ജെമിനി എഐ കരുത്തിൽ ഗൂഗിൾ ഹെൽത്ത് കോച്ച്; വെയറബിൾ ഉപകരണങ്ങളിൽ ഇനി വലിയ മാറ്റങ്ങൾ വരുന്നു

ഗൂഗിൾ ഹെൽത്ത് കോച്ച് അവതരിപ്പിക്കുന്നതിനൊപ്പം തങ്ങളുടെ ആരോഗ്യ സേവനങ്ങളിൽ വലിയ മാറ്റങ്ങൾ ഗൂഗിൾ കൊണ്ടുവരുന്നു. ഇതിന്റെ ഭാഗമായി ഫിറ്റ്ബിറ്റ് ആപ്പിന്റെ പേര് ഗൂഗിൾ ഹെൽത്ത് എന്ന് മാറ്റുകയും ഫിറ്റ്‌നസ്, ഉറക്കം, ആരോഗ്യം എന്നിവ ഒരൊറ്റ പ്ലാറ്റ്‌ഫോമിൽ ലഭ്യമാക്കുകയും ചെയ്യും. ജെമിനി എഐ മോഡലുകൾ ഉപയോഗിച്ച് പ്രവർത്തിക്കുന്ന ഹെൽത്ത് കോച്ച്, ഉപയോക്താക്കളുടെ ശാരീരിക പ്രവർത്തനങ്ങളും ജീവിതശൈലിയും വിശകലനം ചെയ്ത് ആവശ്യമായ നിർദ്ദേശങ്ങൾ നൽകും. മെച്ചപ്പെട്ട ട്രാക്കിംഗ് ഫീച്ചറുകളും എഐ അധിഷ്ഠിത സഹായവും പുതിയ അപ്‌ഡേറ്റിൽ ഉൾപ്പെടുന്നു.

ഗൂഗിൾ ഹെൽത്ത് പ്രീമിയം നിരക്കുകൾ

മെയ് 19 മുതൽ ലഭ്യമാകുന്ന ഹെൽത്ത് കോച്ച് സേവനം മെയ് 26-ഓടെ എല്ലാ ഉപയോക്താക്കളിലും എത്തും. ഗൂഗിൾ ഹെൽത്ത് പ്രീമിയം (മുമ്പ് ഫിറ്റ്ബിറ്റ് പ്രീമിയം) വരിക്കാർക്കാണ് ഈ സേവനം ലഭിക്കുക. ഇന്ത്യയിൽ ഇതിന് മാസം 99 രൂപയോ വർഷത്തേക്ക് 999 രൂപയോ ആണ് ഈടാക്കുന്നത്. എന്നാൽ ഗൂഗിൾ എഐ പ്രോ, അൾട്രാ പ്ലാൻ ഉള്ളവർക്ക് അധിക ചിലവില്ലാതെ ഇത് ഉപയോഗിക്കാം.

പുതിയ ആപ്പിൽ ടുഡേ, ഫിറ്റ്‌നസ്, സ്ലീപ്പ്, ഹെൽത്ത് എന്നിങ്ങനെ നാല് വിഭാഗങ്ങൾ ഉണ്ടായിരിക്കും. മെയ് 19 മുതൽ പുറത്തിറങ്ങുന്ന ഓട്ടോമാറ്റിക് അപ്‌ഡേറ്റിലൂടെ ഫിറ്റ്ബിറ്റ്, പിക്സൽ വാച്ച് ഉപയോക്താക്കൾക്ക് പുതിയ ഗൂഗിൾ ഹെൽത്ത് ആപ്പ് ലഭിച്ചു തുടങ്ങും.

ഗൂഗിൾ ഹെൽത്ത് ആപ്പിലെ 'ടുഡേ' ടാബ് ഹെൽത്ത് കോച്ച് നൽകുന്ന നിർദ്ദേശങ്ങളുടെ പ്രധാന കേന്ദ്രമായി പ്രവർത്തിക്കും. വ്യായാമം, ഉറക്കം, ലൊക്കേഷൻ, പ്രാദേശിക കാലാവസ്ഥ എന്നിവ വിശകലനം ചെയ്ത് ഓരോ വ്യക്തിക്കും അനുയോജ്യമായ ആരോഗ്യ നിർദ്ദേശങ്ങൾ നൽകാൻ ഈ സംവിധാനത്തിന് സാധിക്കും.

ഫിറ്റ്‌നസ്, സ്ലീപ്പ്, ഹെൽത്ത് ടാബുകളിലും പുതിയ മാറ്റങ്ങൾ വരുത്തിയിട്ടുണ്ട്. ഫിറ്റ്‌നസ് വിഭാഗത്തിൽ വ്യക്തിഗത വർക്കൗട്ട് പ്ലാനുകളും ലളിതമായ ഭാഷയിൽ വർക്കൗട്ടുകൾ തയ്യാറാക്കാനുള്ള സൗകര്യവും ലഭ്യമാണ്. ഉറക്കത്തിന്റെ കൃത്യതയും ശാരീരിക വീണ്ടെടുപ്പും ട്രാക്ക് ചെയ്യാൻ സ്ലീപ്പ് ടാബ് സഹായിക്കുമ്പോൾ, ആരോഗ്യവിവരങ്ങളുടെ ലളിതമായ സംഗ്രഹം ഹെൽത്ത് ടാബിൽ കാണാം.

ആർത്തവചക്രം, പോഷകാഹാരം, മാനസികാരോഗ്യം എന്നിവയുമായി ബന്ധപ്പെട്ട ഫീച്ചറുകളും ഗൂഗിൾ പരിഷ്കരിച്ചു. ആർത്തവചക്രത്തിലെ മാറ്റങ്ങൾ ഉറക്കത്തെയും വ്യായാമത്തെയും എങ്ങനെ ബാധിക്കുന്നു എന്ന് വിശകലനം ചെയ്യാൻ ഹെൽത്ത് കോച്ചിന് കഴിയും. ശബ്ദം, ചിത്രങ്ങൾ, പിഡിഎഫ് രേഖകൾ എന്നിവ ഉപയോഗിച്ച് വിവരങ്ങൾ രേഖപ്പെടുത്താനുള്ള സൗകര്യവും ഇതിലുണ്ട്.

വിവിധ വെയറബിൾ ഉപകരണങ്ങൾ, ഹെൽത്ത് കണക്ട്, ആപ്പിൾ ഹെൽത്ത് എന്നിവയിൽ നിന്നുള്ള വിവരങ്ങൾ ഈ ഒരൊറ്റ പ്ലാറ്റ്‌ഫോമിൽ ലഭ്യമാകും. ആരോഗ്യവിദഗ്ധരുടെയും കായിക ശാസ്ത്രജ്ഞരുടെയും മേൽനോട്ടത്തിൽ ജെമിനി മോഡലുകൾ ഉപയോഗിച്ചാണ് ഹെൽത്ത് കോച്ച് വികസിപ്പിച്ചത്. സ്വന്തം ആരോഗ്യവിവരങ്ങൾ നിയന്ത്രിക്കാനും ഡിലീറ്റ് ചെയ്യാനുമുള്ള അധികാരം ഉപയോക്താക്കൾക്ക് തന്നെയായിരിക്കും. ആദ്യഘട്ടത്തിൽ ഫിറ്റ്ബിറ്റ്, പിക്സൽ വാച്ച് ഉപകരണങ്ങളിലാണ് ഈ സേവനം ലഭിക്കുക.