ആൻഡ്രോയിഡ് ടു ഐഫോൺ ചാറ്റ് ട്രാൻസ്ഫർ ഇനി വെറും സിംപിൾ; വാട്‌സ്ആപ്പിൽ വൻ മാറ്റങ്ങൾ!

വാട്‌സ്ആപ്പ് ഉപയോഗം കൂടുതൽ എളുപ്പമാക്കുന്നതിനായി പുതിയ ഫീച്ചറുകൾ അവതരിപ്പിച്ചു. സ്റ്റോറേജ് നിയന്ത്രിക്കാനും ആൻഡ്രോയിഡ്, ഐഫോൺ ഫോണുകൾക്കിടയിൽ ചാറ്റുകൾ കൈമാറാനും സഹായിക്കുന്ന പുതിയ സംവിധാനങ്ങളാണ് മെറ്റ പുറത്തിറക്കിയത്. ഇതിന് പുറമെ മെച്ചപ്പെട്ട എഐ ഫീച്ചറുകളും വാട്‌സ്ആപ്പിൽ ലഭിക്കും. ആൻഡ്രോയിഡ് ഫോണുകളിൽ മാത്രം ലഭ്യമായിരുന്ന ഒരേ ഫോണിൽ രണ്ട് അക്കൗണ്ടുകൾ ഉപയോഗിക്കാനുള്ള സൗകര്യം ഇനി മുതൽ ഐഫോൺ ഉപയോക്താക്കൾക്കും ഉപയോഗിക്കാം.

വാട്‌സ്ആപ്പിലെ പുതിയ ഫീച്ചറുകൾ

വ്യത്യസ്ത പ്ലാറ്റ്‌ഫോമുകൾക്കിടയിൽ ചാറ്റുകൾ കൈമാറുന്നതിനുള്ള ഫീച്ചർ വാട്‌സ്ആപ്പ് പരിഷ്‌കരിച്ചു. ഇനി മുതൽ ഐഫോണിൽ നിന്ന് ആൻഡ്രോയിഡിലേക്കും തിരിച്ചും വളരെ എളുപ്പത്തിൽ ചാറ്റുകൾ മാറ്റാൻ സാധിക്കുമെന്ന് വാട്‌സ്ആപ്പ് അറിയിച്ചു. അക്കൗണ്ട് വിവരങ്ങൾ, വ്യക്തിഗത ചാറ്റുകൾ, ഗ്രൂപ്പുകൾ, കമ്മ്യൂണിറ്റികൾ, വാട്‌സ്ആപ്പ് ചാനൽ അപ്‌ഡേറ്റുകൾ, ചാറ്റ് ഹിസ്റ്ററി, കോൾ ഹിസ്റ്ററി എന്നിവയെല്ലാം ഇത്തരത്തിൽ കൈമാറാൻ കഴിയും. ഇതിന് പുറമെ ഫോട്ടോകളും വീഡിയോകളും പുതിയ ഫോണിലേക്ക് മാറ്റാനും ഈ സംവിധാനത്തിലൂടെ സാധിക്കും.

സ്റ്റോറേജ് കൈകാര്യം ചെയ്യുന്നതിനുള്ള സൗകര്യങ്ങളും വാട്‌സ്ആപ്പ് മെച്ചപ്പെടുത്തി. ഓരോ ചാറ്റിലെയും വലിയ ഫയലുകൾ നേരിട്ട് കണ്ടെത്തി ഒഴിവാക്കാൻ ഇനി മുതൽ സാധിക്കും. ചാറ്റിലെ പേരിൽ ക്ലിക്ക് ചെയ്ത് മാനേജ് സ്റ്റോറേജ് എന്ന ഓപ്ഷൻ തിരഞ്ഞെടുത്താൽ സംഭാഷണങ്ങൾ ഡിലീറ്റ് ചെയ്യാതെ തന്നെ ഫോണിലെ സ്ഥലം ലാഭിക്കാം. ചാറ്റുകൾ നിലനിർത്തിക്കൊണ്ട് ഫോട്ടോകളും വീഡിയോകളും മാത്രം നീക്കം ചെയ്യാനും ഇതിലൂടെ കഴിയും.

ഐഫോൺ ഉപയോക്താക്കൾക്കായി ഒരേ ഫോണിൽ രണ്ട് അക്കൗണ്ടുകൾ ഉപയോഗിക്കാനുള്ള സൗകര്യവും വാട്‌സ്ആപ്പ് അവതരിപ്പിച്ചു. മുൻപ് ആൻഡ്രോയിഡ് ഫോണുകളിൽ മാത്രം ലഭ്യമായിരുന്ന ഈ ഫീച്ചർ ഉപയോഗിച്ച് ഒരേ ഐഫോണിൽ തന്നെ പേഴ്സണൽ അക്കൗണ്ടും ബിസിനസ് അക്കൗണ്ടും നിയന്ത്രിക്കാം. നിലവിൽ ഏത് അക്കൗണ്ടാണ് ഉപയോഗിക്കുന്നത് എന്ന് തിരിച്ചറിയാൻ താഴെ ഭാഗത്തായി പ്രൊഫൈൽ ചിത്രം കാണാൻ സാധിക്കും.

എഐ ഫീച്ചറുകളിലും വാട്‌സ്ആപ്പ് മാറ്റങ്ങൾ വരുത്തിയിട്ടുണ്ട്. മെറ്റാ എഐ ഉപയോഗിച്ച് ചാറ്റുകൾക്കുള്ളിൽ വെച്ച് തന്നെ ഫോട്ടോകൾ എഡിറ്റ് ചെയ്യാൻ സാധിക്കും. ചിത്രങ്ങളിലെ അനാവശ്യ ഭാഗങ്ങൾ മാറ്റാനും പശ്ചാത്തലം ക്രമീകരിക്കാനും പുതിയ സ്റ്റൈലുകൾ നൽകാനും ഇതിലൂടെ എളുപ്പത്തിൽ കഴിയും.

അതേസമയം, ചാറ്റുകളിലെ സാഹചര്യം അനുസരിച്ച് മറുപടികൾ നൽകാൻ സഹായിക്കുന്ന റൈറ്റിംഗ് ഹെൽപ്പ് ഫീച്ചറും വാട്‌സ്ആപ്പ് പരിഷ്കരിച്ചു. സ്വകാര്യതയ്ക്ക് മുൻഗണന നൽകിക്കൊണ്ട് തന്നെ വേഗത്തിൽ മറുപടികൾ തയ്യാറാക്കാൻ ഇത് ഉപയോക്താക്കളെ സഹായിക്കും. പുതിയ ഫീച്ചറുകൾ ഇപ്പോൾ പുറത്തിറങ്ങിക്കൊണ്ടിരിക്കുകയാണെന്നും വരും ആഴ്ചകളിൽ എല്ലാവർക്കും ലഭ്യമാകുമെന്നും മെറ്റ അറിയിച്ചു.