വിവോ X300FE, വിവോ X200T എന്നിവ ഉടനെ ഇന്ത്യയിലെത്തും; BlS സർട്ടിഫിക്കേഷൻ സൈറ്റിൽ രണ്ടു ഫോണുകളെയും കണ്ടെത്തി

2026-ൽ ഇന്ത്യൻ വിപണിയിൽ പുറത്തിറക്കേണ്ട സ്മാർട്ട്‌ഫോണുകൾക്കു വേണ്ടിയുള്ള പ്ലാനുകൾ വിവോ ക്രമേണ തയ്യാറാക്കുകയാണ്. 2025 ഡിസംബറിൽ ബ്യൂറോ ഓഫ് ഇന്ത്യൻ സ്റ്റാൻഡേർഡ്‌സ് (ബിഐഎസ്) വെബ്‌സൈറ്റിൽ നാല് പുതിയ വിവോ സ്മാർട്ട്‌ഫോണുകൾ പ്രത്യക്ഷപ്പെട്ടതിനു ശേഷം, ഇപ്പോൾ രണ്ട് മോഡലുകൾ കൂടി ലിസ്റ്റ് ചെയ്യപ്പെട്ടിട്ടുണ്ട്. ഡിസംബർ 31-ലെ പുതിയ ബിഐഎസ് സർട്ടിഫിക്കേഷൻ ഡോക്യുമെൻ്റുകൾ കാണിക്കുന്നത് വിവോ X300 FE, വിവോ X200T എന്നിവ ഇന്ത്യയിൽ വിൽപ്പന നടത്താൻ അംഗീകാരം ലഭിച്ചുവെന്നാണ്. രാജ്യത്ത് ഏതെങ്കിലും ഫോൺ ലോഞ്ച് ചെയ്യുന്നതിന് മുമ്പ് ബിഐഎസ് സർട്ടിഫിക്കേഷൻ ആവശ്യമാണ്, അത്തരം ലിസ്റ്റിംഗുകൾ സാധാരണയായി ലോഞ്ച് ടൈംലൈനിനടുത്തായി കാണപ്പെടും. എന്നാൽ, വിവോ ഇതുവരെ ഈ മോഡലുകൾ പ്രഖ്യാപിക്കുകയോ ലോഞ്ച് വിശദാംശങ്ങൾ പങ്കിടുകയോ ചെയ്തിട്ടില്ല. വിവോ X300 FE, X200T എന്നിവ ഇപ്പോൾ ബിഐഎസ് സർട്ടിഫിക്കേഷൻ ലഭിച്ച വിവോ ഫോണുകളുടെ ഒരു വലിയ ഗ്രൂപ്പിന്റെ ഭാഗമാണ്. ഈ പട്ടികയിൽ വിവോ V70, V70 എലൈറ്റ്, T5x, Y51 എന്നിവ ഉൾപ്പെടുന്നു.

ബിഐഎസ് സർട്ടിഫിക്കേഷൻ വെബ്സൈറ്റിൽ പ്രത്യക്ഷപ്പെട്ട പുതിയ വിവോ ഫോണുകളുടെ വില, ലോഞ്ച് ടൈംലൈൻ സംബന്ധിച്ച സൂചനകൾ:

ഏറ്റവും പുതിയ BIS സർട്ടിഫിക്കേഷൻ രേഖകളിൽ V237, V2561 എന്നീ രണ്ട് പുതിയ മോഡൽ നമ്പറുകളെക്കുറിച്ച് പരാമർശിക്കുന്നു. ഈ മോഡൽ നമ്പറുകൾ നേരത്തെ ബ്ലൂടൂത്ത് SIG ഡാറ്റാബേസിൽ കണ്ടിരുന്നപ്പോൾ വിവോ X300 FE, വിവോ X200T എന്നിങ്ങനെ പട്ടികപ്പെടുത്തിയിരുന്നു. രണ്ട് സർട്ടിഫിക്കേഷനുകളും ഒരുമിച്ച് പരിഗണിക്കുമ്പോൾ, ഈ സ്മാർട്ട്‌ഫോണുകൾ ഇന്ത്യൻ വിപണിയിൽ ലോഞ്ച് ചെയ്യാൻ തയ്യാറെടുക്കുകയാണെന്ന് വ്യക്തമാകുന്നു.

ആദ്യകാല ലീക്കുകൾ അനുസരിച്ച്, വിവോ X300 FE യുടെ വില ഏകദേശം 60,000 രൂപയായിരിക്കുമെന്ന് പ്രതീക്ഷിക്കുന്നു. വിവോ X200T-യുടെ വില ഏകദേശം 55,000 രൂപയാകാനാണു സാധ്യത. X200T ഈ മാസം അവസാനത്തോടെ ലോഞ്ച് ചെയ്തേക്കുമെന്നു റിപ്പോർട്ടുകൾ സൂചിപ്പിക്കുന്നു, അതേസമയം X300 FE-യുടെ കൃത്യമായ ലോഞ്ച് സമയം ഇപ്പോഴും അനിശ്ചിതത്വത്തിലാണ്.

വിവോയുടെ മുൻ ലോഞ്ച് ഷെഡ്യൂളും ചില സൂചനകൾ നൽകുന്നു. വിവോ X200 FE 2025 ജൂലൈയിലാണ് അവതരിപ്പിച്ചത്, സമാനമായ ഒരു ഇടവേളയ്ക്ക് ശേഷം, X300 FE ജനുവരി അവസാനമോ ഫെബ്രുവരിയിലോ എത്തും.

വിവോ X300FE-യിൽ പ്രതീക്ഷിക്കുന്ന സവിശേഷതകൾ:

ലഭ്യമായ വിവരങ്ങളുടെ അടിസ്ഥാനത്തിൽ, 2025 ഡിസംബറിൽ ചൈനയിൽ ലോഞ്ച് ചെയ്ത വിവോ S50 പ്രോ മിനിയുടെ റീബ്രാൻഡഡ് പതിപ്പായിരിക്കും വിവോ X300 FE. ഈ വിവരങ്ങൾ ശരിയാണെങ്കിൽ, വിവോ X300 FE ഇന്ത്യൻ വിപണിയിൽ ഒരു കോം‌പാക്റ്റ് ഫ്ലാഗ്ഷിപ്പ് സ്മാർട്ട്‌ഫോണായി സ്ഥാനം പിടിച്ചേക്കാം.

1.5K റെസല്യൂഷനും 120Hz റിഫ്രഷ് റേറ്റും ഉള്ള 6.31 ഇഞ്ച് OLED LTPO ഡിസ്‌പ്ലേ ഈ ഫോണിൽ ഉണ്ടായേക്കും. സ്‌നാപ്ഡ്രാഗൺ 8 Gen 5 ചിപ്‌സെറ്റ് കരുത്ത് പകരാൻ സാധ്യതയുള്ള ഫോണിൽ 6,500mAh ബാറ്ററിയും ഉൾപ്പെടാം. 90W വയർഡ് ചാർജിംഗും 40W വയർലെസ് ചാർജിംഗും ഈ ഫോൺ പിന്തുണച്ചേക്കും.

ക്യാമറകളുടെ കാര്യത്തിൽ, വിവോ X300 FE ഫോൺ 50 മെഗാപിക്സൽ ഫ്രണ്ട് ക്യാമറയുമായി വരുമെന്ന് പ്രതീക്ഷിക്കുന്നു. പിന്നിൽ, 50 മെഗാപിക്സൽ മെയിൻ സെൻസർ, 8 മെഗാപിക്സൽ അൾട്രാ-വൈഡ് ലെൻസ്, 50 മെഗാപിക്സൽ 3x പെരിസ്കോപ്പ് ടെലിഫോട്ടോ ക്യാമറ എന്നിവയുള്ള ട്രിപ്പിൾ ക്യാമറ സെറ്റപ്പും ഇതിലുൾപ്പെട്ടേക്കാം.

വിവോ X200T-യിൽ പ്രതീക്ഷിക്കുന്ന സവിശേഷതകൾ:

2025 ഏപ്രിലിൽ ചൈനയിൽ ലോഞ്ച് ചെയ്ത വിവോ X200s-മായി വിവോ X200T-ക്ക് അടുത്ത ബന്ധമുള്ളതായി പറയപ്പെടുന്നു. 1.5K റെസല്യൂഷനും 120Hz റിഫ്രഷ് റേറ്റും വാഗ്ദാനം ചെയ്യുന്ന 6.31 ഇഞ്ച് OLED LTPO ഡിസ്‌പ്ലേയാണ് വിവോ X200s-ലും വരുന്നത്. എന്നിരുന്നാലും, X300 FE-യിൽ നിന്ന് വ്യത്യസ്തമായി, ഈ മോഡലിൽ ഡൈമൻസി'റ്റി 9400 പ്ലസ് ചിപ്‌സെറ്റ് ആയിരിക്കുമെന്ന് പ്രതീക്ഷിക്കുന്നു.

വിവോ X200T-യിൽ ഏകദേശം 6,200mAh ബാറ്ററി ഉണ്ടായിരിക്കും. 90W വയർഡ് ചാർജിംഗും 40W വയർലെസ് ചാർജിംഗും ഇത് പിന്തുണയ്ക്കുമെന്ന് പ്രതീക്ഷിക്കുന്നു. സെൽഫികൾക്കായി 50-മെഗാപിക്സൽ ഫ്രണ്ട് ക്യാമറ ഉണ്ടായേക്കും. പിൻഭാഗത്ത്, ഒരു മെയിൻ ക്യാമറ, ഒരു അൾട്രാ-വൈഡ് ലെൻസ്, ഒരു 3x പെരിസ്‌കോപ്പ് ടെലിഫോട്ടോ ലെൻസ് എന്നിവയുൾപ്പെടെ മൂന്ന് 50 മെഗാപിക്സൽ സെൻസറുകളുള്ള ഒരു ട്രിപ്പിൾ ക്യാമറ സെറ്റപ്പ് ഉണ്ടായിരിക്കുമെന്ന് പ്രതീക്ഷിക്കുന്നു. വിവോ X200T ഇന്ത്യയിലെ ഓൺലൈൻ പ്ലാറ്റ്‌ഫോമുകൾ വഴി മാത്രമേ വിൽക്കുകയുള്ളൂ എന്നും അഭ്യൂഹമുണ്ട്.