AI ലോകത്തെ കാവലാളാകാൻ ഗൂഗിൾ; ഡാറ്റാ സുരക്ഷ ഉറപ്പാക്കാൻ പുതിയ ഗവേണൻസ് ടൂളുകൾ

ഗൂഗിൾ ക്ലൗഡ് നെക്സ്റ്റ് 2026-ൽ, ഗൂഗിൾ വർക്ക്‌സ്‌പേസിനായി (Google Workspace) ആർട്ടിഫിഷ്യൽ ഇന്റലിജൻസ് അധിഷ്ഠിതമായി പ്രവർത്തിക്കുന്ന വിപുലമായ മാറ്റങ്ങൾ ഗൂഗിൾ അവതരിപ്പിച്ചു. ഉൽപ്പാദനക്ഷമത വർദ്ധിപ്പിക്കുന്നതിനും മികച്ച രീതിയിലുള്ള സഹകരണം (Collaboration) ഉറപ്പാക്കുന്നതിനും മുൻഗണന നൽകുന്നതാണ് ഈ അപ്‌ഡേറ്റുകൾ. ഡോക്സ് (Docs), സ്ലൈഡ്‌സ് (Slides), ജിമെയിൽ (Gmail) തുടങ്ങിയ ആപ്പുകളിലെ ഫയലുകൾ, പ്രോജക്റ്റുകൾ, സഹപ്രവർത്തകർ എന്നിവ തമ്മിലുള്ള ബന്ധം വിശകലനം ചെയ്ത് സങ്കീർണ്ണമായ ജോലികൾ സ്വയം പ്രവർത്തിപ്പിക്കാൻ സഹായിക്കുന്ന 'വർക്ക്‌സ്‌പേസ് ഇന്റലിജൻസ്' (Workspace Intelligence) എന്ന സംവിധാനം കമ്പനി ഇതിലൂടെ പരിചയപ്പെടുത്തി. വർക്ക്‌സ്‌പേസിനെ കൂടുതൽ ബുദ്ധിപരവും ഓട്ടോമേറ്റഡും ആക്കാനുള്ള ഗൂഗിളിന്റെ ശ്രമങ്ങളുടെ ഭാഗമാണിതെങ്കിലും, ഇവ പൂർണ്ണമായി പുറത്തിറക്കുന്നതിന് മുൻപ് ചില മാറ്റങ്ങൾ കൂടി വന്നേക്കാം.

ഗൂഗിൾ മീറ്റ്, ഷീറ്റ്സ്, ജെമിനി: ക്ലൗഡ് നെക്സ്റ്റ് 2026-ൽ വൻ AI അപ്ഡേറ്റുകൾ

ഗൂഗിൾ മീറ്റിലെ ഏറ്റവും ജനപ്രിയമായ Take Notes for me ഫീച്ചർ ഇനി സാധാരണ വീഡിയോ കോളുകൾക്ക് പുറമെ നേരിട്ടുള്ള മീറ്റിംഗുകളിലും പ്രവർത്തിക്കുമെന്ന് കമ്പനി വെളിപ്പെടുത്തി. ഇത് കൂടാതെ സൂം, മൈക്രോസോഫ്റ്റ് ടീംസ് തുടങ്ങിയ പ്ലാറ്റ്‌ഫോമുകളിൽ നടത്തുന്ന മീറ്റിംഗുകളുടെ സംഗ്രഹങ്ങളും അതിൽ ചെയ്യേണ്ട കാര്യങ്ങളും രേഖപ്പെടുത്താൻ ഇനി ഈ ഫീച്ചറിലൂടെ സാധിക്കും. കഴിഞ്ഞ മാസത്തിൽ മാത്രം 11 കോടിയിലധികം ആളുകൾ ഈ സൗകര്യം ഉപയോഗിച്ചതായും ഗൂഗിൾ വ്യക്തമാക്കി.

ഗൂഗിൾ ഷീറ്റ്‌സിലും ജെമിനി അധിഷ്ഠിതമായ പുതിയ മാറ്റങ്ങൾ വരുന്നുണ്ട്. ഹബ്സ്പോട്ട്, സെയിൽസ്ഫോഴ്സ് തുടങ്ങിയ എക്സ്റ്റേണൽ പ്ലാറ്റ്‌ഫോമുകളിൽ നിന്ന് വിവരങ്ങൾ നേരിട്ട് ഷീറ്റുകളിലേക്ക് എത്തിക്കാൻ ഇനി എളുപ്പമാകും. കൂടാതെ, സ്പ്രെഡ്ഷീറ്റുകൾക്കുള്ളിൽ തന്നെ ഡാഷ്‌ബോർഡുകൾ, ഹീറ്റ് മാപ്പുകൾ, കാൻബൻ ബോർഡുകൾ തുടങ്ങിയവ നിർമ്മിക്കാൻ സഹായിക്കുന്ന പുതിയൊരു ക്യാൻവാസ് സംവിധാനവും ഇതിൽ ഉൾപ്പെടുത്തിയിട്ടുണ്ട്.

വർക്ക്‌സ്‌പേസ് സൗകര്യങ്ങൾ ഡെവലപ്പർമാർക്ക് കൂടി ലഭ്യമാക്കുന്നതിനായി പുതിയ MCP സർവർ സംവിധാനവും ഗൂഗിൾ അവതരിപ്പിച്ചു. ഇതുവഴി പുറത്തുനിന്നുള്ള ആപ്പുകൾക്കും AI ഏജന്റുകൾക്കും ഗൂഗിൾ ഡ്രൈവ്, ജിമെയിൽ, കലണ്ടർ, ചാറ്റ് എന്നിവയുമായി സുരക്ഷിതമായി ബന്ധപ്പെട്ട് പ്രവർത്തിക്കാൻ സാധിക്കും. ഇത്തരം സേവനങ്ങൾ എളുപ്പത്തിൽ സംയോജിപ്പിക്കുന്നതിനായി ഒരു കമാൻഡ്-ലൈൻ ഇന്റർഫേസും വികസിപ്പിച്ചുവരികയാണ്.

ഗൂഗിൾ വർക്ക്‌സ്‌പേസിലെ ദൈനംദിന ജോലികൾ ലഘൂകരിക്കുന്നതിനായി 'സ്കിൽസ്' (Skills) എന്ന പേരിൽ പുതിയ ഓട്ടോമേഷൻ ടൂളുകൾ ഗൂഗിൾ അവതരിപ്പിച്ചു. ഇൻവോയിസുകൾ പരിശോധിച്ച് പിഴവുകൾ കണ്ടെത്തുന്നത് പോലുള്ള സ്ഥിരം ജോലികൾ ഓട്ടോമേറ്റ് ചെയ്യാൻ ഇതിലൂടെ സാധിക്കും. ഗൂഗിൾ വിഡ്‌സ് (Google Vids) എന്ന വീഡിയോ ടൂളിൽ അവതാറുകൾക്കായി കൂടുതൽ കസ്റ്റമൈസേഷൻ ഫീച്ചറുകളും പുതിയ ഭാഷകളും ഉൾപ്പെടുത്തിയിട്ടുണ്ട്. കൂടാതെ, ജെമിനി എന്റർപ്രൈസ് ആപ്പ് വഴി കലണ്ടർ ഇവന്റുകളും ഡോക്സും നേരിട്ട് നിയന്ത്രിക്കാനുള്ള സൗകര്യവും ഗൂഗിൾ ഒരുക്കി. സുരക്ഷിതമായി വിവിധ വെബ്സൈറ്റുകളിലെ സങ്കീർണ്ണമായ ജോലികൾ വേഗത്തിൽ പൂർത്തിയാക്കാൻ സഹായിക്കുന്ന 'ഓട്ടോ-ബ്രൗസ്' (Auto-browse) എന്ന പുതിയ ഫീച്ചർ ക്രോം എന്റർപ്രൈസ് ഉപഭോക്താക്കൾക്കും ഇനി ലഭ്യമാകും.

സുരക്ഷാ രംഗത്ത്, എഐ സംവിധാനങ്ങൾ ഡാറ്റ കൈകാര്യം ചെയ്യുന്നത് നിരീക്ഷിക്കാനും നിയന്ത്രിക്കാനും അഡ്മിനിസ്ട്രേറ്റർമാരെ സഹായിക്കുന്ന പുതിയ ഗവേണൻസ് ടൂളുകൾ ഗൂഗിൾ അവതരിപ്പിച്ചു. അതീവ രഹസ്യസ്വഭാവമുള്ള വിവരങ്ങൾക്കായി ക്ലയന്റ്-സൈഡ് എൻക്രിപ്ഷനും ഡാറ്റാ റെസിഡൻസി ഓപ്ഷനുകളും കമ്പനി വിപുലീകരിച്ചു. കൂടാതെ, മൈക്രോസോഫ്റ്റ് 365-ൽ നിന്ന് ഗൂഗിൾ വർക്ക്‌സ്‌പേസിലേക്കുള്ള മാറ്റം കൂടുതൽ എളുപ്പമാക്കി. പുതിയ മൈഗ്രേഷൻ സംവിധാനം വഴി ഡാറ്റാ കൈമാറ്റം വേഗത്തിലാക്കാനും മൈക്രോസോഫ്റ്റ് ഓഫീസ് ഫയലുകളിൽ കൂടുതൽ സുഗമമായി ജോലി ചെയ്യാനും സാധിക്കും. ഈ ഫീച്ചറുകൾ വരും ആഴ്ചകളിൽ ഉപയോക്താക്കളിലേക്ക് എത്തിത്തുടങ്ങുമെന്ന് ഗൂഗിൾ അറിയിച്ചു.