ഒടിപി ഒഴിവാക്കാൻ ഗൂഗിൾ; ആൻഡ്രോയിഡിൽ 'വെരിഫൈഡ് ഇമെയിൽ' സംവിധാനം വരുന്നു

ആൻഡ്രോയിഡ് സ്മാർട്ട്ഫോണുകളിൽ ആപ്പുകൾ സൈൻ-അപ്പ് ചെയ്യുന്നത് കൂടുതൽ സുഗമമാക്കാൻ ഗൂഗിൾ പുതിയ മാറ്റങ്ങൾ അവതരിപ്പിക്കുന്നു. നിലവിൽ അക്കൗണ്ടുകൾ തുടങ്ങാൻ ആവശ്യമായ ഒടിപി (OTP), ഇമെയിൽ ലിങ്കുകൾ എന്നിവയ്ക്ക് പകരം ഫോണിൽ തന്നെയുള്ള വെരിഫിക്കേഷൻ സംവിധാനമാണ് ഗൂഗിൾ പരീക്ഷിക്കുന്നത്. ഇത് സൈൻ-അപ്പ് നടപടികൾ വേഗത്തിലാക്കാൻ സഹായിക്കും. സുരക്ഷാ ക്രമീകരണങ്ങളിൽ വിട്ടുവീഴ്ച ചെയ്യാതെ തന്നെ, ആപ്പുകൾക്കിടയിലുള്ള മാറി മാറി ഉപയോഗിക്കേണ്ടി വരുന്ന ബുദ്ധിമുട്ട് ഒഴിവാക്കി ഉപയോക്താക്കൾക്ക് മെച്ചപ്പെട്ട അനുഭവം നൽകുകയാണ് ഇതിലൂടെ ലക്ഷ്യമിടുന്നത്. ഈ മാറ്റം വരുന്നതോടെ ആപ്പുകളിലെ വെരിഫിക്കേഷൻ രീതികൾ കൂടുതൽ ലളിതവും കാര്യക്ഷമവുമായി മാറും.

ആൻഡ്രോയിഡ് ആപ്പുകളിൽ ഇനി ഒടിപി ഇല്ലാതെ സൈൻ-അപ്പ് ചെയ്യാം

ആൻഡ്രോയിഡ് ഉപയോക്താക്കൾക്കായി സൈൻ-അപ്പ് നടപടികൾ ലളിതമാക്കുന്ന 'വെരിഫൈഡ് ഇമെയിൽ' (Verified Email) എന്ന പുതിയ ഫീച്ചർ ഗൂഗിൾ അവതരിപ്പിക്കുന്നു. ക്രെഡൻഷ്യൽ മാനേജർ വഴി പ്രവർത്തിക്കുന്ന ഈ സംവിധാനം നിലവിൽ വരുന്നതോടെ, ആപ്പുകളിൽ അക്കൗണ്ട് തുടങ്ങുമ്പോൾ ഒടിപി കോഡുകൾക്കോ ഇമെയിൽ ലിങ്കുകൾക്കോ വേണ്ടി കാത്തിരിക്കേണ്ടി വരില്ല. ഫോണിൽ നേരത്തെ തന്നെയുള്ള സുരക്ഷിതമായ ക്രെഡൻഷ്യലുകൾ ഉപയോഗിച്ച് ഇമെയിൽ വിലാസം തൽക്ഷണം സ്ഥിരീകരിക്കാൻ ഈ സംവിധാനം ആപ്പുകളെ സഹായിക്കും.

വെരിഫിക്കേഷൻ കോഡുകൾ പരിശോധിക്കുന്നതിനായി നിലവിൽ ഉപയോഗിച്ചുകൊണ്ടിരിക്കുന്ന ആപ്പിൽ നിന്ന് പുറത്തുകടന്ന് ജിമെയിലോ മെസേജുകളോ തുറക്കേണ്ട ആവശ്യം ഇനി ഉണ്ടാകില്ല. പകരം, സൈൻ-അപ്പ് സമയത്ത് സ്ക്രീനിൽ തെളിയുന്ന വിൻഡോയിലൂടെ (Native Prompt) ആപ്പിന് ആവശ്യമായ വിവരങ്ങൾ ഏതൊക്കെയാണെന്ന് ഉപയോക്താവിന് മനസ്സിലാക്കാം. ഒറ്റ ടാപ്പിലൂടെ ഈ വിവരങ്ങൾ കൈമാറുന്നതോടെ ലോഗിൻ നടപടികൾ വേഗത്തിൽ പൂർത്തിയാകും.

ഉയർന്ന സുരക്ഷ ഉറപ്പാക്കുന്നതിനായി ക്രിപ്റ്റോഗ്രാഫിക് രീതിയിൽ സാക്ഷ്യപ്പെടുത്തിയ വിവരങ്ങളാണ് ഈ പ്രക്രിയക്കായി ഉപയോഗിക്കുന്നത്. ഉപയോക്താവിന്റെ കൃത്യമായ അനുമതിയോടുകൂടി മാത്രമേ വിവരങ്ങൾ കൈമാറാൻ സാധിക്കൂ എന്നതിനാൽ സ്വകാര്യതയെക്കുറിച്ച് ആശങ്കപ്പെടേണ്ടതില്ല. പങ്കുവെക്കാൻ പോകുന്ന വിവരങ്ങളെക്കുറിച്ച് മുൻകൂട്ടി വ്യക്തമാക്കുന്ന സംവിധാനം ഇതിൽ ഉൾപ്പെടുത്തിയിട്ടുണ്ടെന്ന് ഗൂഗിൾ വ്യക്തമാക്കി.

പുതിയ സൈൻ-അപ്പുകൾക്ക് പുറമെ, അക്കൗണ്ട് റിക്കവറി (Account Recovery), മറ്റ് സുപ്രധാന ഇടപാടുകൾ എന്നിവ ലളിതമാക്കാനും ഈ വെരിഫൈഡ് ഇമെയിൽ സംവിധാനം സഹായിക്കും. റിക്കവറി ഇമെയിലുകൾക്കായി തിരയുന്ന ബുദ്ധിമുട്ടില്ലാതെ തന്നെ ഉപയോക്താക്കൾക്ക് തങ്ങളുടെ അക്കൗണ്ടുകൾ വീണ്ടെടുക്കാനാകും. കൂടാതെ, അക്കൗണ്ട് വിവരങ്ങളിൽ മാറ്റം വരുത്തുമ്പോഴോ പണമിടപാടുകൾ സ്ഥിരീകരിക്കുമ്പോഴോ പെട്ടെന്നുള്ള വെരിഫിക്കേഷൻ നടത്താൻ ആപ്പുകൾക്ക് ഇതിലൂടെ സാധിക്കും.

എങ്കിലും, സാങ്കേതിക തടസ്സങ്ങൾ കാരണം സിസ്റ്റത്തിന് വിവരങ്ങൾ ശേഖരിക്കാൻ കഴിയാത്ത സാഹചര്യമുണ്ടായാൽ ഒടിപി അല്ലെങ്കിൽ മാനുവൽ ഇമെയിൽ എൻട്രി പോലുള്ള പഴയ രീതികൾ പകരമായി നിലനിർത്താൻ ഗൂഗിൾ ഡെവലപ്പർമാർക്ക് നിർദ്ദേശം നൽകുന്നുണ്ട്. ഇമെയിൽ വെരിഫിക്കേഷൻ കഴിഞ്ഞാലുടൻ തന്നെ ഭാവിയിലെ ലോഗിനുകൾ കൂടുതൽ സുരക്ഷിതമാക്കാൻ 'പാസ്‌കീ' (Passkey) സെറ്റ് ചെയ്യാൻ ഉപയോക്താക്കളെ പ്രോത്സാഹിപ്പിക്കണമെന്നും ഗൂഗിൾ ശുപാർശ ചെയ്യുന്നു.

നിലവിൽ വ്യക്തിഗത ഗൂഗിൾ അക്കൗണ്ടുകൾക്ക് മാത്രമാണ് ഈ സേവനം ലഭ്യമാകുക. ഗൂഗിൾ പ്ലേ സർവീസസ് അപ്‌ഡേറ്റ് ചെയ്ത, ആൻഡ്രോയിഡ് 9-നോ അതിന് മുകളിലോ പ്രവർത്തിക്കുന്ന ഫോണുകളിൽ ഈ ഫീച്ചർ ഉപയോഗിക്കാം. ഡെവലപ്പർമാർ എത്ര വേഗത്തിൽ ഈ സംവിധാനം തങ്ങളുടെ ആപ്പുകളിൽ ഉൾപ്പെടുത്തുന്നു എന്നതിനെ ആശ്രയിച്ചിരിക്കും ഇതിന്റെ വ്യാപകമായ ഉപയോഗം.