സോറ എഐ ആപ്പ് ഉടൻ നിർത്തലാക്കും; ഡിസ്നിയുമായുള്ള 8,300 കോടിയുടെ കരാറും അവസാനിപ്പിക്കുന്നു

ഓപ്പൺ എഐ അവരുടെ ജനപ്രിയ ആപ്പായ സോറ നിർത്തലാക്കുന്നു. മൊബൈൽ ആപ്പ്, എപിഐ എന്നിവയ്ക്ക് ഈ തീരുമാനം ബാധകമാണ്. ഈ നടപടിയുടെ കാരണം കമ്പനി വെളിപ്പെടുത്തിയിട്ടില്ല. എന്നാൽ സോറയുടെ ഫീച്ചറുകൾ ചാറ്റ്ജിപിടിയിൽ ഉൾപ്പെടുത്താനുള്ള നീക്കമാണിതെന്ന് റിപ്പോർട്ടുകൾ സൂചിപ്പിക്കുന്നു. കൂടുതൽ വിവരങ്ങൾ വരും ദിവസങ്ങളിൽ പുറത്തുവിടുമെന്ന് കമ്പനി അറിയിച്ചു.

സോറ (Sora) ആപ്പ് ഉടൻ നിർത്തലാക്കുന്നു.

സോറ ആപ്പിന്റെ ഔദ്യോഗിക എക്സ് (മുൻപ് ട്വിറ്റർ) പേജിലൂടെയാണ് ഈ എഐ വീഡിയോ ജനറേഷൻ ആപ്പ് നിർത്തലാക്കുന്ന വിവരം കമ്പനി അറിയിച്ചത്. "സോറ ഉപയോഗിച്ച് ക്രിയേറ്റ് ചെയ്തവർക്കും, അത് ഷെയർ ചെയ്തവർക്കും, ഇതിനുചുറ്റും ഒരു കമ്മ്യൂണിറ്റി കെട്ടിപ്പടുക്കാൻ സഹായിച്ചവർക്കും നന്ദി. നിങ്ങൾ സോറയിൽ നിർമ്മിച്ചതെല്ലാം വളരെ പ്രധാനപ്പെട്ടതായിരുന്നു, ഈ വാർത്ത നിരാശാജനകമാണെന്ന് ഞങ്ങൾക്കറിയാം," എന്നാണ് പോസ്റ്റിൽ പറയുന്നത്. ഇത് സംബന്ധിച്ച കൂടുതൽ വിവരങ്ങൾ വരും ദിവസങ്ങളിൽ അറിയിക്കുമെന്നും കമ്പനി വ്യക്തമാക്കി.

പ്ലാറ്റ്‌ഫോം നിർത്തലാക്കുന്നതിന് മുൻപ്, ഉപയോക്താക്കൾ സോറ ആപ്പ് ഉപയോഗിച്ച് നിർമ്മിച്ച വീഡിയോകൾ സൂക്ഷിച്ചുവെക്കാനുള്ള (Preserve) വഴികൾ പങ്കുവെക്കുമെന്ന് കമ്പനി അറിയിച്ചു. ഇവിടെ ശ്രദ്ധിക്കേണ്ട പ്രധാന കാര്യം, സോറ ആപ്പും എപിഐയും (API) മാത്രമാണ് നിർത്തലാക്കുന്നത് എന്നാണ്. ടെക്സ്റ്റ് പ്രോംപ്റ്റുകളിൽ നിന്നും ചിത്രങ്ങളിൽ നിന്നും വീഡിയോകൾ നിർമ്മിക്കാൻ സഹായിക്കുന്ന അതേ പേരിലുള്ള എഐ മോഡൽ (AI Model) തുടർന്നും ലഭ്യമായിരിക്കും.

ഓപ്പൺ എഐയുടെ പ്രധാന ഉൽപ്പന്നമായ ചാറ്റ്ജിപിടിയിൽ സോറയുടെ വീഡിയോ നിർമ്മാണ ശേഷി ഉൾപ്പെടുത്താൻ കമ്പനി പദ്ധതിയിടുന്നതായുള്ള റിപ്പോർട്ടുകൾക്കിടയിലാണ് ഈ പ്രഖ്യാപനം വരുന്നത്. എങ്കിലും, ഇക്കാര്യത്തിൽ ഔദ്യോഗികമായ സ്ഥിരീകരണങ്ങളൊന്നും തന്നെ ഇതുവരെ കമ്പനിയുടെ ഭാഗത്തുനിന്ന് ഉണ്ടായിട്ടില്ല.

സോറ ആപ്പ് നിർത്തലാക്കുന്നതിന്റെ കാരണം ഓപ്പൺ എഐ വ്യക്തമാക്കിയിട്ടില്ലെങ്കിലും, റോബോട്ടിക്സ് രംഗത്തെ പുരോഗതിക്കായി 'വേൾഡ് സിമുലേഷൻ റിസർച്ചിൽ' ശ്രദ്ധ കേന്ദ്രീകരിക്കാനാണ് കമ്പനിയുടെ നീക്കമെന്ന് ഡീക്രിപ്റ്റിന് (Decrypt) നൽകിയ പ്രസ്താവനയിൽ പറഞ്ഞു. എജിഐ (AGI), ഏജന്റിക് എഐ (Agentic AI) എന്നിവയുടെ വികസനത്തിന് ആവശ്യമായ കമ്പ്യൂട്ടിംഗ് സൗകര്യങ്ങളിൽ ശ്രദ്ധ നൽകുന്നതിനാലാണ് സോറ ആപ്പിനും എപിഐ സേവനങ്ങൾക്കുമുള്ള പിന്തുണ അവസാനിപ്പിക്കാൻ കഠിനമായ തീരുമാനമെടുത്തതെന്നും കമ്പനി കൂട്ടിച്ചേർത്തു.

ഇതുകൂടാതെ, ഡിസ്നിയുമായുള്ള ഓപ്പൺ എഐയുടെ കരാറും ഇതോടെ അവസാനിക്കുമെന്നത് ശ്രദ്ധേയമാണ്. 2025 ഡിസംബറിൽ ഒപ്പുവെച്ച ഈ കരാറിലൂടെ ഇരുനൂറിലധികം കഥാപാത്രങ്ങളെ ഉപയോഗിക്കാനുള്ള അവകാശവും ഏകദേശം 8,300 കോടി രൂപയുടെ (1 ബില്യൺ ഡോളർ) ഇക്വിറ്റി നിക്ഷേപവുമാണ് ഓപ്പൺ എഐക്ക് ലഭിച്ചിരുന്നത്. എന്നാൽ, ഇതുവരെ ഇരു കമ്പനികൾക്കുമിടയിൽ സാമ്പത്തിക ഇടപാടുകളൊന്നും നടന്നിട്ടില്ലെന്നാണ് റിപ്പോർട്ടുകൾ സൂചിപ്പിക്കുന്നത്.