വില മാറില്ല, സ്റ്റോറേജ് കൂടും! ഗൂഗിൾ എഐ പ്രോ പ്ലാനിൽ 5TB സ്റ്റോറേജുമായി ഗൂഗിളിന്റെ വമ്പൻ സർപ്രൈസ്.

ഗൂഗിൾ എഐ പ്രോ (Google AI Pro) സബ്‌സ്‌ക്രിപ്‌ഷൻ പ്ലാനിലെ ആനുകൂല്യങ്ങൾ വർധിപ്പിക്കുന്നതായി ഗൂഗിൾ വ്യാഴാഴ്ച അറിയിച്ചു. ഈ പ്ലാൻ തിരഞ്ഞെടുത്തവർക്ക് ഇനി മുതൽ അധിക ചിലവില്ലാതെ തന്നെ കൂടുതൽ ക്ലൗഡ് സ്റ്റോറേജ് ലഭിക്കുമെന്ന് കമ്പനി വ്യക്തമാക്കി. ഗൂഗിളിന്റെ അത്യാധുനിക ആർട്ടിഫിഷ്യൽ ഇന്റലിജൻസ് (AI) ടൂളുകൾക്കൊപ്പം ക്ലൗഡ് സ്റ്റോറേജ് സൗകര്യങ്ങളും ലഭ്യമാകുന്ന ഈ സബ്‌സ്‌ക്രിപ്‌ഷന്റെ മൂല്യം പുതിയ അപ്‌ഡേറ്റിലൂടെ ഗണ്യമായി വർധിച്ചിട്ടുണ്ട്. ഉപയോക്താക്കൾക്ക് ഈ സേവനം ഇപ്പോൾ ലഭ്യമായിത്തുടങ്ങി.

ഗൂഗിൾ എഐ പ്രോയിൽ ഇനി കൂടുതൽ ക്ലൗഡ് സ്റ്റോറേജ്

പുതിയ അപ്‌ഡേറ്റിലൂടെ ഗൂഗിൾ എഐ പ്രോ പ്ലാൻ വരിക്കാർക്ക് ഇനി മുതൽ 5TB ക്ലൗഡ് സ്റ്റോറേജ് ലഭിക്കും. നേരത്തെ ഇത് 2TB ആയിരുന്നു. ഗൂഗിൾ വൺ മേധാവി ഷിമ്രിത് ബെൻ-യെയർ എക്സിലൂടെ (X) ആണ് ഈ വിവരം അറിയിച്ചത്. ഗൂഗിൾ ഡ്രൈവ്, ജിമെയിൽ, ഗൂഗിൾ ഫോട്ടോസ് തുടങ്ങിയ എല്ലാ ഗൂഗിൾ സേവനങ്ങളിലും ഈ അധിക സ്റ്റോറേജ് ഉപയോഗിക്കാം.

ഫോണിൽ ധാരാളം വീഡിയോകളും ചിത്രങ്ങളും രേഖകളും സൂക്ഷിക്കുന്നവർക്ക് ഈ വർധിപ്പിച്ച സ്റ്റോറേജ് വലിയ ആശ്വാസമാകും.

ഈ സ്റ്റോറേജ് വർദ്ധനവിനായി ഉപയോക്താക്കൾ അധിക പണം നൽകേണ്ടതില്ല എന്നതാണ് ശ്രദ്ധേയമായ കാര്യം. ഇന്ത്യയിൽ നിലവിലുള്ള നിരക്കായ മാസം 1,950 രൂപയ്ക്കോ അല്ലെങ്കിൽ വർഷം 19,500 രൂപയ്ക്കോ തന്നെ ഈ സേവനം തുടന്നും ലഭിക്കും. എഐ ഉപയോഗിച്ച് നിർമ്മിക്കുന്ന വലിയ വീഡിയോകളും ചിത്രങ്ങളും ഡോക്യുമെന്റുകളും സൂക്ഷിക്കുന്നവർക്ക് ഈ അധിക സ്റ്റോറേജ് വലിയ സഹായമാകും.

ഗൂഗിൾ ഡ്രൈവിലും ഫോട്ടോസിലും സ്റ്റോറേജ് പരിധി വർദ്ധിച്ചതായി ഗാഡ്‌ജെറ്റ്‌സ് 360 സ്ഥിരീകരിച്ചിട്ടുണ്ട്. നിലവിൽ പണമടച്ച് പ്ലാൻ എടുത്തവർക്കും ഗൂഗിൾ സ്റ്റുഡന്റ് ഓഫർ, ജിയോ കോംപ്ലിമെന്ററി ഓഫർ എന്നിവ വഴി സബ്‌സ്‌ക്രിപ്‌ഷൻ ലഭിച്ചവർക്കും ഈ പുതിയ ആനുകൂല്യം ആസ്വദിക്കാം.

ഗൂഗിൾ എഐ പ്രോ പ്ലാൻ ആനുകൂല്യങ്ങളും ഫീച്ചറുകളും

ഗൂഗിളിന്റെ എഐ പ്രോ പ്ലാനിലൂടെ ജെമിനി (Gemini), ഡീപ്പ് റിസർച്ച് ഓൺ ജെമിനി (Deep Research on Gemini) എന്നീ എഐ മോഡലുകൾ ഉപയോഗിക്കാൻ സാധിക്കും. ഗൂഗിളിന്റെ ഏറ്റവും പുതിയ വിയോ (Veo) മോഡൽ ഉപയോഗിച്ച് വീഡിയോകൾ നിർമ്മിക്കാനും, വിസ്കിലെ (Whisk) വിയോ 2 വഴി ചിത്രങ്ങളെ വീഡിയോകളാക്കി മാറ്റാനുള്ള പരിധി വർധിപ്പിക്കാനും വരിക്കാർക്ക് കഴിയും. കൂടാതെ വെർട്ടെക്സ് എഐയിലെ (Vertex AI) വിയോ 3 ഫാസ്റ്റ് (Veo 3 Fast) ഉപയോഗിക്കാനുള്ള പരിമിതമായ സൗകര്യവും ഇതിലൂടെ ലഭിക്കുമെന്ന് കമ്പനി അറിയിച്ചു.

വിദ്യാർത്ഥികൾക്ക് പ്രതിമാസം 1,000 എഐ ക്രെഡിറ്റുകൾ ലഭിക്കും. ഫ്ലോ (Flow), വിസ്ക് (Whisk) പ്ലാറ്റ്‌ഫോമുകളിലെ ടെക്സ്റ്റ്, ഇമേജ്, വീഡിയോ ജനറേഷൻ ആവശ്യങ്ങൾക്കായി ഇവ ഉപയോഗിക്കാം. നോട്ട്ബുക്ക് എൽഎമ്മിൽ (NotebookLM) ഓഡിയോ ഓവർവ്യൂകൾ, നോട്ട്ബുക്കുകൾ എന്നിവ നിർമ്മിക്കുന്നതിനായുള്ള പരിധി അഞ്ച് മടങ്ങ് വരെ വർദ്ധിപ്പിച്ചതായും ഗൂഗിൾ അറിയിച്ചു. ഇതിനുപുറമെ ഡോക്സ്, ഷീറ്റ്‌സ്, സ്ലൈഡ്‌സ് തുടങ്ങിയ ഗൂഗിൾ ആപ്പുകളിൽ ജെമിനി എഐ സേവനവും ലഭ്യമാകും. എഐ ഫീച്ചറുകൾക്ക് പുറമെ, ഗൂഗിൾ ഡ്രൈവ്, ജിമെയിൽ, ഗൂഗിൾ ഫോട്ടോസ് എന്നിവയിലുടനീളമുള്ള ക്ലൗഡ് സ്റ്റോറേജ് 2TB-യിൽ നിന്ന് 5TB ആയും ഗൂഗിൾ എഐ പ്രോ പ്ലാനിൽ ഉയർത്തിയിട്ടുണ്ട്.