ഗൂഗിൾ സെർച്ച് എഐ ഇനി കൂടുതൽ സ്മാർട്ടാകും; പുതിയ ഫീച്ചറുകൾ എത്തി

ഗൂഗിൾ സെർച്ചിലെ എഐ ടൂളുകളായ എഐ ഓവർവ്യൂസ്, എഐ മോഡ് എന്നിവയിൽ കമ്പനി പുതിയ മാറ്റങ്ങൾ വരുത്തിയിരിക്കുന്നു. വിൻഡോസിനായുള്ള ഗൂഗിൾ ആപ്പിലും ക്രോം ബ്രൗസറിലും പുതിയ ഫീച്ചറുകൾ അവതരിപ്പിച്ചതിന് പിന്നാലെ, ഉപയോഗക്ഷമത വർധിപ്പിക്കുന്ന അഞ്ച് പുതിയ ഫീച്ചറുകൾ കൂടി ഇപ്പോൾ പുറത്തിറക്കിയിരിക്കുകയാണ്. വിദഗ്ധരുടെ അഭിപ്രായങ്ങൾ അറിയുക, ഇഷ്ടപ്പെട്ട വെബ്സൈറ്റുകൾ വേഗത്തിൽ കണ്ടെത്തുക, ലിങ്ക് പ്രിവ്യൂകൾ കാണുക തുടങ്ങിയ സൗകര്യങ്ങൾ ഇതിലൂടെ ആഗോളതലത്തിൽ ഉപയോക്താക്കൾക്ക് ലഭ്യമാകും.

എഐ ഓവർവ്യൂസ്, സെർച്ച് എഐ മോഡ് എന്നിവയിൽ പുതിയ ഫീച്ചറുകൾ

ഗൂഗിൾ സെർച്ചിലെ എഐ ഓവർവ്യൂസ്, എഐ മോഡ് എന്നിവയിൽ വരാനിരിക്കുന്ന അഞ്ച് പുതിയ ഫീച്ചറുകൾ ഗൂഗിൾ ഔദ്യോഗികമായി പ്രഖ്യാപിച്ചു. ഉപയോക്താക്കൾക്ക് വിവരങ്ങൾ കൂടുതൽ എളുപ്പത്തിൽ കണ്ടെത്താനും ആധികാരികമായ അഭിപ്രായങ്ങൾ മനസ്സിലാക്കാനും സഹായിക്കുന്നതാണ് ഈ മാറ്റങ്ങൾ എന്ന് ഗൂഗിൾ സെർച്ച് പ്രൊഡക്റ്റ് മാനേജ്‌മെന്റ് വൈസ് പ്രസിഡന്റ് ഹേമ ബുദരാജു പറഞ്ഞു. ഇതിന്റെ ഭാഗമായി ജെമിനി നൽകുന്ന മറുപടികൾക്കൊപ്പം വിഷയങ്ങളെക്കുറിച്ച് കൂടുതൽ ആഴത്തിൽ പഠിക്കാൻ സഹായിക്കുന്ന ലേഖനങ്ങളുടെയും വിശകലനങ്ങളുടെയും ലിങ്കുകൾ ഇനി മുതൽ ലഭ്യമാകും. ഉപയോക്താക്കൾ സബ്‌സ്‌ക്രൈബ് ചെയ്തിട്ടുള്ള വാർത്താ ഉറവിടങ്ങളിൽ നിന്നുള്ള വിവരങ്ങൾ വേഗത്തിൽ തിരിച്ചറിയാൻ പ്രത്യേക ടിക്കുകളും ലേബലുകളും നൽകുന്നതിലൂടെ വിശ്വസനീയമായ സൈറ്റുകളിൽ നിന്നുള്ള ഉള്ളടക്കം എളുപ്പത്തിൽ കണ്ടെത്താൻ സാധിക്കും. കേവലം വസ്തുതകൾ നൽകുന്നതിന് പകരം സോഷ്യൽ മീഡിയ ചർച്ചകളിൽ നിന്നോ ഓൺലൈൻ പ്ലാറ്റ്‌ഫോമുകളിൽ നിന്നോ ഉള്ള വിദഗ്ധരുടെ അഭിപ്രായങ്ങളും വ്യക്തികളുടെ റിവ്യൂകളും കൂടി ഇനി ഉത്തരങ്ങൾക്കൊപ്പം ഉൾപ്പെടുത്തും. വിവരങ്ങൾ നൽകുന്ന വ്യക്തിയുടെ പേരോ സോഷ്യൽ മീഡിയ ഹാൻഡിലോ ഇതിനൊപ്പം വ്യക്തമാക്കുന്നത് വിവരങ്ങളുടെ ആധികാരികത ഉറപ്പുവരുത്താൻ സഹായിക്കും.

ഗൂഗിൾ സെർച്ച് മറുപടികളിൽ കൂടുതൽ സൈറ്റേഷനുകൾ ഉൾപ്പെടുത്തുന്നതാണ് മറ്റൊരു പുതിയ മാറ്റം. ഇനി മുതൽ ബുള്ളറ്റ് പോയിന്റുകൾക്ക് അടുത്തും ചെറിയ പാരഗ്രാഫുകൾക്ക് ശേഷവും യുആർഎൽ ഐക്കണുകൾ (ലിങ്ക് ചെയിൻ) കാണാൻ സാധിക്കും. കൂടുതൽ ലിങ്കുകൾ നൽകുന്നത് വിവരങ്ങളുടെ വിശ്വാസ്യത വർധിപ്പിക്കുമെന്നും ഉപയോക്താക്കൾക്ക് ആവശ്യമുള്ളപ്പോൾ വെബ്സൈറ്റുകളിലേക്ക് നേരിട്ട് പ്രവേശിക്കാൻ ഇത് സഹായിക്കുമെന്നും കമ്പനി വ്യക്തമാക്കുന്നു. കൂടാതെ സെർച്ചിലെ എഐ സേവനങ്ങളിൽ നൽകിയിട്ടുള്ള ലിങ്കുകൾക്ക് മുകളിൽ കർസർ വെക്കുമ്പോൾ തന്നെ ആ വെബ്സൈറ്റിന്റെ പേരും ടൈറ്റിലും കാണാൻ സാധിക്കുന്ന വെബ്സൈറ്റ് പ്രിവ്യൂ ഫീച്ചറും ഗൂഗിൾ നടപ്പിലാക്കുന്നുണ്ട്. നിലവിൽ ഡെസ്ക്ടോപ്പിൽ മാത്രം ലഭ്യമാകുന്ന ഈ ഫീച്ചർ ക്ലിക്ക് ചെയ്യുന്നതിന് മുൻപ് തന്നെ ലിങ്കുകളെക്കുറിച്ച് വ്യക്തമായ ധാരണ നൽകാനും ഉപയോക്താക്കളുടെ ആത്മവിശ്വാസം വർധിപ്പിക്കാനും സഹായിക്കുന്നു.