ഡിജിറ്റൽ ക്ലോസറ്റായി ഗൂഗിൾ ഫോട്ടോസ് വസ്ത്രങ്ങൾ പരീക്ഷിക്കാൻ പുതിയ എഐ ഫീച്ചർ

ഗൂഗിൾ ഫോട്ടോസിൽ ഉപയോക്താക്കൾക്ക് വസ്ത്രങ്ങൾ തിരഞ്ഞെടുക്കാൻ സഹായിക്കുന്ന പുതിയ ആർട്ടിഫിഷ്യൽ ഇന്റലിജൻസ് ഫീച്ചർ ഉടൻ എത്തുന്നു. ഇതിലുള്ള വിവിധ എഐ ടൂളുകൾ ഉപയോഗിച്ച് ഉപയോക്താക്കൾക്ക് തങ്ങളുടെ വസ്ത്രശേഖരം ഡിജിറ്റലൈസ് ചെയ്യാനും, നേരിട്ട് ധരിക്കാതെ തന്നെ വസ്ത്രങ്ങൾ മിക്സ് ആൻഡ് മാച്ച് ചെയ്ത് പുതിയ വസ്ത്രധാരണ രീതികൾ പരീക്ഷിക്കാനും സാധിക്കും. ഈ ഫീച്ചർ ആൻഡ്രോയിഡ്, ഐഒഎസ് പ്ലാറ്റ്‌ഫോമുകളിൽ ലഭ്യമാകും. ആൻഡ്രോയിഡിലാണ് ഇത് ആദ്യം എത്തുന്നത്. വരും മാസങ്ങളിൽ ആഗോള വിപണിയിൽ എത്തുന്ന മോട്ടോറോള റേസർ 2026 സീരീസിൽ ഈ സൗകര്യം മുൻകൂട്ടി ലഭ്യമാകും.

ഗൂഗിൾ ഫോട്ടോസിലേക്ക് വാർഡ്‌റോബ് ഫീച്ചർ എത്തുന്നു

ഗൂഗിൾ ഫോട്ടോസിൽ പുതിയ എഐ ഫീച്ചർ കൊണ്ടുവരുന്നതായി ഗൂഗിൾ ഔദ്യോഗിക ബ്ലോഗിലൂടെ അറിയിച്ചു. ഈ ഫീച്ചർ എപ്പോൾ പുറത്തിറങ്ങുമെന്ന് കമ്പനി വ്യക്തമാക്കിയിട്ടില്ലെങ്കിലും, ഈ വേനൽക്കാലത്ത് ലഭ്യമാക്കുമെന്ന് അറിയിച്ചിട്ടുണ്ട്. ആൻഡ്രോയിഡ് ഉപയോക്താക്കൾക്കായിരിക്കും ഇത് ആദ്യം ലഭിക്കുക, തുടർന്ന് ഐഒഎസിലും എത്തും. ഈ സേവനം സൗജന്യമായിരിക്കുമോ അതോ ഗൂഗിൾ എഐ പ്രോ/അൾട്രാ സബ്സ്ക്രിപ്ഷനോ അല്ലെങ്കിൽ അനുയോജ്യമായ പിക്സൽ ഫോണോ ആവശ്യമായി വരുമോ എന്ന കാര്യത്തിൽ വ്യക്തതയില്ല.

നാനോ ബനാന, വിർച്വൽ ട്രൈ ഓൺ എന്നീ സാങ്കേതികവിദ്യകൾ സംയോജിപ്പിച്ചാണ് വാർഡ്‌റോബ് പ്രവർത്തിക്കുന്നത്. ഇതിലൂടെ ഉപയോക്താക്കൾക്ക് തങ്ങളുടെ വസ്ത്രശേഖരം ഡിജിറ്റൽ രൂപത്തിലാക്കാനും, വ്യത്യസ്ത വസ്ത്രങ്ങൾ മാറ്റിപ്പരീക്ഷിച്ച് പുതിയ വസ്ത്രധാരണ രീതികൾ കണ്ടെത്താനും സാധിക്കും. ഗൂഗിൾ ഫോട്ടോസിലെ കളക്ഷൻസ് വിഭാഗത്തിൽ പ്രത്യേകമായി ഈ സൗകര്യം ലഭ്യമാകും. ഉപയോക്താക്കൾ സേവ് ചെയ്തിട്ടുള്ള ഫോട്ടോകൾ സ്കാൻ ചെയ്ത് അതിലെ വസ്ത്രങ്ങൾ എഐ തന്നെ സ്വയം തിരിച്ചറിയും.

ഈ ഫീച്ചർ വസ്ത്രങ്ങളുടെ സ്‌നാപ്പ്‌ഷോട്ട് പതിപ്പുകൾ തയ്യാറാക്കി പ്രത്യേക ചിത്രങ്ങളായി സേവ് ചെയ്യുന്നു. അതായത്, നിങ്ങൾ ഒരു വസ്ത്രം ധരിച്ച് ഫോട്ടോ എടുത്ത് ഗൂഗിൾ ഫോട്ടോസിൽ സൂക്ഷിച്ചിട്ടുണ്ടെങ്കിൽ, എഐ അത് തിരിച്ചറിഞ്ഞ് ഈ പ്രത്യേക വിഭാഗത്തിൽ പട്ടികപ്പെടുത്തും. ഇത് ഉപയോക്താവിനായി ഒരു ഡിജിറ്റൽ ക്ലോസറ്റ് പോലെ പ്രവർത്തിക്കുന്നു. വാർഡ്‌റോബിന്റെ പ്രവർത്തനം മെച്ചപ്പെടുത്താനായി ഹാംഗർ ഐക്കണോട് കൂടിയ ക്രിയേറ്റ് ഫ്ലോട്ടിംഗ് ആക്ഷൻ ബട്ടണും നൽകിയിട്ടുണ്ട്. ഇതിൽ ടാപ്പ് ചെയ്യുമ്പോൾ വരുന്ന ബോട്ടം ഷീറ്റ് ഉപയോഗിച്ച് വ്യത്യസ്ത വസ്ത്രങ്ങൾ മിക്സ് ആൻഡ് മാച്ച് ചെയ്ത് പുതിയ ലുക്ക് തയ്യാറാക്കാം. എളുപ്പത്തിനായി ടോപ്പുകൾ, ബോട്ടമുകൾ, സ്കർടുകൾ, ഡ്രസ്സുകൾ എന്നിങ്ങനെ തരംതിരിച്ച് വസ്ത്രങ്ങൾ ഫിൽട്ടർ ചെയ്യാനും സാധിക്കും. വസ്ത്രങ്ങൾ തിരഞ്ഞെടുത്ത് ട്രൈ ഇറ്റ് ഓൺ ബട്ടണിൽ ക്ലിക്ക് ചെയ്താൽ, ആ വസ്ത്രം നിങ്ങൾക്ക് ഇണങ്ങുമോ എന്ന് വെർച്വലായി നോക്കി മനസ്സിലാക്കാം. ഗൂഗിൾ ഫോട്ടോസ് ആപ്പിനുള്ളിലെ ഗെറ്റ് റെഡി വിത്ത് മി എന്ന ട്രെൻഡിന്റെ എഐ പതിപ്പാണിത്.