പ്ലേസ്റ്റേഷൻ ഗെയിമിൽ ഇനി നിങ്ങളും ഒരു കഥാപാത്രം! സോണിയുടെ 'പ്ലെയർബേസ്' പ്രോഗ്രാമിലേക്ക് ഇപ്പോൾ അപേക്ഷിക്കാം.

പ്ലേസ്റ്റേഷൻ ആരാധകർക്ക് പ്രിയപ്പെട്ട ഗെയിമുകളിൽ കഥാപാത്രങ്ങളാകാൻ സോണി അവസരമൊരുക്കുന്നു. ഇതിന്റെ ഭാഗമായി 'പ്ലെയർബേസ്' (Playerbase) എന്ന കമ്മ്യൂണിറ്റി മത്സരം കമ്പനി പ്രഖ്യാപിച്ചു. തിരഞ്ഞെടുക്കപ്പെടുന്ന ഗെയിമർമാരുടെ രൂപം സ്കാൻ ചെയ്ത് ഗെയിമിനുള്ളിൽ ഉൾപ്പെടുത്തുന്നതാണ് ഈ പദ്ധതി.

ആദ്യഘട്ടത്തിൽ 'ഗ്രാൻ ടൂറിസ്മോ 7' (Gran Turismo 7) എന്ന ഗെയിമിലാണ് ഈ സൗകര്യം ലഭ്യമാകുക. ഭാവിയിൽ കൂടുതൽ പ്ലേസ്റ്റേഷൻ സ്റ്റുഡിയോ ഗെയിമുകളിലേക്ക് ഈ പ്രോഗ്രാം വ്യാപിപ്പിക്കാൻ സോണിക്ക് പദ്ധതിയുണ്ട്. ഏഷ്യ, അമേരിക്ക, യൂറോപ്പ്, ദക്ഷിണാഫ്രിക്ക, ഓസ്‌ട്രേലിയ എന്നിവിടങ്ങളിലെ തിരഞ്ഞെടുത്ത രാജ്യങ്ങളിൽ ഇതിനായുള്ള അപേക്ഷകൾ സോണി സ്വീകരിച്ചു തുടങ്ങി.

പ്ലെയർബേസ് പ്രോഗ്രാമിന് എങ്ങനെ അപേക്ഷിക്കാം?

പ്ലെയർബേസ് പ്രോഗ്രാമിലേക്ക് അപേക്ഷിക്കാനുള്ള ലിങ്കുകൾ ഇപ്പോൾ സജ്ജമായിക്കഴിഞ്ഞു. 18 വയസ്സ് പൂർത്തിയായവർക്കും ഇന്ത്യയുൾപ്പെടെയുള്ള സപ്പോർട്ടുള്ള രാജ്യങ്ങളിൽ പ്ലേസ്റ്റേഷൻ ഓൺലൈൻ ഐഡി ഉള്ളവർക്കും ഈ മത്സരത്തിൽ പങ്കെടുക്കാം. അപേക്ഷകർ തങ്ങളുടെ വ്യക്തിപരമായ പ്ലേസ്റ്റേഷൻ അനുഭവങ്ങളും കഥകളും പങ്കുവെക്കേണ്ടതുണ്ട്. ലഭിക്കുന്ന അപേക്ഷകളിൽ നിന്ന് തിരഞ്ഞെടുക്കപ്പെടുന്ന ഫൈനലിസ്റ്റുകളെ വീഡിയോ ഇന്റർവ്യൂവിലൂടെയാകും പരീക്ഷിക്കുക. ഇതിൽ നിന്നും വിജയിക്കുന്ന ഒരാൾക്ക് 'ഗ്രാൻ ടൂറിസ്മോ 7' ഗെയിമിൽ ഒരു ഇൻ-ഗെയിം ക്യാരക്ടർ പോർട്രെയ്‌റ്റായി പ്രത്യക്ഷപ്പെടാൻ അവസരം ലഭിക്കും. കൂടാതെ, ഗെയിമിലെ ഷോക്കേസ് മെനുവിൽ സ്ഥിരമായി ഉൾപ്പെടുത്തുന്ന ഒരു കസ്റ്റം ലോഗോയും വെഹിക്കിൾ ലിവറിയും ഡിസൈൻ ചെയ്യാൻ വിജയിയെ അനുവദിക്കും. ഇതിനെല്ലാം പുറമെ, ഫെയ്‌സ് സ്കാനിംഗ് നടപടികൾക്കായി വിജയിക്ക് അമേരിക്കയിലെ ലോസ് ഏഞ്ചൽസിലേക്ക് പോകാനുള്ള അവസരവും സോണി വാഗ്ദാനം ചെയ്യുന്നു.

ഭാവിയിൽ കൂടുതൽ പ്ലേസ്റ്റേഷൻ സ്റ്റുഡിയോ ഗെയിമുകളിൽ ആരാധകർക്ക് പ്രത്യക്ഷപ്പെടാൻ അവസരമുണ്ടാകുമെന്ന് പ്ലെയർബേസ് വെബ്‌സൈറ്റിലൂടെ സോണി അറിയിച്ചു. പ്ലെയർബേസ് മത്സരം 2026 ഏപ്രിൽ 7-ന് രാവിലെ 7:00-ന് (PDT) ആരംഭിച്ചു, ഇത് ഏപ്രിൽ 26 രാത്രി 11:59 വരെ നീണ്ടുനിൽക്കും. മത്സരവിജയിയെ 2026 വേനൽക്കാലത്ത് പ്രഖ്യാപിക്കുമെന്നും സോണി വ്യക്തമാക്കി. വിജയിയുടെ സ്കാൻ ചെയ്ത രൂപം ഈ വർഷം അവസാനത്തോടെ നിശ്ചിത കാലയളവിൽ ഗ്രാൻ ടൂറിസ്മോ 7-ൽ പ്രത്യക്ഷപ്പെടും.

“പ്ലേസ്റ്റേഷനെ ഇന്നത്തെ നിലയിലെത്തിച്ച കളിക്കാർക്ക് നന്ദി പറയാനുള്ള ഞങ്ങളുടെ വഴിയാണ് പ്ലെയർബേസ്. തികച്ചും പുതിയൊരു രീതിയിൽ പ്ലേസ്റ്റേഷൻ ലോകത്തേക്ക് ചുവടുവെക്കുന്ന ആരാധകരെ കാണാൻ ഞങ്ങൾ കാത്തിരിക്കുകയാണ്,” സോണി തങ്ങളുടെ അറിയിപ്പിൽ പറഞ്ഞു.