സമയം ലാഭിക്കാം, ഷോർട്ട്‌സ് മാറ്റാം; യുട്യൂബിൽ വിപ്ലവകരമായ മാറ്റവുമായി 'സീറോ മിനിറ്റ്' ഫീച്ചർ.

മൊബൈൽ ആപ്പിൽ ഷോർട്ട്‌സ് (Shorts) ഫീച്ചർ പൂർണ്ണമായും ഓഫാക്കാൻ ഉപയോക്താക്കളെ അനുവദിക്കുന്ന പുതിയ ഫീച്ചർ യൂട്യൂബ് അവതരിപ്പിച്ചു. ഷോർട്ട്‌സ് ഫീഡ് ടൈമറിൽ സീറോ മിനിറ്റ് (zero-minute) എന്ന ഓപ്ഷനാണ് ഇതിനായി പുതുതായി ഉൾപ്പെടുത്തിയിരിക്കുന്നത്. ഈ ഫീച്ചർ വഴി പ്ലാറ്റ്‌ഫോമിലെ ഷോർട്ട് വീഡിയോ ഫീഡ് പൂർണ്ണമായും മറച്ചുവെക്കാൻ സാധിക്കുമെന്ന് യൂട്യൂബ് അറിയിച്ചു. ആഗോളതലത്തിൽ ഈ മാറ്റം നിലവിൽ വന്നുകൊണ്ടിരിക്കുകയാണ്. ഇതിലൂടെ ഉപയോക്താക്കൾക്ക് പ്ലാറ്റ്‌ഫോമിൽ ചിലവഴിക്കുന്ന സമയം നിയന്ത്രിക്കാൻ കൂടുതൽ സൗകര്യം ലഭിക്കുന്നു.

യുട്യൂബ് ഷോർട്ട്‌സ് ഇനി വേണ്ടെന്നു വെക്കാം: പുതിയ മാറ്റങ്ങൾ

യുട്യൂബ് ഷോർട്ട്‌സ് കാണുന്ന സമയം നിയന്ത്രിക്കാനായി നേരത്തെ തന്നെ ടൈമർ സെറ്റ് ചെയ്യാനുള്ള സൗകര്യമുണ്ടായിരുന്നു. 15 മിനിറ്റ് മുതൽ രണ്ട് മണിക്കൂർ വരെയായിരുന്നു ഇതിന്റെ സമയം. നിശ്ചിത സമയം കഴിഞ്ഞാൽ വീഡിയോ കാണുന്നത് നിർത്താൻ ആവശ്യപ്പെട്ട് ഒരു മെസ്സേജ് സ്ക്രീനിൽ വരികയായിരുന്നു പതിവ്. എന്നാൽ പുതിയ അപ്‌ഡേറ്റിലൂടെ ഈ സമയം '0 മിനിറ്റ്' ആയി സെറ്റ് ചെയ്യാൻ സാധിക്കും. ഇങ്ങനെ ചെയ്താൽ ഹോം സ്ക്രീനിൽ ഷോർട്ട്‌സ് വീഡിയോകൾ വരുന്നത് പൂർണ്ണമായും ഒഴിവാക്കാം. അമിതമായി സമയം ഷോർട്ട്‌സിൽ പാഴാക്കുന്നവർക്ക് ഇത് വലിയ സഹായമാകും.

യുട്യൂബിന്റെ പുതിയ മാറ്റമനുസരിച്ച്, ഓരോ ദിവസവും എത്ര സമയം ഷോർട്ട്‌സ് കാണണം എന്നതിന് ഉപയോക്താക്കൾക്ക് ഒരു പരിധി നിശ്ചയിക്കാം. ഈ സമയം കഴിഞ്ഞാൽ അന്നത്തെ ഷോർട്ട്‌സ് കാണൽ താൽക്കാലികമായി നിർത്തിവെച്ചതായി ഒരു അറിയിപ്പ് ലഭിക്കും. ഈ സമയം 'സീറോ' (പൂജ്യം) ആയി സെറ്റ് ചെയ്താൽ, ഷോർട്ട്‌സ് ഫീഡ് ഉടൻ തന്നെ ഓഫാകുകയും ഹോം സ്‌ക്രീനിൽ പിന്നീട് അവ കാണാതിരിക്കുകയും ചെയ്യും.

പകരം, "നിങ്ങൾ ഷോർട്ട്‌സ് ഫീഡ് പരിധിയിൽ എത്തിയിരിക്കുന്നു" എന്ന സന്ദേശമാകും സ്ക്രീനിൽ തെളിയുക. നേരത്തെ കുറഞ്ഞത് 15 മിനിറ്റെങ്കിലും സമയം സെറ്റ് ചെയ്യണമായിരുന്നു. എന്നാൽ ഇപ്പോൾ ആദ്യമായി, ആപ്പിലെ സെറ്റിംഗ്‌സ് വഴി തന്നെ ഷോർട്ട്‌സ് ഫീഡ് പൂർണ്ണമായും ഓഫാക്കാൻ യുട്യൂബ് സൗകര്യം നൽകിയിരിക്കുകയാണ്.

ഇതോടെ ഹോം സ്‌ക്രീനിൽ നിന്ന് ഷോർട്ട്‌സ് ഒഴിവാകുമെങ്കിലും, സെർച്ച് റിസൾട്ടുകളിലും സബ്‌സ്‌ക്രിപ്‌ഷൻ ഫീഡിലും ഇവ തുടർന്നും കണ്ടേക്കാമെന്ന് യുട്യൂബ് അറിയിച്ചിട്ടുണ്ട്. 'ടേക്ക് എ ബ്രേക്ക്', 'ബെഡ്‌ടൈം റിമൈൻഡർ' എന്നീ ഫീച്ചറുകൾക്ക് പിന്നാലെ, ഉപയോക്താക്കൾക്ക് തങ്ങളുടെ സമയം കൃത്യമായി നിയന്ത്രിക്കാൻ സഹായിക്കുന്നതിനായാണ് പുതിയ മാറ്റം അവതരിപ്പിച്ചിരിക്കുന്നത്.

ഈ ഫീച്ചർ ആദ്യം അവതരിപ്പിച്ചത് രക്ഷാകർതൃ നിയന്ത്രണങ്ങളുടെ (parental controls) ഭാഗമായാണ്. കുട്ടികളും കൗമാരക്കാരും ഷോർട്ട്‌സ് കാണുന്നത് നിയന്ത്രിക്കാനോ ബ്ലോക്ക് ചെയ്യാനോ ആണ് ഇത് ഉപയോഗിച്ചിരുന്നത്. എന്നാൽ ഇപ്പോൾ സാധാരണ അക്കൗണ്ടുകൾ ഉപയോഗിക്കുന്ന മുതിർന്നവർക്കും ഈ സേവനം ലഭ്യമാക്കിയിട്ടുണ്ട്.

യുട്യൂബ് ആപ്പിൽ ഷോർട്ട്‌സ് ഒഴിവാക്കാൻ താഴെ പറയുന്ന ഘട്ടങ്ങൾ പിന്തുടരാം:

• Settings തുറന്ന് Time Management എന്നതിൽ പോകുക.

• അവിടെയുള്ള Daily limits എന്ന ഭാഗത്തേക്ക് മാറി Shorts Feed Limit ഓൺ ചെയ്യുക.

• തുടർന്ന് സമയം 0 minutes ആയി സെറ്റ് ചെയ്യുക.

ഇങ്ങനെ ചെയ്തു കഴിഞ്ഞാൽ ആപ്പിൽ നിന്ന് ഷോർട്ട്‌സ് ഫീഡ് അപ്രത്യക്ഷമാകും. നിലവിൽ ഈ ഫീച്ചർ എല്ലാവരിലേക്കും എത്തിക്കൊണ്ടിരിക്കുന്നതേയുള്ളൂ. ഗാഡ്‌ജെറ്റ്‌സ് 360-ന് (Gadgets 360) ചില സ്മാർട്ട്‌ഫോണുകളിൽ ഈ ഫീച്ചർ പരീക്ഷിക്കാൻ സാധിച്ചെങ്കിലും, എല്ലാ അക്കൗണ്ടുകളിലും ഇത് ലഭ്യമായി തുടങ്ങിയിട്ടില്ല.