സ്മാർട്ട്ഫോൺ വിപണിയിലേക്കൊരു സൈലൻ്റ് എൻട്രിയുമായി വിവോ; വിവോ Y500i ഫോണിൻ്റെ വിശേഷങ്ങൾ അറിയാം

പ്രമുഖ സ്മാർട്ട്ഫോൺ ബ്രാൻഡായ വിവോ തങ്ങളുടെ പുതിയ സ്മാർട്ട്‌ഫോണായ വിവോ Y500i ചൈനയിൽ സൈലൻ്റായി ലോഞ്ച് ചെയ്തു. വലിയ ആഘോഷങ്ങൾ ഇല്ലാതെ ലോഞ്ച് ചെയ്ത ഈ ഫോൺ ഇപ്പോൾ വിവോയുടെ ഓൺലൈൻ സ്റ്റോറിൽ നിന്ന് നേരിട്ട് വാങ്ങാനാകും, മൂന്ന് വ്യത്യസ്ത നിറങ്ങളിൽ ഇത് ലഭ്യമാണ്. ചൈനീസ് വിപണിയിൽ അഞ്ചു വ്യത്യസ്തമായ റാം, സ്റ്റോറേജ് കോമ്പിനേഷനുകളിൽ ഈ ഫോൺ വാങ്ങാൻ കഴിയും. വിവോ Y500i മോഡലിന് 8.39mm മാത്രം കട്ടിയുള്ള സ്ലിം ഡിസൈനാണുള്ളത്, ഇതിന് ഏകദേശം 219 ഗ്രാം ഭാരമുണ്ട്. ദീർഘനേരം ഉപയോഗം ഉറപ്പു നൽകുന്ന 7,200mAh ബാറ്ററിയാണ് വിവോ Y500i ഫോണിലുള്ളത്. 12GB വരെ റാമുമായി ജോടിയാക്കിയിരിക്കുന്ന ഒക്ടാ-കോർ സ്‌നാപ്ഡ്രാഗൺ 4 ജെൻ 2 പ്രോസസറിൽ സ്‌മാർട്ട്‌ഫോൺ പ്രവർത്തിക്കുന്നു. സ്റ്റോറേജ് ഓപ്ഷൻ 512GB വരെയാണുള്ളത്. ഇന്ത്യയിൽ വിവോയുടെ ഫോണുകൾക്ക് വലിയ തോതിൽ ആരാധകർ ഉള്ളതിനാൽ ഈ മോഡൽ ഉടനെ ഇന്ത്യയിലും എത്തുമെന്ന പ്രതീക്ഷയിലാണ് സ്മാർട്ട്ഫോൺ പ്രേമികൾ.

വിവോ Y500i ഫോണിൻ്റെ വിലയും ലഭ്യതയും:

വിവോയുടെ ഓൺലൈൻ സ്റ്റോർ വഴി വിവോ Y500i ഇപ്പോൾ ചൈനയിൽ വാങ്ങാൻ ലഭ്യമാണ്. ഗാലക്‌സി സിൽവർ, ഫീനിക്‌സ് വെൽക്കംസ് ഗോൾഡ്, ഒബ്‌സിഡിയൻ ബ്ലാക്ക് എന്നീ മൂന്ന് നിറങ്ങളിലാണ് ഇത് ലഭ്യമാകുന്നത്.

8 ജിബി റാമും 128 ജിബി സ്റ്റോറേജുമുള്ള അടിസ്ഥാന മോഡലിന് 1,499 യുവാൻ (ഏകദേശം 19,000 രൂപ) ആണ് വില. 8 ജിബി + 256 ജിബി പതിപ്പിന് 1,799 യുവാൻ (ഏകദേശം 23,000 രൂപ), 8 ജിബി + 512 ജിബി, 12 ജിബി + 256 ജിബി മോഡലുകൾക്ക് 1,999 യുവാൻ (ഏകദേശം 26,000 രൂപ) എന്നിങ്ങനെയാണ് വില. 12 ജിബി റാമും 512 ജിബി സ്റ്റോറേജുമുള്ള ടോപ്പ് വേരിയന്റിന് 2,199 യുവാൻ (ഏകദേശം 28,000 രൂപ) വില വരുന്നു.

വിവോ Y500i ഫോണിൻ്റെ പ്രധാന സവിശേഷതകൾ:

ആൻഡ്രോയിഡ് 16 അടിസ്ഥാനമാക്കിയ ഒറിജിൻഒഎസ് 6-ൽ പ്രവർത്തിക്കുന്ന ഒരു ഡ്യുവൽ സിം സ്മാർട്ട്‌ഫോണാണ് വിവോ Y500i. 720×1,570 പിക്‌സൽ റെസല്യൂഷനുള്ള 6.75 ഇഞ്ച് എൽസിഡി സ്‌ക്രീനും, 19.6:9 ആസ്പക്റ്റ് റേഷ്യോയും, 90.6% സ്‌ക്രീൻ-ടു-ബോഡി റേഷ്യോയും ഇതിനുണ്ട്. ഡിസ്‌പ്ലേ 120Hz വരെ റീഫ്രഷ് റേറ്റിനെ പിന്തുണയ്ക്കുകയും 16.7 മില്യൺ നിറങ്ങൾ പ്രദർശിപ്പിക്കുകയും ചെയ്യുന്നു. 4nm പ്രോസസ്സിൽ നിർമ്മിച്ച ഒക്ടാ-കോർ സ്‌നാപ്ഡ്രാഗൺ 4 ജെൻ 2 ചിപ്‌സെറ്റാണ് ഫോണിന് കരുത്ത് പകരുന്നത്. 2.2GHz-ൽ ക്ലോക്ക് ചെയ്ത രണ്ട് പെർഫോമൻസ് കോറുകളും 1.95GHz-ൽ ആറ് എഫിഷ്യൻസി കോറുകളും, അഡ്രിനോ 613 ജിപിയുവും ഇതിനുണ്ട്.

വിവോ Y500i-യിൽ f/1.8 അപ്പേർച്ചർ, ഓട്ടോഫോക്കസ്, 10x ഡിജിറ്റൽ സൂം എന്നിവയുള്ള സിംഗിൾ 50 മെഗാപിക്സൽ റിയർ സെൻസർ ഉണ്ട്. സെൽഫികൾക്കും വീഡിയോ കോളുകൾക്കുമായി f/2.2 അപ്പേർച്ചറുള്ള 5 മെഗാപിക്സൽ ഫ്രണ്ട് ക്യാമറയും നൽകിയിരിക്കുന്നു. 1080p വരെ വീഡിയോ റെക്കോർഡിംഗ് പിന്തുണയുള്ള ഫോണിന് പൊടി, ജല പ്രതിരോധം എന്നിവയ്ക്കായി IP68, IP69 റേറ്റിംഗുകളുമുണ്ട്.

44W വയർഡ് ഫാസ്റ്റ് ചാർജിംഗുള്ള 7,200mAh ബാറ്ററിയാണ് ഇതിലുള്ളത്. കണക്റ്റിവിറ്റി ഓപ്ഷനുകളിൽ 5G, 4G LTE, ഡ്യുവൽ-ബാൻഡ് വൈ-ഫൈ, ബ്ലൂടൂത്ത് 4.2, USB ടൈപ്പ്-സി, BeiDou, GLONASS, ഗലീലിയോ, QZSS പിന്തുണയുള്ള GPS എന്നിവ ഉൾപ്പെടുന്നു. സെൻസറുകളിൽ ആക്‌സിലറോമീറ്റർ, ആംബിയന്റ് ലൈറ്റ്, പ്രോക്‌സിമിറ്റി, ഇ-കോമ്പസ്, ഇൻഫ്രാറെഡ് റിമോട്ട് എന്നിവയും ഉൾപ്പെടുന്നു. സൈഡ്-മൗണ്ടഡ് ഫിംഗർപ്രിന്റ് സ്കാനറുള്ള ഫോണിന്റെ വലിപ്പം 166.64×78.43×8.39mm, ഭാരം 219 ഗ്രാം എന്നിങ്ങനെയാണ്.