Al ഇംപാക്ട് ഉച്ചകോടി 2026 ആരംഭിച്ചു; ഇന്ത്യയിലെ ആദ്യത്തെ Al കോൺഫറൻസിൻ്റെ ഷെഡ്യൂളും രജിസ്ട്രേഷൻ വിവരങ്ങളും അറിയാം

സാങ്കേതികവിദ്യ, നയരൂപീകരണം, വ്യവസായം എന്നിവയിലെ ചില പ്രധാനപ്പെട്ട വ്യക്തികളെ ഒരുമിച്ച് കൊണ്ടുവരുന്ന ആദ്യത്തെ ആഗോള ആർട്ടിഫിഷ്യൽ ഇൻ്റലിജൻസ് കോൺഫറൻസായ AI ഇംപാക്ട് സമ്മിറ്റ് 2026-ന് ഇന്ത്യ ആതിഥേയത്വം വഹിക്കാൻ ഒരുങ്ങുകയാണ്. അഞ്ച് ദിവസത്തെ പരിപാടി ഫെബ്രുവരി 16 മുതൽ ഫെബ്രുവരി 20 വരെ നടക്കും. പ്രധാന ഉച്ചകോടി ഫെബ്രുവരി 19, 20 തീയതികളിലാണു നടക്കുന്നത്. ചർച്ചകൾക്കും സഹകരണത്തിനുമുള്ള ഒരു വലിയ വേദിയായി സംഘടിപ്പിക്കുന്ന ഉച്ചകോടി, ആഗോള പങ്കാളിത്തം ശക്തിപ്പെടുത്തുന്നതിനൊപ്പം ഇന്ത്യയുടെ AI റോഡ്മാപ്പ് രൂപപ്പെടുത്താനും ലക്ഷ്യമിടുന്നു. മുൻനിര AI കമ്പനികൾ, ബഹുരാഷ്ട്ര കോർപ്പറേഷനുകൾ, സ്റ്റാർട്ടപ്പുകൾ, വിവിധ ഗവൺമെൻ്റുകൾ എന്നിവയിൽ നിന്നുള്ള നേതാക്കൾ ഇതിൽ പങ്കെടുക്കും. പങ്കെടുക്കുമെന്നു സ്ഥിരീകരിച്ചവരിൽ ഗൂഗിൾ സിഇഒ സുന്ദർ പിച്ചൈ, ഓപ്പൺഎഐ സിഇഒ സാം ആൾട്ട്മാൻ എന്നിവരും ഉൾപ്പെടുന്നു. മുഖ്യ സെഷനുകൾ, നയ ചർച്ചകൾ, ഗവേഷണ പ്രദർശനങ്ങൾ, സിഇഒ റൗണ്ട് ടേബിളുകൾ എന്നിവ ആസൂത്രണം ചെയ്തിരിക്കുന്നതിനാൽ, ഇന്ത്യയുടെ AI വികസനത്തിന്റെ ഭാവിയെ ഈ ഉച്ചകോടി വളരെയധികം സ്വാധീനിക്കുമെന്ന് പ്രതീക്ഷിക്കുന്നു.

Al ഇംപാക്ട് ഉച്ചകോടി 2026-ന് എങ്ങിനെ രജിസ്റ്റർ ചെയ്യാം:

2026-ലെ AI ഇംപാക്ട് ഉച്ചകോടിയിൽ നേരിട്ട് പങ്കെടുക്കാൻ ആഗ്രഹിക്കുന്നവർ ഔദ്യോഗിക വെബ്‌സൈറ്റ് വഴി പ്രതിനിധികളായി രജിസ്റ്റർ ചെയ്യണം. രജിസ്ട്രേഷൻ പ്രക്രിയ ലളിതവും സൗജന്യവുമാണ്. താൽപ്പര്യമുള്ള പങ്കാളികൾ ഔദ്യോഗിക രജിസ്ട്രേഷൻ പേജ് സന്ദർശിച്ച് ആവശ്യമായ വിശദാംശങ്ങൾ പൂരിപ്പിച്ചു നൽകണം.

ഫോമിൽ അടിസ്ഥാന വ്യക്തിഗത വിവരങ്ങൾ ആവശ്യപ്പെടുന്നു, കൂടാതെ ഡിജിറ്റൽ ഫോർമാറ്റിലുള്ള സമീപകാല ഫോട്ടോയും ആവശ്യമാണ്. രജിസ്ട്രേഷൻ പ്രക്രിയ പൂർത്തിയാക്കാൻ അപേക്ഷകർ OTP വഴി അവരുടെ ഇമെയിൽ വിലാസം സ്ഥിരീകരിക്കുകയും വേണം.

വിജയകരമായ രജിസ്ട്രേഷന് ശേഷം, പ്രതിനിധികൾക്ക് അവരുടെ രജിസ്ട്രേഷൻ വിവരങ്ങളും ഒരു QR കോഡും അടങ്ങിയ ഒരു സ്ഥിരീകരണ ഇമെയിൽ ലഭിക്കും. ഈ QR കോഡ് പ്രധാനമാണ്, കാരണം പ്രവേശനം അനുവദിക്കുന്നതിന് മുൻപ് സുരക്ഷാ ഉദ്യോഗസ്ഥർ അത് സ്കാൻ ചെയ്യും. പങ്കെടുക്കുന്നവർ അവരുടെ ഫോണിലോ പ്രിന്റ് ചെയ്ത പകർപ്പായോ QR കോഡ് എളുപ്പത്തിൽ ലഭ്യമാകുന്ന തരത്തിൽ സൂക്ഷിക്കാൻ ശ്രദ്ധിക്കുക.

ഫെബ്രുവരി 19-ന് നടക്കുന്ന ചില സെഷനുകളിലേക്ക് പരിമിതമായ ആക്‌സസ് മാത്രമേ ഉണ്ടാകൂ എന്നത് ശ്രദ്ധിക്കേണ്ടതാണ്. പ്രധാന AI ഇംപാക്ട് ഉച്ചകോടി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. സുരക്ഷാ ക്രമീകരണങ്ങൾ കാരണം, ഉദ്ഘാടന ചടങ്ങിനിടെയുള്ള ചില ഉന്നതതല സെഷനുകളിൽ പങ്കെടുക്കാൻ പ്രതിനിധികളെ അനുവദിച്ചേക്കില്ല.

Al ഇംപാക്ട് ഉച്ചകോടി 2026-ൻ്റെ ഷെഡ്യൂൾ:

അഞ്ച് ദിവസങ്ങളിലായി നടക്കുന്ന ഉച്ചകോടിക്ക് തിരക്കേറിയ ഷെഡ്യൂൾ തന്നെയാണ്. ഫെബ്രുവരി 16-ന് മുഖ്യ പ്രഭാഷണങ്ങൾ, നയരൂപീകരണ പാനൽ ചർച്ചകൾ, വിദഗ്ദ്ധരുടെ റൗണ്ട് ടേബിളുകൾ എന്നിവയോടെയാണ് ആരംഭിക്കുക.

ഇന്ത്യയിലെ AI-യുമായി ബന്ധപ്പെട്ട തന്ത്രപരമായ സംഭാഷണങ്ങൾക്ക് തുടക്കം കുറിക്കുന്ന ഇന്ത്യ AI എക്‌സ്‌പോയും ഈ ദിവസം ഉദ്ഘാടനം ചെയ്യപ്പെടും.

ഫെബ്രുവരി 17-ന്, മുൻഗണന നൽകേണ്ട മേഖലകളിൽ കൂടുതൽ ശ്രദ്ധ കേന്ദ്രീകരിച്ച് പാനൽ ചർച്ചകൾ തുടരും. പ്രാക്റ്റിക്കൽ AI-യെക്കുറിച്ചുള്ള ഒരു പ്രത്യേക സെമിനാർ നടത്തും. ആരോഗ്യം, ഊർജ്ജം, വിദ്യാഭ്യാസം, കൃഷി, ലിംഗ ശാക്തീകരണം, വൈകല്യങ്ങൾ എന്നിവയിലെ AI ആപ്ലിക്കേഷനുകളെക്കുറിച്ചുള്ള കേസ്ബുക്കുകൾ ഉൾപ്പെടെയുള്ള നോളജ് കോമ്പൻഡിയയും സർക്കാർ ആരംഭിക്കും.

ഫെബ്രുവരി 18, ഗവേഷണത്തിലും പ്രായോഗികമായ നടപ്പാക്കലിലും ശ്രദ്ധ കേന്ദ്രീകരിക്കും. പണ്ഡിതന്മാരെയും പുതിയ കണ്ടെത്തലുകൾ നടത്തുന്നവരെയും ഒരുമിച്ച് കൊണ്ടുവരുന്ന ഒരു ഗവേഷണ സിമ്പോസിയം നടക്കും. ആഗോള ടെക് നേതാക്കളിൽ നിന്നും സ്റ്റാർട്ടപ്പുകളിൽ നിന്നുമുള്ള റിയൽ-വേൾഡ് AI വിന്യാസങ്ങളും ആവശ്യം അനുസരിച്ചുള്ള പരിഹാരങ്ങളും ഇൻഡസ്ട്രി സെഷനുകൾ പ്രദർശിപ്പിക്കും.

ഫെബ്രുവരി 19 ന് പ്രധാനമന്ത്രി നരേന്ദ്ര മോദിയുടെ ഉദ്ഘാടനത്തോടെയാണ് പ്രധാന ഉച്ചകോടി ആരംഭിക്കുന്നത്. തുടർന്ന് ഒരു സിഇഒ വട്ടമേശ സമ്മേളനവും നടക്കും.

അവിടെ ആഗോള വ്യവസായ നേതാക്കളും നയരൂപീകരണ വിദഗ്ധരും നിക്ഷേപ തന്ത്രങ്ങൾ, നവീകരണത്തിനുള്ള പാതകൾ, ഉത്തരവാദിത്തമുള്ള എഐയുടെ വികസനം എന്നിവ ചർച്ച ചെയ്യും. അന്താരാഷ്ട്ര സഹകരണം ശക്തിപ്പെടുത്തുന്നതിനായി ലക്ഷ്യമിട്ടുള്ള ഗ്ലോബൽ പാർട്ണർഷിപ്പ് ഓൺ ആർട്ടിഫിഷ്യൽ ഇന്റലിജൻസ് (ജിപിഎഐ) യുടെ ഒന്നിലധികം കൗൺസിൽ മീറ്റിംഗുകൾ ഫെബ്രുവരി 20-ന് നടക്കും.

Al ഇംപാക്റ്റ് ഉച്ചകോടി 2026-ൽ പങ്കെടുക്കുന്ന പ്രമുഖ വ്യക്തികൾ:

നിരവധി പ്രമുഖ ആഗോള നേതാക്കൾ ചടങ്ങിൽ പങ്കെടുക്കുമെന്ന് ഉറപ്പായിട്ടുണ്ട്. ഗൂഗിളിന്റെ സിഇഒ സുന്ദർ പിച്ചൈ, ഓപ്പൺഎഐയുടെ സിഇഒ സാം ആൾട്ട്മാൻ, ഗൂഗിൾ ഡീപ് മൈൻഡിന്റെ ഡെമിസ് ഹസാബിസ്, റിലയൻസ് ഇൻഡസ്ട്രീസിന്റെ മുകേഷ് അംബാനി, ഇൻഫോസിസിന്റെ സലിൽ പരേഖ്, ക്വാൽകോമിന്റെ ക്രിസ്റ്റ്യാനോ അമോൺ, ടാറ്റ കൺസൾട്ടൻസി സർവീസസിന്റെ കെ കൃതിവാസൻ, ആക്‌സെഞ്ചറിലെ ജൂലി സ്വീറ്റ്, ക്ലൗഡ്‌ഫ്ലെയറിലെ മാത്യു പ്രിൻസ്, ആന്ത്രോപിക്കിന്റെ ഡാരിയോ അമോഡി, ഭാരതി എന്റർപ്രൈസസിന്റെ സുനിൽ ഭാരതി മിത്തൽ, മെറ്റയുടെ അലക്‌സാണ്ടർ വാങ് എന്നിവരെല്ലാം ഇതിൽ ഉൾപ്പെടുന്നു.

എൻവിഡിയയുടെ സ്ഥാപകനും സിഇഒയുമായ ജെൻസൺ ഹുവാങ് അപ്രതീക്ഷിത സാഹചര്യങ്ങൾ കാരണം പരിപാടിയിൽ പങ്കെടുക്കില്ല. ഈ ഉച്ചകോടി ഇന്ത്യയുടെ എഐ ഭാവിയിൽ ഒരു പ്രധാന നാഴികക്കല്ല് അടയാളപ്പെടുത്തുകയും ആഗോളതലത്തിലെ എഐ ആവാസവ്യവസ്ഥയിൽ സ്ഥാനം ശക്തിപ്പെടുത്തുകയും ചെയ്യുമെന്ന് പ്രതീക്ഷിക്കുന്നു.