ബോട്ട് ആവാന്റെ പ്രൈം എക്സ് സൗണ്ട്ബാർ പുറത്തിറക്കി; സവിശേഷതകളറിയാം

ഇന്ത്യയിലെ ആദ്യത്തെ ട്രൂലി വയർലെസ് സൗണ്ട്ബാറായി ബോട്ട് ആവാന്റെ പ്രൈം എക്സ് വിപണിയിലെത്തി. 7.1.4 ചാനൽ സറൗണ്ട് സൗണ്ട് സെറ്റപ്പും ഡോൾബി അറ്റ്‌മോസ് പിന്തുണയും നൽകുന്ന ഈ സിസ്റ്റം, വീട്ടിൽ തന്നെ ഒരു സിനിമാറ്റിക് അനുഭവം ഉറപ്പുനൽകുന്നു. വേർപെടുത്താവുന്ന രണ്ട് വയർലെസ് സാറ്റലൈറ്റ് സ്പീക്കറുകളും ഒരു വയർലെസ് സബ്‌വൂഫറും ഇതിനൊപ്പമുണ്ട്. മൊത്തം 700W RMS ഔട്ട്പുട്ട് നൽകുന്ന ഈ സൗണ്ട്ബാറിലെ സാറ്റലൈറ്റ് സ്പീക്കറുകൾക്ക് 4,500mAh ബാറ്ററി കരുത്തിൽ 14.5 മണിക്കൂർ വരെ പ്ലേബാക്ക് സമയം ലഭിക്കും. ബ്ലൂടൂത്ത് 5.3, HDMI eARC തുടങ്ങിയ ആധുനിക കണക്റ്റിവിറ്റി സൗകര്യങ്ങളുള്ള ഈ ഉൽപ്പന്നം 37,999 രൂപ പ്രാരംഭ വിലയിൽ ആമസോൺ, ഫ്ലിപ്കാർട്ട് എന്നിവയിലൂടെ ലഭ്യമാണ്. ക്രിക്കറ്റ് താരം വിരാട് കോഹ്‌ലി പങ്കെടുത്ത പ്രത്യേക കാമ്പെയ്‌നിലൂടെയാണ് ബോട്ട് ഈ പുതിയ സൗണ്ട്ബാർ അവതരിപ്പിച്ചത്.

ബോട്ട് ആവാന്റെ പ്രൈം എക്സ്: വിലയും ലഭ്യതയും

ഇന്ത്യയിലെ ആദ്യത്തെ ട്രൂലി വയർലെസ് സൗണ്ട്ബാറായ ബോട്ട് ആവാന്റെ പ്രൈം എക്സ് 37,999 രൂപ എന്ന പ്രാരംഭ വിലയിൽ വിപണിയിലെത്തി. ആദ്യ രണ്ട് ദിവസത്തേക്ക് മാത്രമാണ് ഈ പ്രത്യേക ഓഫർ വില ലഭ്യമാകുക. അതിനുശേഷം 39,999 രൂപയായിരിക്കും ഈ സൗണ്ട്ബാറിന്റെ വില. ബോട്ടിന്റെ ഔദ്യോഗിക വെബ്‌സൈറ്റ്, ആമസോൺ, ഫ്ലിപ്കാർട്ട് എന്നിവയ്ക്ക് പുറമെ രാജ്യത്തെ പ്രമുഖ റീട്ടെയിൽ ഷോപ്പുകൾ വഴിയും ഉപഭോക്താക്കൾക്ക് ഇത് സ്വന്തമാക്കാം.

ബോട്ട് ആവാന്റെ പ്രൈം എക്സ്: പ്രധാന ഫീച്ചറുകൾ

ഡോൾബി അറ്റ്‌മോസ് പിന്തുണയുള്ള 7.1.4 ചാനൽ സറൗണ്ട് സൗണ്ട് സിസ്റ്റവുമായാണ് ബോട്ട് ആവാന്റെ പ്രൈം എക്സ് വിപണിയിലിറങ്ങുന്നത്. ശബ്ദത്തിന് കൂടുതൽ ആഴവും വ്യക്തതയും നൽകുന്ന അപ്-ഫയറിംഗ് ഡ്രൈവറുകൾ, വയർലെസ് സബ്‌വൂഫർ, എളുപ്പത്തിൽ വേർപെടുത്താവുന്ന റിയർ സാറ്റലൈറ്റ് സ്പീക്കറുകൾ എന്നിവ ഇതിന്റെ പ്രത്യേകതയാണ്.

8 ഇഞ്ച് സബ്‌വൂഫർ ഡ്രൈവറും നിരവധി 2.25 ഇഞ്ച് ഡ്രൈവറുകളും അടങ്ങുന്ന ഈ ഓഡിയോ സിസ്റ്റം 700W പീക്ക് ഔട്ട്പുട്ട് വാഗ്ദാനം ചെയ്യുന്നു. 20Hz മുതൽ 20kHz വരെയുള്ള ഫ്രീക്വൻസി റേഞ്ച് ഇതിനുണ്ട്. സിനിമകൾ, സംഗീതം, സ്പോർട്സ്, ഗെയിമിംഗ് എന്നിവയ്ക്കായി പ്രത്യേക സൗണ്ട് മോഡുകളും ഇതിൽ ലഭ്യമാണ്. സൗണ്ട്ബാറിൽ നിന്ന് കാന്തികമായി വേർപെടുത്താവുന്ന സാറ്റലൈറ്റ് സ്പീക്കറുകൾ മുറിയുടെ ഏത് ഭാഗത്തും സൗകര്യപ്രദമായി വെക്കാമെന്നത് മികച്ച സറൗണ്ട് സൗണ്ട് അനുഭവം നൽകുന്നു.

4,500mAh ബാറ്ററിയുള്ള വയർലെസ് സാറ്റലൈറ്റ് സ്പീക്കറുകളാണ് ബോട്ട് ആവാന്റെ പ്രൈം എക്സിന്റ മറ്റൊരു ആകർഷണം. HDMI വഴി ഡോൾബി അറ്റ്‌മോസ് ഉപയോഗിക്കുമ്പോൾ 12 മണിക്കൂർ വരെയും, സാധാരണ സാഹചര്യങ്ങളിൽ 60 ശതമാനം വോളിയത്തിൽ 14.5 മണിക്കൂർ വരെയും പ്ലേബാക്ക് സമയം ഇവ നൽകുന്നു. ഡോൾബി ഇതര ഉള്ളടക്കങ്ങൾ പ്ലേ ചെയ്യുമ്പോൾ 7 മണിക്കൂർ വരെയാണ് ബാറ്ററി ലൈഫ് ലഭിക്കുക. ബ്ലൂടൂത്ത് 5.3, HDMI (e-ARC), USB, 3.5mm ഓക്സ്, ഒപ്റ്റിക്കൽ ഇൻപുട്ട് തുടങ്ങി വൈവിധ്യമാർന്ന കണക്റ്റിവിറ്റി ഓപ്ഷനുകളും ഇതിൽ ഒരുക്കിയിട്ടുണ്ട്.