ആപ്പ് തുറക്കാതെ തന്നെ മറുപടി നൽകാം; വാട്ട്‌സ്ആപ്പിൽ വരുന്നു 'ചാറ്റ് ബബിൾസ്'

വാട്ട്‌സ്ആപ്പ് ആൻഡ്രോയിഡ് ഉപഭോക്താക്കൾക്കായി പുതിയ നോട്ടിഫിക്കേഷൻ ബബിൾസ് ഫീച്ചർ അവതരിപ്പിക്കാൻ ഒരുങ്ങുന്നു. മറ്റ് ആപ്പുകൾ ഉപയോഗിച്ചുകൊണ്ടിരിക്കുമ്പോൾ തന്നെ വാട്ട്‌സ്ആപ്പ് ചാറ്റുകൾ എളുപ്പത്തിൽ കൈകാര്യം ചെയ്യാൻ സഹായിക്കുന്ന സംവിധാനമാണിത്. നിലവിൽ വികസന ഘട്ടത്തിലുള്ള ഈ ഫീച്ചർ പരീക്ഷണാടിസ്ഥാനത്തിൽ പോലും ലഭ്യമായി തുടങ്ങിയിട്ടില്ല. സ്ക്രീനുകൾ മാറി മാറി ഉപയോഗിക്കാതെ തന്നെ മെസേജുകൾക്ക് മറുപടി നൽകാൻ ഇത് ഉപഭോക്താക്കളെ സഹായിക്കും. ആൻഡ്രോയിഡിന്റെ മൾട്ടിടാസ്കിംഗ് സംവിധാനങ്ങളുമായി കൂടുതൽ ചേർന്നുനിൽക്കുന്ന രീതിയിലാണ് ഈ പുതിയ മാറ്റം വരുന്നത്.

വാട്ട്‌സ്ആപ്പിൽ മെസഞ്ചർ സ്റ്റൈൽ ചാറ്റ് ബബിൾസ് എത്തുന്നു; ആൻഡ്രോയിഡ് ഉപഭോക്താക്കൾക്കായി പുതിയ മാറ്റം

ആൻഡ്രോയിഡ് ഫോണുകളിൽ ഫേസ്ബുക്ക് മെസഞ്ചറിന് സമാനമായ ചാറ്റ് ബബിൾസ് അവതരിപ്പിക്കാൻ വാട്ട്‌സ്ആപ്പ് തയാറെടുക്കുന്നു. പ്രമുഖ ഫീച്ചർ ട്രാക്കറായ ഡബ്ല്യുഎബീറ്റഇൻഫോ ആണ് ഈ പുതിയ മാറ്റത്തെക്കുറിച്ചുള്ള വിവരങ്ങൾ പുറത്തുവിട്ടത്. മറ്റ് ആപ്പുകൾ ഉപയോഗിച്ചുകൊണ്ടിരിക്കുമ്പോൾ തന്നെ സ്ക്രീനിൽ ഫ്ലോട്ടിംഗ് ഐക്കണുകളായി ചാറ്റുകൾ പ്രത്യക്ഷപ്പെടാൻ ഈ ഫീച്ചർ സഹായിക്കും. ഇതിലൂടെ വാട്ട്‌സ്ആപ്പ് പൂർണ്ണമായി തുറക്കാതെ തന്നെ സന്ദേശങ്ങൾ വായിക്കാനും മറുപടി നൽകാനും ഉപഭോക്താക്കൾക്ക് സാധിക്കും.

ഫേസ്ബുക്ക് മെസഞ്ചറിലെ ചാറ്റ് ഹെഡ്‌സിന് സമാനമായ ഈ ഫീച്ചർ നിലവിൽ വികസന ഘട്ടത്തിലാണ്. ബീറ്റാ പതിപ്പുകളിൽ പോലും ലഭ്യമായിത്തുടങ്ങാത്ത ഈ സംവിധാനം വരും ദിവസങ്ങളിൽ ആദ്യം ആൻഡ്രോയിഡ് ബീറ്റാ ഉപഭോക്താക്കൾക്കായിരിക്കും ലഭിക്കുക. ഐഒഎസ് പ്ലാറ്റ്‌ഫോമിൽ നോട്ടിഫിക്കേഷൻ ബബിൾസിന് പിന്തുണയില്ലാത്തതിനാൽ ഐഫോൺ ഉപഭോക്താക്കൾക്ക് ഈ സേവനം ലഭിക്കില്ല.

ആൻഡ്രോയിഡിന്റെ നോട്ടിഫിക്കേഷൻ സിസ്റ്റം വഴിയാണ് ഇത് പ്രവർത്തിക്കുന്നത്. സന്ദേശങ്ങൾ വരുമ്പോൾ സ്ക്രീനിൽ പ്രത്യക്ഷപ്പെടുന്ന ഫ്ലോട്ടിംഗ് ബബിളിൽ അയക്കുന്നയാളുടെ പ്രൊഫൈൽ ചിത്രവും വാട്ട്‌സ്ആപ്പ് ലോഗോയുമുണ്ടാകും. ഇതിൽ ക്ലിക്ക് ചെയ്താൽ ആപ്പ് പൂർണ്ണമായി തുറക്കാതെ തന്നെ ചെറിയ വിൻഡോയിലൂടെ മറുപടി നൽകാം. ആവശ്യമെങ്കിൽ ഈ ഫീച്ചർ ഓഫാക്കാനും സാധിക്കും.

ഉപഭോക്താക്കളുടെ മൾട്ടിടാസ്കിംഗ് എളുപ്പമാക്കുന്നതിനും മറ്റ് ജോലികൾക്കിടയിൽ തടസ്സമില്ലാതെ ചാറ്റ് ചെയ്യുന്നതിനുമാണ് വാട്ട്‌സ്ആപ്പ് ഈ മാറ്റം കൊണ്ടുവരുന്നത്. ആൻഡ്രോയിഡ് 11-ന് മുകളിലുള്ള പതിപ്പുകളിലായിരിക്കും ഈ ഫീച്ചർ ഏറ്റവും മികച്ച രീതിയിൽ പ്രവർത്തിക്കുക. പഴയ പതിപ്പുകളിൽ സാങ്കേതികമായ ചില അനുമതികൾ ആവശ്യമായതിനാൽ പുതിയ ഫോണുകളിലായിരിക്കും വാട്ട്‌സ്ആപ്പ് ഈ സൗകര്യം പ്രധാനമായും ലഭ്യമാക്കുക.