40 മണിക്കൂർ റെക്കോർഡിംഗും എഐ ഫീച്ചറുകളുമായി ഐറ്റെൽ സീനോ എഐ വീവർ ഇന്ത്യയിലെത്തി

ഐടെൽ അവരുടെ ആദ്യത്തെ എഐ വോയിസ് റെക്കോർഡറായ സീനോ എഐ വീവർ ഇന്ത്യൻ വിപണിയിൽ അവതരിപ്പിച്ചു. ഈ പുതിയ ഉപകരണം ഇന്ത്യയിൽ ഉടൻ പുറത്തിറക്കുമെന്നും ഓൺലൈൻ ഷോപ്പിംഗ് സൈറ്റ് വഴി വിൽപനയ്ക്ക് എത്തുമെന്നും കമ്പനി ഉറപ്പിച്ചു. വോയിസ് നോട്ടുകൾ റെക്കോർഡ് ചെയ്യാനും അത് തനിയെ എഴുതിയെടുക്കാനും അതിന്റെ ചുരുക്കം തയ്യാറാക്കാനും ഈ ഉപകരണത്തിന് സാധിക്കുമെന്ന് ഹോങ്കോങ് ആസ്ഥാനമായുള്ള ഈ കമ്പനി പറയുന്നു. ഫോണുമായി ബന്ധിപ്പിച്ച് ഉപയോഗിക്കാവുന്ന ഈ ഗാഡ്‌ജെറ്റിൽ ഒറ്റ ക്ലിക്കിലൂടെ റെക്കോർഡിംഗ് തുടങ്ങാം. റെക്കോർഡിംഗ് തുടങ്ങിയോ എന്ന് അറിയാൻ മുൻഭാഗത്ത് ഒരു ചെറിയ സ്ക്രീനും നൽകിയിട്ടുണ്ട്. നിലവിൽ വിദേശ വിപണികളിലുള്ള പ്ലൗഡ് നോട്ട് എന്ന എഐ വോയിസ് റെക്കോർഡറിന് വെല്ലുവിളിയായാണ് ഐടെൽ ഈ പുതിയ ഗാഡ്‌ജെറ്റ് പുറത്തിറക്കുന്നത്.

ഐടെൽ സീനോ എഐ വീവർ: വിലയും ലഭ്യതയും

ഐടെൽ സീനോ എഐ വീവറിന് ഇന്ത്യയിൽ 12,999 രൂപയാണ് വില വരുന്നത് എന്ന് കമ്പനിയുടെ വെബ്സൈറ്റ് വ്യക്തമാക്കുന്നു. എന്നാൽ ഈ വിലയിൽ ബാങ്ക് ഓഫറുകളും ഡിസ്‌കൗണ്ടുകളും ഉൾപ്പെടുമോ എന്ന കാര്യത്തിൽ ഇപ്പോൾ വ്യക്തതയില്ല. ആമസോണിൽ ഈ ഉപകരണത്തിനായി പ്രത്യേക പേജ് ഇപ്പോൾ നിലവിൽ വന്നിട്ടുണ്ട്. കറുപ്പ് നിറത്തിൽ മാത്രം ലഭ്യമാകുന്ന ഈ ഉപകരണം ആമസോൺ വഴി വിൽപനയ്ക്ക് എത്തുമെന്ന് ഇതിലൂടെ മനസ്സിലാക്കാം. എങ്കിലും ഇത് എന്നുമുതൽ വാങ്ങി തുടങ്ങാം എന്ന ഔദ്യോഗികമായ തീയതി കമ്പനി ഇതുവരെ പുറത്തുവിട്ടിട്ടില്ല.

സീനോ എഐ വീവറിന് നൽകിയിരിക്കുന്ന വില പ്ലൗഡ് നോട്ടിന് ഏകദേശം തുല്യമാണ്. പ്ലൗഡ് നോട്ട് നിലവിൽ ഇന്ത്യയിൽ വാങ്ങാൻ കിട്ടില്ല. അമേരിക്കയിൽ ഇതിന് 159 ഡോളർ (ഏകദേശം 15,000 രൂപ) ആണ് വില വരുന്നത്. ബ്ലാക്ക്, നേവി ബ്ലൂ, സിൽവർ, സ്റ്റാർലൈറ്റ് എന്നീ നിറങ്ങളിൽ പ്ലൗഡ് നോട്ട് അവിടെ ലഭ്യമാണ്.

ഐടെൽ സീനോ എഐ വീവർ: സവിശേഷതകളും ഫീച്ചറുകളും

റെക്കോർഡ് ചെയ്യുന്ന കാര്യങ്ങൾ അപ്പോൾത്തന്നെ എഴുതിയെടുക്കാനും അതിന്റെ ചുരുക്കം  തയ്യാറാക്കാനും സാധിക്കുന്ന ഒരു വോയിസ് റെക്കോർഡറാണ് ഐടെൽ സീനോ എഐ വീവർ. ഫോണിലെ പ്രത്യേക ആപ്പ് വഴി ഉപയോക്താക്കൾക്ക് ഈ വിവരങ്ങൾ പരിശോധിക്കാം. ഈ ഉപകരണത്തിനൊപ്പം ഒരു ലെതർ കേസും കമ്പനി നൽകുന്നുണ്ട്. ഇത് ഉപയോഗിച്ച് വോയിസ് റെക്കോർഡർ ഫോണിന്റെ പിൻഭാഗത്ത് ഒട്ടിച്ചുവെക്കാൻ സാധിക്കും. ലോകമെമ്പാടുമുള്ള എൺപതിലധികം ഭാഷകളിൽ എഐ വോയിസ് ട്രാൻസ്‌ലേഷൻ ഈ ഗാഡ്‌ജെറ്റിൽ ലഭ്യമാകുമെന്ന് കമ്പനി പറയുന്നു.

ഐടെൽ സീനോ എഐ വീവറിൽ 40 മണിക്കൂർ വരെ റെക്കോർഡ് ചെയ്യാമെന്ന് കമ്പനി പറയുന്നു. മീറ്റിംഗുകളിൽ പറയുന്ന കാര്യങ്ങൾ, ചെയ്യേണ്ട ജോലികളുടെ ലിസ്റ്റ്, ഇമെയിൽ രൂപം എന്നിങ്ങനെ അമ്പതിലധികം രീതികളിൽ റെക്കോർഡ് ചെയ്ത കാര്യങ്ങൾ തയ്യാറാക്കാൻ ഈ ഉപകരണത്തിന് കഴിയും. ചുറ്റുമുള്ള ബഹളങ്ങൾ ഒഴിവാക്കി വ്യക്തമായ ശബ്ദം റെക്കോർഡ് ചെയ്യാനുള്ള പ്രത്യേക വിദ്യയും ഇതിലുണ്ട്.

മറ്റൊരാളുമായി ഫോണിൽ സംസാരിക്കുമ്പോഴോ, ഓഫീസിലെ മീറ്റിംഗുകളിലോ, ക്ലാസുകളിലോ അല്ലെങ്കിൽ ഇന്റർവ്യൂകളിലോ ഈ ഉപകരണം ഉപയോഗിക്കാമെന്ന് കമ്പനി പറയുന്നു. ഐടെൽ സീനോ എഐ വീവറിന്റെ മുൻവശത്ത് ഗുളികയുടെ ആകൃതിയിലുള്ള ഒരു ഡിസ്പ്ലേയുണ്ട്. ഇത് റെക്കോർഡിംഗ് നടക്കുന്നുണ്ടോ എന്ന് അറിയാൻ സഹായിക്കും. കൂടാതെ, ഒറ്റ ക്ലിക്കിൽ തന്നെ റെക്കോർഡിംഗ് തുടങ്ങാനുള്ള സൗകര്യവും ഇതിലുണ്ട്.