ലിമിറ്റഡ് എഡിഷൻ? ഐഫോൺ ഫോൾഡിന്റെ സ്റ്റോക്ക് കുറവായിരിക്കാൻ സാധ്യത; കാരണമിതാണ്.

ഐഫോൺ ഫോൾഡിന്റെ ലോഞ്ച് വൈകില്ല; ഐഫോൺ 18 പ്രോയ്ക്കൊപ്പം ഈ വർഷം തന്നെ പുറത്തിറങ്ങിയേക്കും. സാങ്കേതിക വെല്ലുവിളികൾ മൂലം ലോഞ്ച് 2027-ലേക്ക് മാറുമെന്ന പ്രചരണങ്ങൾ തെറ്റാണെന്നും ആപ്പിളിന്റെ മടക്കാവുന്ന ഫോൺ നിശ്ചയിച്ച സമയത്ത് തന്നെ എത്തുമെന്നും പുതിയ റിപ്പോർട്ടുകൾ സൂചിപ്പിക്കുന്നു.

ഐഫോൺ ഫോൾഡ് സെപ്റ്റംബറിൽ എത്തിയേക്കും; ലോഞ്ച് വിവരങ്ങൾ പുറത്ത്

ആപ്പിളിന്റെ ആദ്യ മടക്കാവുന്ന ഫോണായ ഐഫോൺ ഫോൾഡ് ഈ വർഷം തന്നെ വിപണിയിലെത്തിയേക്കുമെന്ന് റിപ്പോർട്ട്. ബ്ലൂംബെർഗിലെ മാർക്ക് ഗുർമാൻ നൽകുന്ന സൂചനകൾ പ്രകാരം, ഫോണിന്റെ നിർമ്മാണത്തിൽ നിലവിൽ തടസ്സങ്ങളൊന്നുമില്ല. സെപ്റ്റംബർ ആദ്യ പകുതിയോടെ ഐഫോൺ 18 പ്രോ സീരീസിനൊപ്പം തന്നെ ഈ പുതിയ ഹാൻഡ്‌സെറ്റും അവതരിപ്പിക്കാനാണ് ആപ്പിൾ ലക്ഷ്യമിടുന്നത്. അതേസമയം, സാധാരണ ഐഫോൺ 18 മോഡലിന്റെ ലോഞ്ച് 2027-ലേക്ക് നീളാനാണ് സാധ്യത.

ഐഫോൺ ഫോൾഡിന്റെ ലഭ്യത തുടക്കത്തിൽ കുറവായിരിക്കുമെങ്കിലും, മറ്റ് ഐഫോൺ ഫ്ലാഗ്ഷിപ്പുകൾക്കൊപ്പം തന്നെ ഇത് വിപണിയിലെത്തിക്കാൻ ആപ്പിൾ ശ്രമിക്കുന്നുണ്ട്. നിർമ്മാണത്തിന്റെ പ്രാരംഭ ഘട്ടത്തിൽ ചില സാങ്കേതിക വെല്ലുവിളികൾ നേരിടുന്നുണ്ടെന്ന് 'നിക്കി ഏഷ്യ' റിപ്പോർട്ട് ചെയ്തിരുന്നു. എഞ്ചിനീയറിംഗ് പരിശോധനകളിൽ ഉണ്ടായ ഈ തടസ്സങ്ങൾ പരിഹരിക്കാൻ ആപ്പിൾ സപ്ലൈ ചെയിൻ പങ്കാളികളുമായി ചേർന്ന് പ്രവർത്തിക്കുകയാണ്. ഇത് ലോഞ്ചിനെ അല്പം ബാധിച്ചേക്കാമെങ്കിലും അധികം വൈകാതെ തന്നെ ഫോൺ ഉപഭോക്താക്കളിലേക്ക് എത്തുമെന്നാണ് സൂചന.

ആപ്പിളിന്റെ ഏറെ പ്രതീക്ഷിക്കപ്പെടുന്ന ഫോൾഡബിൾ ഐഫോണിന്റെ ട്രയൽ പ്രൊഡക്ഷൻ ഫോക്‌സ്‌കോൺ ആരംഭിച്ചതായി പുതിയ റിപ്പോർട്ടുകൾ സൂചിപ്പിക്കുന്നു. ആദ്യ ഘട്ടത്തിൽ 70 ലക്ഷം മുതൽ 80 ലക്ഷം വരെ യൂണിറ്റുകൾ പുറത്തിറക്കാനാണ് ആപ്പിൾ ലക്ഷ്യമിടുന്നത്. ഇത് കമ്പനിയുടെ ആകെ ഐഫോൺ ഉൽപാദനത്തിന്റെ പത്ത് ശതമാനത്തിൽ താഴെ മാത്രമാണ്. വരാനിരിക്കുന്ന ഐഫോൺ ലോഞ്ച് സൈക്കിളിൽ വളരെ പരിമിതമായ അളവിൽ മാത്രമേ ഈ ഫോൾഡബിൾ മോഡൽ ലഭ്യമാകൂ എന്നാണ് ഇത് വ്യക്തമാക്കുന്നത്.