ്പിന് 8GB റാമും ദീർഘമായ ബാറ്ററി ലൈഫും വാഗ്ദാനം ചെയ്യുമെന്ന് മുൻ റിപ്പോർട്ട് അവകാശപ്പെട്ടു. പ്രീമിയം മാക്ബുക്കുകളിൽ സാധാരണയായി കാണപ്പെടുന്ന തണ്ടർബോൾട്ട് പോർട്ട് ഇതിൽ ഉൾപ്പെടണമെന്നില്ല. പകരം, ചാർജിംഗിനും ഡാറ്റ കൈമാറ്റത്തിനുമായി യുഎസ്ബി ടൈപ്പ്-സി പോർട്ടുകൾ ഉണ്ടായിരിക്കുമെന്ന് പ്രതീക്ഷിക്കുന്നു. ഇൻ്റേണൽ ഡിസ്പ്ലേ കണക്റ്റു ചെയ്യുമ്പോൾ ചില പരിമിതികളും ഉണ്ടാകാം.

ഈ റിപ്പോർട്ടുകൾ കൃത്യമാണെങ്കിൽ, ആപ്പിളിന്റെ കുറഞ്ഞ വിലയുള്ള പുതിയ മാക്ബുക്ക് കൂടുതൽ പ്രേക്ഷകരെ ആകർഷിക്കും. മികച്ച പ്രകടനം, പുതിയ നിറങ്ങൾ, താരതമ്യേന താങ്ങാനാവുന്ന വില എന്നിവ ഉപയോഗിച്ച്, മിഡ്-റേഞ്ച് ലാപ്‌ടോപ്പ് വിപണിയിൽ കൂടുതൽ ശക്തമായ മത്സരത്തിനാകും കമ്പനി ലക്ഷ്യമിടുന്നത്. ലോഞ്ച് ചെയ്യാൻ സാധ്യതയുള്ള തീയതി അടുക്കുമ്പോൾ കൂടുതൽ വിശദാംശങ്ങൾ പുറത്തുവരുമെന്ന് പ്രതീക്ഷിക്കുന്നു.