യാത്ര കൂടുതൽ സുരക്ഷിതമാക്കാൻ ഉബർ, പുതിയ സുരക്ഷാ ഫീച്ചറുകൾ പ്രഖ്യാപിച്ചു

ഇന്ത്യയിലെ തങ്ങളുടെ റൈഡ്-ഹെയ്ലിംഗ് പ്ലാറ്റ്‌ഫോമിനായി പുതിയ സുരക്ഷാ ഫീച്ചറുകൾ ഉബർ പ്രഖ്യാപിച്ചു. തിങ്കളാഴ്ച ന്യൂഡൽഹിയിൽ നടന്ന ചടങ്ങിലാണ് കമ്പനി ഇത് സംബന്ധിച്ച വിവരങ്ങൾ പുറത്തുവിട്ടത്. അടിയന്തര സാഹചര്യങ്ങളിലെ പ്രതികരണം മെച്ചപ്പെടുത്തുക, ഡ്രൈവിംഗിനിടയിലുള്ള ശ്രദ്ധക്കുറവ് കുറയ്ക്കുക, യാത്ര സ്ഥിരീകരിക്കുന്നതിൽ ഉപയോക്താക്കൾക്ക് കൂടുതൽ നിയന്ത്രണം നൽകുക എന്നിവയാണ് ഈ പുതിയ ഫീച്ചറുകളുടെ ലക്ഷ്യം.

യാത്രക്കാരുടെയും ഡ്രൈവർമാരുടെയും സുരക്ഷ വർധിപ്പിക്കുന്നതിനാണ് 'റെക്കോർഡ് മൈ റൈഡ്' (Record My Ride), 'ആംബുലൻസ് അസിസ്റ്റൻസ്' (Ambulance Assistance) എന്നീ ആദ്യ രണ്ട് ഫീച്ചറുകൾ അവതരിപ്പിച്ചിരിക്കുന്നത്. ഇതിനുപുറമെ, 'ഡോണ്ട് ടൈപ്പ് ആൻഡ് ഡ്രൈവ്' (Don't Type & Drive), 'സെറ്റ് യുവർ ഓൺ പിൻ' (Set Your Own PIN) എന്നീ പുതിയ സുരക്ഷാ ഫീച്ചറുകളും ഉബർ ആപ്പിൽ ഉൾപ്പെടുത്തിയിട്ടുണ്ട്. ഓഡിയോ റെക്കോർഡിംഗ്, റൈഡ് ചെക്ക്, വനിതാ യാത്രക്കാർക്കുള്ള മുൻഗണന, ഹെൽമെറ്റ് സെൽഫി വെരിഫിക്കേഷൻ തുടങ്ങിയ നിലവിലുള്ള സുരക്ഷാ സംവിധാനങ്ങൾക്കൊപ്പം തന്നെയാണ് ഈ പുതിയ ഫീച്ചറുകളും ലഭ്യമാകുക.

ഉബറിലെ പുതിയ സുരക്ഷാ ഫീച്ചറുകൾ:

'റെക്കോർഡ് മൈ റൈഡ്' (Record My Ride) എന്ന ഫീച്ചർ വഴി, യാത്രയ്ക്കിടയിൽ അസുരക്ഷിതത്വം തോന്നിയാൽ ഡ്രൈവർമാർക്ക് തങ്ങളുടെ സ്മാർട്ട്‌ഫോൺ ഉപയോഗിച്ച് ഉബർ ആപ്പിലൂടെ തന്നെ ക്യാബിനുള്ളിലെ വീഡിയോകൾ എൻക്രിപ്റ്റ് ചെയ്ത് റെക്കോർഡ് ചെയ്യാൻ സാധിക്കും. ഇത്തരം ഫീച്ചർ ഈ മേഖലയിൽ തന്നെ ആദ്യത്തേതാണെന്നാണ് ഉബർ അവകാശപ്പെടുന്നത്. റെക്കോർഡ് ചെയ്യുന്ന ദൃശ്യങ്ങൾ പൂർണ്ണമായും എൻക്രിപ്റ്റ് ചെയ്ത രീതിയിൽ സുരക്ഷിതമായിരിക്കും. അതുകൊണ്ട് തന്നെ ഡ്രൈവർക്കോ ഉബറിനോ ഈ ദൃശ്യങ്ങൾ നേരിട്ട് പരിശോധിക്കാൻ കഴിയില്ല. സുരക്ഷാ റിപ്പോർട്ടുകൾ സമർപ്പിക്കുമ്പോൾ ഡ്രൈവറോ യാത്രക്കാരോ സ്വമേധയാ നൽകിയാൽ മാത്രമേ ഈ വീഡിയോകൾ ലഭ്യമാകൂ എന്ന് ഉബർ വ്യക്തമാക്കി.

'ഡയൽ 4242' (Dial 4242) എന്ന പ്ലാറ്റ്‌ഫോമുമായി ചേർന്ന് 'ആംബുലൻസ് അസിസ്റ്റൻസ്' (Ambulance Assistance) എന്ന പുതിയ ഫീച്ചറും ഉബർ അവതരിപ്പിക്കുന്നുണ്ട്. ഉബർ യാത്രയ്ക്കിടെ അപകടത്തിൽപ്പെടുന്ന ഡ്രൈവർമാർക്കും യാത്രക്കാർക്കും ഉബറിന്റെ 24x7 സേഫ്റ്റി ലൈനിലൂടെ അടിയന്തര വൈദ്യസഹായം വേഗത്തിൽ ലഭ്യമാക്കാൻ ഈ സൗകര്യം സഹായിക്കും. അത്യാവശ്യഘട്ടങ്ങളിൽ അടിയന്തര വൈദ്യസേവനങ്ങൾ വേഗത്തിൽ എത്തിക്കുകയാണ് ഈ സംയോജനത്തിലൂടെ ലക്ഷ്യമിടുന്നത്.

'ഡോണ്ട് ടൈപ്പ് ആൻഡ് ഡ്രൈവ്' (Don't Type & Drive) ആണ് മറ്റൊരു പുതിയ ഫീച്ചർ. പേര് സൂചിപ്പിക്കുന്നത് പോലെ, വാഹനം ഓടിക്കൊണ്ടിരിക്കുമ്പോൾ ഉബർ ഡ്രൈവർ ആപ്പിൽ ടൈപ്പ് ചെയ്യുന്നത് ഇത് തടയുന്നു. സന്ദേശങ്ങൾക്ക് മറുപടി നൽകുന്നതിന് മുൻപ് വാഹനം സുരക്ഷിതമായി നിർത്തിയിടാൻ ഡ്രൈവർമാരോട് നിർദ്ദേശിക്കും. ഡ്രൈവിംഗിനിടയിലുള്ള ശ്രദ്ധക്കുറവ് ഒഴിവാക്കുകയാണ് ഇതിന്റെ ലക്ഷ്യമെന്ന് കമ്പനി പറയുന്നു.

'സെറ്റ് യുവർ ഓൺ പിൻ' (Set Your Own PIN) ആണ് അവസാനത്തെ പുതിയ ഫീച്ചർ. യാത്രക്കാർക്ക് തങ്ങളുടെ ഇഷ്ടാനുസരണമുള്ള വെരിഫിക്കേഷൻ പിൻ സ്വയം തിരഞ്ഞെടുക്കാനും കൈകാര്യം ചെയ്യാനും ഇതിലൂടെ സാധിക്കും. ഓട്ടോമാറ്റിക്കായി ജനറേറ്റ് ചെയ്യുന്ന പിൻ നമ്പറുകളെ മാത്രം ആശ്രയിക്കേണ്ടതില്ല എന്നതാണ് ഇതിന്റെ പ്രത്യേകത.

ഉബറിന്റെ വിപുലമായ സുരക്ഷാ സംവിധാനങ്ങളുടെ ഭാഗമായാണ് ഈ പുതിയ ഫീച്ചറുകളും ഉൾപ്പെടുത്തിയിരിക്കുന്നത്. റൈഡ് ചെക്ക്, ഫോൺ നമ്പർ-വിലാസം എന്നിവ മറച്ചുവെക്കാനുള്ള സൗകര്യം (Anonymisation), സുരക്ഷാ മുൻഗണനകൾ, സീറ്റ്‌ബെൽറ്റ് റിമൈൻഡറുകൾ, ഓഡിയോ റെക്കോർഡിംഗ്, വനിതാ യാത്രക്കാർക്കുള്ള മുൻഗണന, ഹെൽമെറ്റ് സെൽഫി വെരിഫിക്കേഷൻ, 24x7 സേഫ്റ്റി ലൈൻ എന്നിവ ഉബർ ഇതിനകം തന്നെ ലഭ്യമാക്കുന്നുണ്ട്.