7000mAh ബാറ്ററിയും 50MP ക്യാമറയും! പുതിയ റിയൽമി ഫോൺ വാങ്ങുന്നതിന് മുൻപ് ഇത് അറിയൂ

റിയൽമി ആരാധകർ കാത്തിരുന്ന അഞ്ചാമൻ എത്തുന്നു! റിയൽമി 16 സീരീസിലെ ഏറ്റവും പുതിയ മോഡലായ 'റിയൽമി 16x 5G' അടുത്ത ആഴ്ച ഇന്ത്യയിൽ ലോഞ്ച് ചെയ്യും. ജനപ്രിയ മോഡലുകളായ റിയൽമി 16, 16 പ്രോ, 16 പ്രോ+, 16T 5G എന്നിവയ്ക്ക് ശേഷമാണ് ഈ പുതിയ ഹാൻഡ്‌സെറ്റ് വിപണി കീഴടക്കാൻ എത്തുന്നത്. ലോഞ്ചിന് മുന്നോടിയായി ഫോണിന്റെ വിവരങ്ങൾ ഉൾപ്പെടുത്തിയ പ്രത്യേക മൈക്രോസൈറ്റ് നിലവിൽ വന്നതോടെ, സ്മാർട്ട്‌ഫോണിന്റെ ഡിസൈൻ, കളർ വേരിയന്റുകൾ, പ്രധാന ഫീച്ചറുകൾ എന്നിവ സ്ഥിരീകരിച്ചിട്ടുണ്ട്. അതിശക്തമായ മീഡിയടെക് ഡൈമൻസിറ്റി 6000 സീരീസ് പ്രൊസസറും UFS 2.2 സ്റ്റോറേജുമാണ് ഇതിന്റെ പ്രധാന കരുത്ത്. ഫോട്ടോപ്രേമികൾക്കായി 50 മെഗാപിക്സൽ പ്രധാന സെൻസറോട് കൂടിയ ഡ്യുവൽ റിയർ ക്യാമറ സെറ്റപ്പും രണ്ട് ആകർഷണീയമായ കളർ ഓപ്ഷനുകളും ഇതിൽ ഉൾപ്പെടുത്തിയിട്ടുണ്ട്. വരും ദിവസങ്ങളിൽ പുറത്തിറങ്ങാനിരിക്കുന്ന റിയൽമി 16x 5G-യെ കുറിച്ച് ഇതുവരെ പുറത്തുവന്ന പ്രധാന വിവരങ്ങൾ ഇതാ.

റിയൽമി 16x 5G: ലോഞ്ച് വിവരങ്ങളും ഇന്ത്യയിലെ ലഭ്യതയും

പ്രമുഖ സ്മാർട്ട്‌ഫോൺ നിർമ്മാതാക്കളായ റിയൽമി തങ്ങളുടെ പുതിയ റിയൽമി 16x 5G ഓഗസ്റ്റ് 12-ന് ഉച്ചയ്ക്ക് 12 മണിക്ക് ഇന്ത്യയിൽ ലോഞ്ച് ചെയ്യും. എന്നാൽ റിയൽമി 16x 5G-യ്ക്കായി പ്രത്യേക ലോഞ്ച് ചടങ്ങ് സംഘടിപ്പിക്കുമോ അതോ സോഫ്റ്റ് ലോഞ്ചിലൂടെ ഫോൺ അവതരിപ്പിക്കുമോ എന്ന് കമ്പനി ഇതുവരെ സ്ഥിരീകരിച്ചിട്ടില്ല. ലൈവ് ലോഞ്ച് നടക്കുകയാണെങ്കിൽ കമ്പനിയുടെ ഔദ്യോഗിക യൂട്യൂബ് ചാനലിലൂടെയും മറ്റ് സോഷ്യൽ മീഡിയ പ്ലാറ്റ്‌ഫോമുകളിലൂടെയും ചടങ്ങ് തത്സമയം സംപ്രേക്ഷണം ചെയ്യുമെന്ന് പ്രതീക്ഷിക്കാം. റിയൽമി 16x 5G-യ്ക്കായി ഫ്ലിപ്കാർട്ടിൽ പ്രത്യേക മൈക്രോസൈറ്റ് അടുത്തിടെ ലഭ്യമായിട്ടുണ്ട്. ഈ ഇ-കൊമേഴ്‌സ് പ്ലാറ്റ്‌ഫോം വഴിയായിരിക്കും ഫോൺ രാജ്യത്ത് വിൽപ്പനയ്‌ക്കെത്തുക എന്ന് ഇതോടെ സ്ഥിരീകരിക്കപ്പെട്ടു. ബ്ലൂമിംഗ് ബ്രൗൺ, ബ്ലൂമിംഗ് സിൽവർ എന്നീ രണ്ട് നിറങ്ങളിലാണ് ഈ സ്മാർട്ട്‌ഫോൺ ലഭ്യമാകുക. റിയൽമി 16x 5G ഇന്ത്യയിൽ 4ജിബി റാമും 128ജിബി സ്റ്റോറേജും, 6ജിബി റാമും 128ജിബി സ്റ്റോറേജും, 6ജിബി റാമും 256ജിബി സ്റ്റോറേജുമുള്ള വേരിയന്റുകളിൽ ലഭ്യമാകുമെന്ന് അടുത്തിടെ ഒരു റിപ്പോർട്ടിൽ വ്യക്തമാക്കിയിരുന്നു.

 റിയൽമി 16x 5G പ്രതീക്ഷിക്കുന്ന വില വിവരങ്ങൾ 

റിയൽമി 16x 5G ഇന്ത്യയിൽ അവതരിപ്പിക്കാൻ ദിവസങ്ങൾ മാത്രം ബാക്കിനിൽക്കെ, ഈ പുതിയ ഫോണിന്റെ വില എത്രയായിരിക്കും എന്ന ആകാംക്ഷയിലാണ് ടെക് പ്രേമികൾ. ഫോണിന്റെ ഔദ്യോഗിക വില വിവരങ്ങൾ കമ്പനി ഇതുവരെ പുറത്തുവിട്ടിട്ടില്ലെങ്കിലും, 25,000 രൂപയിൽ താഴെയായിരിക്കും ഇതിന്റെ വിലയെന്നാണ് വിവരങ്ങൾ സൂചിപ്പിക്കുന്നത്. കൃത്യമായ നിർണ്ണയങ്ങളും വില വിവരങ്ങളും ലോഞ്ച് ദിനത്തിൽ തന്നെ വ്യക്തമാകും.

കഴിഞ്ഞ വർഷം പുറത്തിറങ്ങിയ മുൻഗാമി മോഡലിന്റെ വില നോക്കിയാൽ പുതിയ ഫോണിന്റെ വിലയെക്കുറിച്ച് വ്യക്തമായ സൂചന ലഭിക്കും. 2025 ഒക്ടോബറിലാണ് റിയൽമി 15x 5G വിപണിയിലെത്തിയത്. 6ജിബി റാമും 128ജിബി സ്റ്റോറേജുമുള്ള അടിസ്ഥാന വേരിയന്റിന് 16,999 രൂപയായിരുന്നു തുടക്കവില. 8ജിബി റാമും 128ജിബി സ്റ്റോറേജുമുള്ള മോഡലിന് 17,999 രൂപയും, 8ജിബി റാമും 256ജിബി സ്റ്റോറേജുമുള്ള ടോപ്പ് വേരിയന്റിന് 19,999 രൂപയുമായിരുന്നു അന്നത്തെ വില. ഇതിന് സമാനമായ മികച്ച ഓഫറുകളോടെയായിരിക്കും പുതിയ ഫോണും എത്തുതെന്നാണ് പ്രതീക്ഷിക്കുന്നത്.

റിയൽമി 16x 5G: പ്രതീക്ഷിക്കുന്ന സവിശേഷതകളും ഫീച്ചറുകളും

ഉടൻ തന്നെ വിപണിയിലെത്തുന്ന റിയൽമി 16x 5G-യുടെ പ്രധാന സവിശേഷതകളും ഫീച്ചറുകളും ഓഗസ്റ്റ് 12-ന് കമ്പനി ഔദ്യോഗികമായി പുറത്തുവിടും. ഫോണിന്റെ വില വിവരങ്ങളും വിപണിയിലെത്തുന്ന സ്റ്റോറേജ് വേരിയന്റുകളും അന്നേ ദിവസം തന്നെ പ്രഖ്യാപിക്കും. അതേസമയം, ആകർഷകമായ പെർഫോമൻസോടെ എത്തുന്ന ഈ പുതിയ ഫോൺ ഇന്ത്യയിൽ എന്തൊക്കെ പ്രത്യേകതകളോടെയായിരിക്കും എത്തുക എന്നറിയാൻ ടീസറുകളും മാർക്കറ്റിംഗ് വിവരങ്ങളും ചോർന്ന റിപ്പോർട്ടുകളും പരിശോധിക്കാവുന്നതാണ്.

ഡിസൈൻ, ഡിസ്പ്ലേ

സ്മാർട്ട്‌ഫോൺ വിപണിയിൽ വീണ്ടും തരംഗമാകാൻ റിയൽമി 16x 5G എത്തുന്നത് വേറിട്ട ലുക്കിലാണ്. മികച്ച ഫ്ലാറ്റ് ബാക്ക് പാനലും മുകളിൽ ഇടതുവശത്തായി ക്രമീകരിച്ച ചതുരാകൃതിയിലുള്ള ക്യാമറ മൊഡ്യൂളും ഫോണിന് ഏറെ പ്രീമിയം ലുക്ക് നൽകുന്നു. താഴെ ഇടതുവശത്തെ റിയൽമി ബ്രാൻഡിംഗും വലതുവശത്ത് ക്രമീകരിച്ചിരിക്കുന്ന വോളിയം, പവർ ബട്ടണുകളും ഇതിന്റെ ഡിസൈൻ ഭംഗി ഇരട്ടിയാക്കുന്നു.

താഴെ ഭാഗത്തായി സ്പീക്കർ ഗ്രില്ലിനും സിം ട്രേയ്ക്കും ഇടയിലാണ് യുഎസ്ബി ടൈപ്പ് സി പോർട്ട് നൽകിയിട്ടുള്ളത്. ലുക്കിൽ മാത്രമല്ല, കരുത്തിലും ഈ ഫോൺ ഒട്ടും പിന്നിലല്ല. വെള്ളത്തെയും പൊടിയെയും പ്രതിരോധിക്കാൻ ഐപി65 റേറ്റിംഗും പരുക്കൻ ഉപയോഗങ്ങൾക്ക് അനുയോജ്യമായ എംഐഎൽ-എസ്റ്റിഡി-810എച്ച് സർട്ടിഫിക്കേഷനുമായാണ് ഫോൺ വിപണിയിലെത്തുന്നത്. കാഴ്ചാനുഭവം മനോഹരമാക്കാൻ 144Hz അഡാപ്റ്റീവ് റീഫ്രഷ് റേറ്റുള്ള ഫ്ലാറ്റ് ഡിസ്‌പ്ലേയാണ് ഫോണിലുള്ളത്. കടുത്ത വെയിലിലും വ്യക്തത നൽകുന്ന 1,200 നിറ്റ്സ് പീക്ക് ബ്രൈറ്റ്‌നസും സെൽഫി ക്യാമറയ്ക്കായുള്ള ഹോൾ-പഞ്ച് ഡിസ്‌പ്ലേ കട്ടൗട്ടും ഇതിന്റെ പ്രധാന ആകർഷണങ്ങളാണ്.

പെർഫോമൻസും ഓപ്പറേറ്റിംഗ് സിസ്റ്റവും

അതിവേഗ പ്രകടനവും തടസ്സമില്ലാത്ത ഗേമിംഗ് അനുഭവവും നൽകാനായി റിയൽമി 16x 5G ഫോണിൽ 6 നാനോമീറ്റർ പ്രൊസസറിൽ നിർമ്മിച്ച ഒക്ടാകോർ മീഡിയടെക് ഡൈമൻസിറ്റി 6300 ചിപ്‌സെറ്റാണ് നൽകിയിട്ടുള്ളത്. 14ജിബി വരെയുള്ള ഡൈനാമിക് റാമും 256ജിബി യുഎഫ്എസ് 2.2 ഇൻബിൽറ്റ് സ്റ്റോറേജും നൽകിയിരിക്കുന്നതിനാൽ ആപ്പുകളും ഗെയിമുകളും വേഗത്തിൽ പ്രവർത്തിക്കും. ചൂടാകുന്നത് ഒഴിവാക്കാനായി 5,300 ചതുരശ്ര മില്ലീമീറ്റർ വിസ്തൃതിയുള്ള കൂളിംഗ് സാങ്കേതികവിദ്യയും ഫോണിലുണ്ട്.

ഭാരമേറിയ ഗെയിമുകൾ കളിക്കുമ്പോഴും മറ്റ് വലിയ ടാസ്കുകൾ ചെയ്യുമ്പോഴും ഫോൺ ചൂടാകുന്നതും പെർഫോമൻസ് മന്ദഗതിയിലാകുന്നതും തടയാൻ ഇത് സഹായിക്കും. അഞ്ച് വർഷത്തെ മികച്ച പെർഫോമൻസ് ഈ ഫോൺ ഉറപ്പുനൽകുന്നുണ്ടെന്നാണ് കമ്പനി വ്യക്തമാക്കുന്നത്. കൂടാതെ രണ്ട് വർഷത്തെ ആൻഡ്രോയിഡ് അപ്‌ഡേറ്റുകളും മൂന്ന് വർഷത്തെ സെക്യൂരിറ്റി അപ്‌ഡേറ്റുകളും ഈ പുതിയ റിയൽമി 16x 5G ഫോണിന് ലഭിക്കും.

ക്യാമറ 

ഫോട്ടോപ്രേമികളെ ആകർഷിക്കാൻ റിയൽമി 16x 5G ഫോണിൽ എൽഇഡി ഫ്ലാഷിനും മൾട്ടി കളർ റിംഗ് ലൈറ്റിനുമൊപ്പം ഡ്യുവൽ റിയർ ക്യാമറ സജ്ജീകരണമാണ് നൽകിയിട്ടുള്ളത്. 50 മെഗാപിക്സൽ പ്രധാന ക്യാമറയാണ് ഇതിൽ ഉൾപ്പെടുത്തിയിരിക്കുന്നത്. ചിത്രങ്ങൾ മികച്ച രീതിയിൽ എഡിറ്റ് ചെയ്യാൻ എഐ അൾട്രാ ക്ലാരിറ്റി, എഐ ഇറേസർ തുടങ്ങിയ നിരവധി എഐ ടൂളുകളും ഫോണിലുണ്ട്. സെൽഫികൾക്കായി ഡിസ്പ്ലേയിൽ ഹോൾ പഞ്ച് കട്ടൗട്ടുമുണ്ട്.

ബാറ്ററിയും ഫാസ്റ്റ് ചാർജിംഗും

ഫോണിന്റെ ഏറ്റവും പ്രധാന ആകർഷണം ഇതിലെ 7000mAh കരുത്തുറ്റ ബാറ്ററിയാണ്. ആറ് വർഷത്തെ ബാറ്ററി ഹെൽത്ത് ആയുസ്സ് കമ്പനി ഉറപ്പുനൽകുന്നുണ്ട്. ഒറ്റ ചാർജിൽ 156.2 മണിക്കൂർ പാട്ടുകൾ കേൾക്കാനും 12.3 മണിക്കൂർ ഫ്രീ ഫയർ ഗെയിം കളിക്കാനും സാധിക്കും. കൂടാതെ 20.3 മണിക്കൂർ യൂട്യൂബ് വീഡിയോ കാണാനും 19.1 മണിക്കൂർ നാവിഗേഷൻ ഉപയോഗിക്കാനും ഈ കരുത്തുറ്റ ബാറ്ററി സഹായിക്കും. 45W ഫാസ്റ്റ് ചാർജിംഗ് പിന്തുണയുള്ള ഈ ഫോൺ 10 മിനിറ്റ് മാത്രം ചാർജ് ചെയ്താൽ 3 മണിക്കൂർ വരെ സോഷ്യൽ മീഡിയ സ്ക്രോൾ ചെയ്യാൻ കഴിയും.