തീയേറ്റർ തോൽക്കും ഈ പവറിന് മുന്നിൽ! വയർലെസ് സറൗണ്ട് സ്പീക്കറുകളുമായി JBL ബാർ MK2

ജെബിഎല്ലിന്റെ (JBL) എൺപതാം വാർഷികത്തോട് അനുബന്ധിച്ച് പുതിയ 'ബാർ MK2' സൗണ്ട്ബാർ ശ്രേണി ഇന്ത്യൻ വിപണിയിലെത്തി. ബാർ 1300MK2, 1000MK2, 800MK2, 500MK2 എന്നിങ്ങനെ നാല് വേരിയന്റുകളാണ് ഈ പരമ്പരയിലുള്ളത്. അത്യാധുനികമായ ഡോൾബി അറ്റ്‌മോസ് (Dolby Atmos), മൾട്ടിബീം 3.0 (MultiBeam 3.0) സാങ്കേതികവിദ്യകൾ ഉപയോഗിച്ചിരിക്കുന്നതിനാൽ ഇവ മികച്ചൊരു സിനിമാറ്റിക് ശബ്ദാനുഭവം ഉറപ്പുനൽകുന്നു. പ്രീമിയം മോഡലുകളിൽ മാറ്റി വെക്കാവുന്ന (detachable) വയർലെസ് സറൗണ്ട് സ്പീക്കറുകൾ പ്രത്യേകമായി നൽകിയിട്ടുണ്ട്. ഓരോ മോഡലിനും അനുസരിച്ച് 750W മുതൽ 2,470W വരെ പവർ ഔട്ട്‌പുട്ട് ഇവ കാഴ്ചവെക്കുന്നു. കൂടാതെ, സ്മാർട്ട് ഡീറ്റെയിൽസ്, എഐ സൗണ്ട് ബൂസ്റ്റ്, പ്യുവർ വോയിസ് 2.0 തുടങ്ങിയ പുതിയ ഫീച്ചറുകളും ഇതിലുണ്ട്. സബ്‌വൂഫറിന്റെ വലിപ്പത്തിലും പവർ ഔട്ട്‌പുട്ടിലും ഓരോ മോഡലുകളും തമ്മിൽ മാറ്റമുണ്ടാകും.

ജെബിഎൽ ബാർ 1300MK2, 1000MK2, 800MK2, 500MK2: വിലയും ലഭ്യതയും

ജെബിഎൽ ബാർ 1300MK2-വിന് 1,74,999 രൂപയാണ് വില. ബാർ 1000MK2-വിന് 1,49,999 രൂപയും, ബാർ 800MK2-വിന് 1,24,999 രൂപയും, ബാർ 500MK2-വിന് 64,999 രൂപയുമാണ് വില വരുന്നത്. ഈ സൗണ്ട്ബാറുകൾ JBL.com, തിരഞ്ഞെടുത്ത റീട്ടെയിൽ സ്റ്റോറുകൾ, കൂടാതെ ഇന്ത്യയിലെ പ്രമുഖ ഇ-കൊമേഴ്‌സ് പ്ലാറ്റ്‌ഫോമുകൾ എന്നിവ വഴി ലഭ്യമാണ്.

 ഫീച്ചറുകളും സവിശേഷതകളും

ഈ നാല് മോഡലുകളും ഡോൾബി അറ്റ്‌മോസ് (Dolby Atmos), ഡിടിഎസ് (DTS) ഫോർമാറ്റുകൾ, ജെബിഎല്ലിന്റെ മൾട്ടിബീം 3.0 (MultiBeam 3.0) ടെക്നോളജി എന്നിവ പിന്തുണയ്ക്കുന്നു. ഉയർന്ന മോഡലായ ജെബിഎൽ ബാർ 1300MK2, 11.1.4 ചാനൽ സെറ്റപ്പിലൂടെയും ഡ്യുവൽ 8-ഇഞ്ച് സബ്‌വൂഫറിലൂടെയും 2,470W ഔട്ട്‌പുട്ട് നൽകുന്നു. അതേസമയം, ജെബിഎൽ ബാർ 1000MK2-വിൽ 10 ഇഞ്ച് സബ്‌വൂഫറോട് കൂടിയ 7.1.4 ചാനൽ സിസ്റ്റമാണുള്ളത്. ഇത് 960W ഔട്ട്‌പുട്ട് വാഗ്ദാനം ചെയ്യുന്നു.

ജെബിഎൽ ബാർ 800MK2 മോഡലിൽ 7.1 ചാനൽ കോൺഫിഗറേഷനും 10 ഇഞ്ച് സബ്‌വൂഫറും വഴി 780W ഔട്ട്‌പുട്ടാണ് ലഭിക്കുന്നത്. എന്നാൽ ബാർ 500MK2 പതിപ്പിൽ 5.1 ചാനൽ സെറ്റപ്പിലൂടെ 750W ഔട്ട്‌പുട്ട് ലഭ്യമാകും. ഈ പരമ്പരയിലെ 1300MK2, 1000MK2, 800MK2 എന്നീ മോഡലുകളുടെ പ്രധാന ആകർഷണം അതിലെ വയർലെസ് സറൗണ്ട് സ്പീക്കറുകൾ വേർപെടുത്താം (detachable) എന്നുള്ളതാണ്. എന്നാൽ 500MK2 മോഡലിൽ ഫിക്സഡ് സ്പീക്കറുകളാണ് നൽകിയിരിക്കുന്നത്. 1300MK2, 1000MK2 മോഡലുകൾ യഥാർത്ഥ ഡോൾബി അറ്റ്‌മോസ് അനുഭവം നൽകുന്നതിനായി അപ്പ്-ഫയറിംഗ് ഡ്രൈവറുകൾ ഉപയോഗിക്കുമ്പോൾ, 800MK2-ൽ ഡോൾബി അറ്റ്‌മോസിനൊപ്പം ഡിടിഎസ് വെർച്വൽ:എക്സ് സാങ്കേതികവിദ്യയാണ് ഉൾപ്പെടുത്തിയിരിക്കുന്നത്. എല്ലാ മോഡലുകളിലും ഓഡിയോ വ്യക്തതയ്ക്കായി 'സ്മാർട്ട് ഡീറ്റെയിൽസ്', 'പ്യുവർ വോയിസ് 2.0' ഫീച്ചറുകൾ ഉണ്ടെങ്കിലും, മികച്ച ബാസ് നൽകുന്ന 'എഐ സൗണ്ട് ബൂസ്റ്റ്' 1300MK2-ൽ മാത്രമാണുള്ളത്.

ജെബിഎൽ വൺ ആപ്പ് ഉപയോഗിച്ച് ഈ സൗണ്ട്ബാറുകൾ എളുപ്പത്തിൽ സെറ്റപ്പ് ചെയ്യാനും ഇക്യു ട്യൂണിംഗ് നടത്താനും സാധിക്കും. കൂടാതെ എയർപ്ലേ, ഗൂഗിൾ കാസ്റ്റ്, സ്പോട്ടിഫൈ കണക്ട് തുടങ്ങിയ സ്ട്രീമിംഗ് സേവനങ്ങളും വോയിസ് അസിസ്റ്റന്റ് പിന്തുണയും ഈ സൗണ്ട്ബാറുകൾ വാഗ്ദാനം ചെയ്യുന്നു.

കണക്റ്റിവിറ്റി പരിശോധിച്ചാൽ, HDMI eARC, HDMI ഇൻപുട്ടുകൾ, ബ്ലൂടൂത്ത് 5.3, വൈഫൈ, ഒപ്റ്റിക്കൽ ഇൻപുട്ട്, യുഎസ്ബി എന്നിവ ഈ സീരീസിലുണ്ട്. ഉയർന്ന മോഡലുകളിൽ ഒന്നിലധികം HDMI പോർട്ടുകളും 4K ഡോൾബി വിഷൻ പാസ്‌ത്രൂ പിന്തുണയും ലഭ്യമാണ്. നൈറ്റ് ലിസണിംഗ് മോഡ്, കുറഞ്ഞ വൈദ്യുതി ഉപയോഗം എന്നിവയ്‌ക്കൊപ്പം ഇതിലെ വേർപെടുത്താവുന്ന സ്പീക്കറുകൾ പോർട്ടബിൾ സ്പീക്കറുകളായും ഉപയോഗിക്കാം. ബാർ 1300MK2 മോഡലിൽ ഔറാകാസ്റ്റ് (Auracast) കണക്റ്റിവിറ്റിയുമുണ്ട്.

വലിപ്പത്തിന്റെ കാര്യത്തിൽ 1404 x 58 x 136 mm അളവിലാണ് 1300MK2 എത്തുന്നത്. ബാർ 1000MK2 (1203 x 52 x 128 mm), ബാർ 800MK2 (1163 x 52 x 128 mm), ബാർ 500MK2 (940 x 50.5 x 104 mm) എന്നിങ്ങനെയാണ് മറ്റ് മോഡലുകളുടെ അളവുകൾ. എല്ലാ മോഡലുകൾക്കൊപ്പവും വയർലെസ് സബ്‌വൂഫറുകൾ ലഭിക്കുമെന്ന് മാത്രമല്ല, മുറിയുടെ വിസ്തൃതിക്ക് അനുസൃതമായി ഓഡിയോ ക്രമീകരിക്കുന്ന 'റൂം കാലിബ്രേഷൻ' ഫീച്ചറും ജെബിഎൽ ഇതിൽ ഉൾപ്പെടുത്തിയിട്ടുണ്ട്.