ഹോണർ മാജിക് 7 ആർഎസ്ആർ പോർഷെ ഡിസൈനിൻ്റെ വിവരങ്ങൾ ലീക്കായി

ഏറെ പ്രതീക്ഷയോടെ കാത്തിരിക്കുന്ന ഹോണർ മാജിക് 7 ആർഎസ്ആർ പോർഷെ ഡിസൈൻ ഇന്ന് ചൈനയിൽ ലോഞ്ച് ചെയ്യാൻ പോവുകയാണ്. ഫോണിൻ്റെ ഡിസൈനിനെക്കുറിച്ചും പ്രധാന ഫീച്ചറുകളെക്കുറിച്ചും ഹോണർ ചില സൂചനകൾ പങ്കുവെച്ചിട്ടുണ്ട്. ഇതിനു പുറമെ ലോഞ്ച് ചെയ്യുന്നതിന് മുന്നോടിയായി ഒരു ടിപ്‌സ്റ്റർ ഫോണിൽ പ്രതീക്ഷിക്കുന്ന ക്യാമറ സവിശേഷതകളെക്കുറിച്ചുള്ള വിവരങ്ങൾ ലീക്ക് ചെയ്തിട്ടുണ്ട്. ഫോണിൻ്റെ ഡിസ്‌പ്ലേ, ബിൽഡ്, ബാറ്ററി എന്നിവയെ കുറിച്ചുള്ള ചില വിശദാംശങ്ങൾ നേരത്തെ ലീക്കായിരുന്നു. കഴിഞ്ഞ വർഷത്തെ ഹോണർ പോർഷെ ഡിസൈൻ മാജിക് 6 ആർഎസ്ആറിൻ്റെ പിൻഗാമിയാണ് ഹോണർ മാജിക് 7 ആർഎസ്ആർ പോർഷെ ഡിസൈൻ. ഒക്ടോബറിൽ ചൈനയിൽ അവതരിപ്പിച്ച ഹോണർ മാജിക് 7 സീരീസിൻ്റെ ഭാഗമാണ് ഇതെന്നും പ്രതീക്ഷിക്കുന്നു. പ്രീമിയം സ്മാർട്ട്‌ഫോണായ ഇത് ഉയർന്ന നിലവാരമുള്ള ഡിസൈനും അത്യാധുനിക സവിശേഷതകളും അവതരിപ്പിക്കാൻ സാധ്യതയുണ്ട്.

ഹോണർ മാജിക് 7 ആർഎസ്ആർ പോർഷെ ഡിസൈനിൻ്റെ ക്യാമറ സവിശേഷതകൾ:

ഹോണർ മാജിക് 7 ആർഎസ്ആർ പോർഷെ ഡിസൈനിൽ 1/1.3 ഇഞ്ച് സെൻസറുള്ള 50 മെഗാപിക്സൽ OV50K പ്രൈമറി ക്യാമറ ഉണ്ടാകുമെന്ന് പ്രതീക്ഷിക്കുന്നു. ഈ ക്യാമറ f/1.4 മുതൽ f/2.0 വരെയുള്ള ഫിസിക്കൽ വേരിയബിൾ അപ്പേർച്ചറുമായി വരും. 122 ഡിഗ്രി വ്യൂ ഫീൽഡ് ഉള്ള 50 മെഗാപിക്സൽ അൾട്രാ വൈഡ് ആംഗിൾ ക്യാമറയും 25 എംഎം മാക്രോ ഫോട്ടോഗ്രാഫിക്കുള്ള സപ്പോർട്ടും ഇതിൽ ഉൾപ്പെടും.

കൂടാതെ, 1/1.4 ഇഞ്ച് സെൻസറും പെരിസ്‌കോപ്പ് ലെൻസും ഉള്ള 200 മെഗാപിക്സൽ ടെലിഫോട്ടോ ക്യാമറയും ഫോണിന് ഉണ്ടാകുമെന്ന് അഭ്യൂഹമുണ്ട്. ഈ ക്യാമറ ഒപ്റ്റിക്കൽ ഇമേജ് സ്റ്റെബിലൈസേഷൻ (OIS), 3x ഒപ്റ്റിക്കൽ സൂം, 100x ഡിജിറ്റൽ സൂം, ഒരു f/1.88 അപ്പേർച്ചർ എന്നിവ വാഗ്ദാനം ചെയ്യുമെന്ന് പ്രതീക്ഷിക്കുന്നു. നൂതനമായ 1G+5P ഫ്ലോട്ടിംഗ് പെരിസ്‌കോപ്പ് സ്ട്രക്ച്ചർ, ഡ്യുവൽ ഇലക്ട്രോമാഗ്നറ്റിക് മോട്ടോർ, മെച്ചപ്പെട്ട പ്രകടനത്തിനായി ALC കോട്ടിംഗ് എന്നിവയും ഇതിലുണ്ട്. 1200-പോയിൻ്റ് dTOF ഫോക്കസ് മൊഡ്യൂളും ഒരു ഫ്ലിക്കർ സെൻസറും ഇതിൽ ഉൾപ്പെടുന്നു.

ഹോണർ മാജിക് 7 ആർഎസ്ആർ പോർഷെ ഡിസൈനിൻ്റെ മറ്റു സവിശേഷതകൾ:

മാജിക് 7 ആർഎസ്ആർ പോർഷെ ഡിസൈനിൽ രണ്ട് തകർപ്പൻ സാങ്കേതികവിദ്യകൾ ഉൾപ്പെടുമെന്ന് ഹോണർ വെളിപ്പെടുത്തിയിരുന്നു. "ഇൻഡസ്ട്രിയിലെ ആദ്യത്തെ പെരിസ്‌കോപ്പ് ടെലിഫോട്ടോ അൾട്രാ ലാർജ് അപ്പർച്ചർ", "ഇൻഡസ്ട്രിയിലെ ആദ്യത്തെ ഡ്യുവൽ ഇലക്‌ട്രോമാഗ്നറ്റിക് ഫോക്കസ് മോട്ടോർ" എന്നിവയാണത്. ഡിസംബർ 23-ന് പ്രാദേശിക സമയം ഉച്ചയ്ക്ക് 2 മണിക്ക് (4:30 PM IST) ഫോൺ ചൈനയിൽ അവതരിപ്പിക്കും.

1.5K റെസല്യൂഷനോടുകൂടിയ 6.8 ഇഞ്ച് LTPO ഡിസ്‌പ്ലേ, ക്വാഡ്-കർവ്ഡ് ഡിസൈൻ, 120Hz റീഫ്രഷ് റേറ്റ് എന്നിവ ഈ ഫോണിൽ ഉണ്ടായിരിക്കുമെന്ന് നേരത്തെയുള്ള ലീക്കുകൾ സൂചിപ്പിക്കുന്നു. ToF 3D ഡെപ്ത് സെൻസറും 50 മെഗാപിക്സൽ ഫ്രണ്ട് ക്യാമറയും ഇതിലുണ്ടാകുമെന്ന് പ്രതീക്ഷിക്കുന്നു. ഹോണർ മാജിക് 7 ആർഎസ്ആർ പോർഷെ ഡിസൈൻ ആൻഡ്രോയിഡ് 15 അടിസ്ഥാനമാക്കിയുള്ള MagicOS 9-ലാണ് പ്രവർത്തിക്കുക. 100W വയർഡ്, 80W വയർലെസ് ഫാസ്റ്റ് ചാർജിംഗിനെ പിന്തുണയ്ക്കുന്ന ഫോണാണ് മാജിക് 7 ആർഎസ്ആർ പോർഷെ ഡിസൈൻ.